Ino Nkaambo nzi Bantu Ncobatazyi Bwini Kujatikizya Muuya Uusalala?

INO muuya uusalala ninzi? Mubuzyo ooyu ulibonya mbuli kuti taukatazyi kwiingula, pele ulakatazya. Ba Papa Benedict XVI bakaambila nkamu yabantu ku Australia kuti: “Cilakatazya kuzyiba bwini kujatikizya Muuya.”

Ncobeni, ibanji bajisi mizeezo iindene-indene kujatikizya mubuzyo wakuti, Ino muuya uusalala ninzi? Atubone bwiinguzi buccilila:

• Muuya uusalala muntu uuli mukati kabasikwiiya ba Kristo.

• Muuya uusalala caamba kuti Leza nkwali munyika.

• Muuya uusalala muntu watatu munjiisyo yaba Leza Botatwe.

Ino nkaambo nzi bantu ncobanyongene boobu? Ibantu balinyongene kujatikizya muuya uusalala kuzwa mumwaanda wamyaka wane C.E., ciindi bantu bakayiya zyabukombi nibakali kwaamba kuti muuya uusalala muntu wakeelene a Leza. Pele, eeyi njiisyo taiko mumagwalo alimwi basikutobela ba Kristo bakusaanguna tiibakali kuyiisya boobu. Ibbuku lya New Catholic Encyclopedia ipandulula kuti: “Mu Cizuminano Cipya kunyina notwaambilwa kuti muuya wa Leza muntu . . . Muuya uusalala ninguzu zya Leza.” Ibbuku ndemunya eeli lilayungizya kwaamba kuti: “Imagwalo manji aajanika mu Cizuminano Cipya atondezya kuti muuya wa Leza tali muntu pe; eeci cili boobu ikapati twabona mbwaabelesyegwa mabala aamba muuya alimwi anguzu zya Leza.”

Masimpe ngakuti, bantu cilabakatazya kuyeeyela nguzu kuba muntu. Aboobo, buvwuntauzi bwakacitika caino-ino ku United States, kwakajanika kuti ibantu banji tabazumini kuti muuya uusalala muntu naa “ncintu cipona.” Sena baliluzi? Naa sena, tweelede kubasyoma bantu bakayiya zyabukombi balo ibaamba kuti “muuya uusalala Muntu pesi wiindene a Taata a Jesu”?

Ikutegwa tuzyibe bwini, tweelede ikubona ncolyaamba Ijwi lya Leza, Ibbaibbele, yalo ilapandulula ncowaamba muuya uusalala. Mwaapostolo Paulo wakalemba kuti: “Magwalo aya oonse akazwa kuli-Leza, alikondede kukufundisya akukulaya.”—2 Timoteo 3:16.

Ino nkaambo nzi ncokuyandika kuzyiba bwini kujatikizya muuya uusalala? Nkaambo kakuti ikuzyiba bwini kulakonzya kumupa kuti mugwasyigwe a Leza. Sena zimwi ziindi mulaakulimvwa kuti tamukonzyi kuliyumya? Jesu wakabasyomezya basikwiiya bakwe kuti: “Amukumbile muzoopegwa . . . Nywebo . . . mbomuzi kupa bana banu zintu zibotu, usowanu uuli kujulu sena takooindilila kubapa Muuya Uusalala abakumbila kulinguwe!”—Luka 11:9, 13.

Muzibalo zitobela, Imagwalo alatwaambila ncowaamba muuya uusalala. Alimwi tulabona mboukonzya kutugwasya.

Majwi aakwelelezya sikubala aali apeeji 3]

Imagwalo alatwaambila ncowaamba muuya uusalala