MAKANI AAYEEME AMUTWE UULI ACIVWUMBYO | SENA LEZA ULAYANDIKA KULINDISWE?

Ncinzi Cipa Kubuzya Boobu?

Cikwankwani cakalembwa caino-ino akabunga kabantu batasyomi kuti Leza nkwali, cakajisi majwi aakuti: “Sena muli umwi wabaabo batasyomi muli Leza? Tamuli nyolikke, bantu banji mbobabede oobo.” Cakutadooneka, aaba bantu bayeeya kuti Leza tayandiki kulimbabo.

Kulubazu lumwi, banji ibalyaamba kuti balasyoma muli Leza, balacita zyintu mbuli kuti Leza tako. Ba Salvatore Fisichella, ba Bishopu bapati mucikombelo ca Katolika, bakaamba boobu kujatikizya bantu bamucikombelo cabo: “Kunyina uukonzya kutuzyiba kuti tuli Banakristo nkaambo zyintu nzyotucita zilikozyenye anzyobacita bantu batasyomi.”

Bamwi bajisi bubi cakuti tabajisi ciindi cakuyeeya Leza. Bayeeya kuti uli kule kapati alimwi akuti takonzyi kubagwasya munzila iili yoonse mubuumi bwabo. Bantu bali boobu bayeeya buyo Leza ciindi nobali mumapenzi naa nobayanda cintu cimwi kulinguwe—bamubona mbuli mubelesi weelede kucita kufwumbwa ncaambilwa.

Bamwi tabaciti nzyobaiya kucikombelo cabo, ambweni bayeeya kuti tazikonzyi kubagwasya. Mucikozyanyo, 76 pesenti yaba Katolika mu Germany basyoma kuti cili buyo kabotu kuti musankwa amukaintu kabakkala antoomwe kabatanakwatana. Kuyeeya kuli boobu takweendelani anjiisyo zyamu Bbaibbele alimwi anjiisyo zyamu cikombelo cabo. (1 Bakolinto 6:18; Bahebulayo 13:4) Kunze lyaba Katolika, kuli bantu abamwi bamuzikombelo zimwi ibaazumina makani aakuti tabaponi kweelana anzyobasyoma. Basololi bazikombelo zisiyene-siyene baamba kuti bantu muzikombelo zyabo balilemeka mbuli bantu batasyomi muli Leza.

Aboobo, zikozyanyo eezyi zipa kubuzya kuti: Sena ncobeni Leza ulayandika kulindiswe? Makani aaya taali mapya pe. Nkwaali mubbuku lyakusaanguna lyamu Bbaibbele. Kutegwa tujane bwiinguzi kumubuzyo ooyu, atubikkile maano kumakani aali mbwaabede aalembedwe mubbuku lya Matalikilo.