Inzya, Leza ulabagwasya aabo ibamulomba cakusinizya zyintu zyeendelana akuyanda kwakwe. Nokuba kuti tamunabuzuba mwapaila, zikozyanyo zyamu Bbaibbele zyabantu bakali kupaila kuti, “Leza kondigwasya,” zilakonzya kumukulwaizya. Mucikozyanyo:

•   “Undigwasye, O Jehova Leza wangu, undifutule muluzyalo lwako.”—Intembauzyo 109:26.

•   “Pele mebo ndi mucete, ndipengede. Fwambaana kundigwasya, O Leza.”—Intembauzyo 70:5.

 Masimpe, sikulemba majwi aaya wakajisi lusyomo luyumu muli Leza. Nokuba boobo, Leza ulabaswiilila boonse babombe myoyo, mbuli baabo “bawizukide mumoyo” naa “batete myuuya.”—Intembauzyo 34:18.

 Tamweelede kuyoowa kuti Leza uli kulamfwu kapati cakuti tabikkili maano kumapenzi aanu. Bbaibbele lyaamba kuti: “Jehova ulisumpukide, nekubaboobo ulibabwene abaniini, pele basikamikami ulibezi nibacili kule.” (Intembauzyo 138:6) Cimwi ciindi Jesu wakaambila basikwiiya bakwe kuti: “Naaba masusu aakumutwe wanu alibalidwe oonse.” (Matayo 10:30) Leza ulibwene zyintu zimujatikizya kubikkilizya azyeezyo nywebo nzyomutazyi. Aboobo, kuti kacikonzya kucita oobo, nkokuti uyoomwiingula mwapaila kuti amugwasye ciindi nomwajana zyintu zimulibilisya!—1 Petulo 5:7.