BOYLE i bon long 1627, long Lismore Castle, Aialan, na famili bilong em i gat planti mani kago. Dispela em kirap bilong wanpela haptaim we ol man i gat save ol i traim long helpim ol man long lusim pasin bilong strong strong long wanpela tingting o bilip em ol i bin holim inap planti handret yia. Boyle tu i laik mekim olsem. Long buk em i raitim na i stori long em yet, Boyle i givim nem Philaretus long em yet, mining bilong en “Man Bilong Laikim Stretpela Pasin.”

Boyle i gat bikpela laik long save long tok i tru na em i gat wankain laik olsem long tokim ol narapela long ol samting em i kisim save long en. Em i kamap man bilong raitim ol buk, na ol samting em i raitim i stiaim tru planti man i stap long taim bilong en, wanpela bilong ol em saientis i gat nem, Bikman Isaac Newton. Long 1660, Boyle i kamap wanpela bilong ol man i kamapim Royal Society, em wanpela oganaisesen bilong ol saientis i stap yet nau long London, Inglan.

Ol man i tok Boyle em i papa bilong kemistri. Em i gat narapela kain pasin olgeta long ol narapela saveman bilong kemistri long taim bilong em. Ol i no stori long ol narapela man long ol samting ol i kisim save long en o ol i raitim long wei em wan wan man tasol inap kliagut long en. Tasol Boyle i raitim olgeta wok saiens bilong em bilong ol man i ken ritim. Na tu, em i no bilip nating tasol long ol  tingting ol man i bin holim longpela taim, nogat, em i wokim ol saiens eksperimen bilong kamapim klia olsem samting em i bilip long en em i tru.

Ol eksperimen bilong Boyle i strongim dispela tingting olsem sampela kain liklik sel i kamapim matter, na dispela matter i save bung wantaim long narapela narapela kain rot bilong kamapim ol narapela narapela samting.

Boyle i kamapim tingting bilong em long wok saiens long buk bilong em The Sceptical Chymist. Long dispela buk em i tokim ol saientis long ol i no ken hambak o strong strong long wanpela tingting, na ol i mas redi long tokaut long popaia bilong ol. Boyle i tok ol man i strong strong long wanpela tingting, ol i mas luksave olsem ol samting ol i save em i tru i narapela kain long ol samting ol i ting em i tru.

Ol samting Boyle i save em i tru, dispela i as bilong bilip em i gat long God. Save em i kisim long yunives na ol samting i gat laip, i kirapim em long bilip olsem i mas i gat Man i tingim na i wokim ol samting. Olsem na em i sakim tingting bilong planti saveman long taim bilong em, olsem i no gat God i stap. Boyle i tok, olgeta man husat i gat gutpela tingting na i skelim gut samting, ol bai bilip olsem i gat God i stap.

Tasol Boyle i no ting gutpela tingting tasol i rot bilong ol man long kisim nambawan gutpela save. Em i luksave olsem God i mas kamapim klia sampela tok. Em i tok God i mekim olsem long rot bilong Baibel.

Boyle i wari long lukim olsem planti man i no save long tok bilong Baibel na i luk olsem ol samting ol i bilip long en i no gat as tru bilong en. Em i tok, i no stret olsem as bilong bilip bilong man em samting papamama bilong em i bilip long en, o ples em i bin bon long en. Boyle i gat bikpela laik long helpim ol man long save gut long Baibel.

Bilong mekim olsem, Boyle i givim mani bilong sapotim wok bilong kamapim Baibel long planti tokples. Em ol tokples bilong ol asples man bilong Not Amerika, na tu, long tokples Arabik, Aialan, Malai, na Teki. Olsem na Robert Boyle i kamapim klia olsem em i gat save na pasin daun, na em i gat bikpela laik long painim tok i tru long olgeta samting na long helpim ol narapela man long mekim wankain.