YANGPELA
9: Nem Yu Gat
MAKIM WANEM SAMTING
Nem yu gat i makim bilip, pasin, na ol samting yu ting i bikpela samting. Dispela i winim lukluk na nem tru bilong yu. Nem yu gat i makim olgeta samting—pasin na lukluk bilong yu.
WAI NA EM I BIKPELA SAMTING
Taim yu save long nem yu gat, bai yu sanap strong long bilip bilong yu na yu no inap larim ol wankrismas i bosim yu.
“Planti manmeri i olsem ol stetiu ol i sanapim long stua. Ol yet i no save makim klos ol bai werim; ol narapela i save makim.”—Adrian.
“Mi lain long bihainim stretpela pasin maski i hatwok long mekim. Mi inap save long ol i pren tru bilong mi long pasin ol i mekim na pasin mi mekim taim mi stap wantaim ol.”—Courtney.
STIATOK BILONG BAIBEL: “Yupela i no ken wokabaut moa long wankain pasin olsem ol man bilong dispela taim i save bihainim. Nogat. Yupela i mas kisim nupela tingting na bai pasin bilong yupela i senis.”—Rom 12:2.
SAMTING YU KEN MEKIM
Tingim yu wanem kain man long nau na yu laik kamap wanem kain man long bihain long rot bilong skelim ol samting yu inap mekim, ol samting yu no inap mekim, na ol samting yu pasim tok long bel long mekim. Gutpela rot bilong mekim olsem, em long bekim ol dispela askim.
Samting yu inap mekim: Mi gat save long mekim wanem samting? Mi inap kamapim wanem ol pasin? (Mi save kamap long taim stret? bosim mi yet? wok hat? mekim gutpela pasin?) Mi save mekim wanem ol gutpela samting?
SAMPELA ROT: Yu hatwok long luksave long ol gutpela pasin bilong yu? Askim papa o mama o wanpela gutpela pren long tokim yu long ol gutpela pasin yu gat na bilong wanem em i tok olsem.
STIATOK BILONG BAIBEL: “Olgeta man wan wan i mas skelim wok bilong ol yet. Na long dispela rot, bai ol i amamas long samting ol yet i mekim, na ol i no ken skelim ol yet wantaim narapela.”—Galesia 6:4.
Samting yu no inap mekim: Mi mas wok strong long senisim wanem pasin? Wanem samting i save kirapim bel bilong mi long mekim pasin i no stret? Mi mas wok strong long bosim mi yet long wanem ol samting?
STIATOK BILONG BAIBEL: “Sapos yumi tok: “Yumi no gat sin,” orait yumi giamanim yumi yet.”—1 Jon 1:8.
Samting yu pasim tok long bel: Mi bihainim wanem stretpela lo, na bilong wanem? Mi bilip long God? Wanem samting i strongim bilip bilong mi olsem God i stap? Mi tingim wanem ol pasin i no stret, na bilong wanem? Mi bilip long wanem samting bai kamap bihain?
STIATOK BILONG BAIBEL: “Pasin bilong tingting gut bai i banisim yu na gutpela save bai i was long yu.”—Sindaun 2:11.
