SOO-JEONG em wanpela haiskul tisa long Saut Korea, em i yusim ol vidio long Web-sait jw.org bilong skulim ol pikinini long klas bilong em. Em i tok: “Taim ol i lukim vidio, What’s a Real Friend?, olgeta i amamas tru! Bihain long ol i lukim dispela vidio, ol i tok, ‘Nau mi save hau mi ken stap gutpela pren. Mi kisim nupela save!’ Sampela i tok sapos ol i laik kisim edvais, ol bai go long dispela Web-sait. Mi tokim planti tisa long yusim dispela vidio, na ol i amamas tru long yusim olkain gutpela vidio long skulim ol pikinini.”

Narapela vidio em planti sumatin long Saut Korea i kisim helpim long en, em waitbod piksa Yu Ken Sakim Ol Buli na Yu No Ken Pait. Wanpela tisa husat i wok wantaim lain Juvenile Violence Prevention Foundation i bin soim dispela vidio long ol sumatin bilong em. Em i tok: “Planti yangpela i laikim tru dispela vidio, long wanem, i gat ol naispela piksa. Na tu, vidio i stori long rot bilong karim ol hevi taim wanpela i laik pait long yu, na samting yu ken mekim bilong abrusim dispela hevi.” Lain Juvenile Violence Prevention Foundation i askim sapos ol i ken yusim dispela vidio long taim ol i skulim ol sumatin, na ol skul i tok orait long dispela. Olsem na planti taim ol i pilaim ol vidio long ol praimeri skul na elementri skul. Na ol polis tu i yusim ol vidio i stap long jw.org.

Sapos yu no bin go long dispela Web-sait yet, i gutpela yu mekim olsem. Em isi tru long yusim, na yu ken kisim fri daunlod bilong Baibel, ol buk na nius bilong Baibel, na ol vidio na odio rekoding.