Stretpela Save Long Samting Bai Kamap Bihain
Olsem wanem? Sampela taim yu laik save long wanem samting bai kamap long bihain? Baibel i tok klostu nau wanpela bikpela samting bai kamap na dispela bai senisim i stap bilong ol manmeri long graun.
Jisas i stori long hau yumi inap “save olsem Kingdom Bilong God i kam klostu.” (Luk 21:31) Em i tok profet olsem, planti samting bai kamap, bai i gat ol bikpela pait, bikpela guria, bikpela hangre, na ol bikpela sik—em ol hevi yumi lukim long nau.—Luk 21:10-17.
Na tu, Baibel i tok long taim bilong “las de” bilong wok bos bilong ol man pasin bilong ol man bai go nogut, o yumi ken tok, i go nogut moa. Yu ken ritim dispela tok long 2 Timoti 3:1-5. Taim yu lukim ol pasin na ol samting ol man i mekim long nau, yu bai wanbel olsem dispela tok profet i stret long ol samting i wok long kamap long nau.
Dispela i makim wanem samting? Taim bilong Kingdom Bilong God i klostu nau na dispela bai mekim bikpela senis na laip long graun bai kamap gutpela moa. (Luk 21:36) Long Baibel, God i tok promis long ol gutpela samting bai kamap long graun na long ol man bai stap long graun. Em sampela eksampel.
GUTPELA WOK BOS
“Na em [Jisas] i kisim wok bos, ona, na wanpela kingdom, olsem bai ol manmeri bilong narapela narapela kantri na tok ples i ken stap aninit long em. Wok bos bilong em i bilong oltaim oltaim na i no inap pinis, na kingdom bilong em i no inap bagarap.”—DANIEL 7:14.
Dispela i makim olsem: Yu inap enjoim laip aninit long nambawan gavman bilong graun olgeta em God i kamapim na Pikinini bilong em i stap olsem King.
GUTPELA HELT
“No gat wanpela man i stap long dispela ples bai tok: ‘Mi sik.’”—AISAIA 33:24.
Dispela i makim olsem: Yu no inap sik o paralais; bai yu stap laip oltaim na yu no inap dai.
BEL ISI TRU
“Em i save mekim i dai ol pait i kamap long olgeta hap bilong graun.”—BUK SONG 46:9.
Dispela i makim olsem: Bai yumi no inap pret moa long pait na ol pen na hevi pait i save kamapim.
GRAUN BAI PULAP LONG OL GUTPELA MAN
“Bai ol man nogut i no stap moa . . . ol man i gat pasin daun, ol bai kisim graun olgeta.”—BUK SONG 37:10, 11.
Dispela i makim olsem: Bai i no gat ol man nogut moa, ol man i amamas long bihainim tok bilong God ol tasol bai stap.
GRAUN OLGETA BAI KAMAP PARADAIS
“Ol bai wokim ol haus na stap long ol, na ol bai planim ol gaden wain na kaikai prut bilong ol.”—AISAIA 65:21, 22.
Dispela i makim olsem: Graun olgeta bai kamap naispela tru. God bai inapim prea bilong yumi olsem laik bilong em i mas kamap “long graun.”—Matyu 6:10.
