1, 2. (a) Olsem wanem Jehova i save mekim isi bel bilong yumi long taim bilong hevi? (b) Baibel i mekim wanem gutpela tok bilong mekim isi bel bilong yumi?

WANPELA singel brata, em yumi bai kolim Eduardo, em i kamapim tingting bilong em long Stephen em wanpela elda husat i gat bikpela krismas na em i marit. Eduardo i tingim tok bilong 1 Korin 7:28, em i tok: “Ol manmeri i marit ol bai karim pen na hevi long bodi bilong ol.” Eduardo i askim Stephen, “Dispela tok ‘pen na hevi’ i makim wanem samting? Olsem wanem mi inap karim ol dispela hevi sapos mi marit?” Paslain long Stephen i bekim dispela askim, em i tokim Eduardo long skelim tok bilong aposel Pol. Em i tok, Jehova em i “God bilong mekim isi bel bilong ol man long olgeta kain taim. Long olgeta pen na hevi i kamap long yumi, em i save mekim isi bel bilong yumi.”—2 Kor. 1:3, 4.

² Tru tumas, Jehova em i gutpela Papa husat i save mekim isi bel bilong yumi taim yumi karim hevi. Ating yu yet i luksave  long olsem wanem God i bin helpim na stiaim yu long rot bilong tok bilong em long Baibel. Yumi ken bilip tru olsem God i laik bai yumi stap gut, wankain olsem em i mekim long ol wokman bilong em long pastaim.—Ritim Jeremaia 29:11, 12.

3. Yumi bai skelim wanem ol askim?

³ Yumi inap karim ol hevi sapos yumi kliagut long as na ol hevi painim yumi. Dispela samting inap kamap long ol lain i marit, na tu, insait long famili. Orait, taim Pol i tok long “pen na hevi long bodi,” dispela i makim wanem samting? Wanem sampela eksampel long taim bilong ol man i raitim Baibel na long taim bilong yumi inap mekim isi bel bilong yumi? Taim yumi kisim save long bekim bilong ol dispela askim, dispela bai helpim yumi long karim hevi.

4, 5. Wanem samting inap kamap na ol marit bai karim “pen na hevi long bodi”?

⁴ Taim God i wokim fes man na meri, em i tok: “Man i save lusim papamama na i pas wantaim meri bilong en, na tupela i kamap wanpela bodi tasol.” (Stt. 2:24) Jehova i mekim dispela tok taim em i kamapim namba 1 marit. Yumi no gutpela olgeta, olsem na taim yumi marit na i gat famili, yumi save bungim ol hevi. (Rom 3:23) Taim man na meri i marit, meri i mas i stap aninit long man bilong em, na i no long papamama bilong em. God i tok man i mas i stap het bilong meri bilong em. (1 Kor. 11:3) Sampela nupela marit i pilim olsem i hatwok long mekim olsem. Baibel i tok, meri i mas daun long man bilong em na i no long papamama bilong em. Na tu, hevi inap kamap insait long marit sapos man o meri marit i no pas gut wantaim ol tambu lain bilong em.

⁵ Olgeta lain husat i marit inap tingting planti taim pikinini i kamap. Em tru olsem ol bai amamas, tasol ol bai tingting planti tu long ol samting inap kamap long helt bilong meri taim em i gat bel na taim em i karim pikinini. Na tu, ol bai skelim olsem wanem ol inap seivim mani bilong lukautim pikinini long sait bilong kaikai, klos, na skulfi samting. Taim nupela bebi i kamap, ol i mas mekim sampela senis long sindaun bilong ol. Ating meri marit bai lusim bikpela haptaim long lukautim pikinini, olsem na man marit bai pilim olsem meri bilong em i no tingim em moa. Na tu, man marit bai i gat ol wok em i mas lain long mekim. Em bai gat bikpela wok moa bikos nau em i mas lukautim meri na pikinini bilong em.

6-8. Sapos meri i no inap karim pikinini, olsem wanem dispela inap mekim em i bel hevi?

⁶ I gat narapela hevi tu i save painim ol marit. Sampela marit i laik tru long i gat pikinini, tasol ol i no inap long kamapim pikinini. Taim meri i no kisim bel, em inap bel hevi tru. Maski yumi marit na yumi gat pikinini, o yumi gat laik long kamapim pikinini tasol yumi no inap, ol dispela samting inap givim “pen na hevi long bodi.” (Snd. 13:12) Long taim bilong ol man i raitim Baibel, sapos meri i no gat pikinini dispela i save givim sem long em. Resel em meri bilong Jekop na em i no inap karim pikinini. Olsem na em i bel hevi tru taim em i lukim sista bilong em i gat ol pikinini. (Stt. 30:1, 2) Ol misineri husat i stap long ol kantri we ol man i gat pasin bilong karim planti pikinini, planti taim ol asples i askim ol misineri long risen na ol i no gat pikinini. Maski ol i givim gutpela risen, ol asples i save tok, “Mipela bai beten bilong helpim yupela!”

⁷ Tingim wanpela sista long Inglan, em i laik tru long i gat wanpela pikinini, tasol em i no inap karim pikinini. Dispela i mekim em i bel hevi tru bikos em i luksave olsem  em i no inap moa long karim pikinini. Olsem na em na man bilong em i adoptim wanpela pikinini. Em i tok: “Maski mipela i adoptim pikinini, mi bel hevi yet bikos dispela i no wankain long taim meri i karim pikinini bilong em yet.”

⁸ Baibel i stori olsem “wok bilong karim pikinini bai helpim ol meri long stap gut.” (1 Tim. 2:15) Dispela i no makim olsem meri i mas karim pikinini bambai em inap kisim laip oltaim, nogat. Taim meri i gat pikinini, em bai bisi long lukautim famili bilong em, na em i no gat taim bilong tok baksait long ol narapela o subim nus long hevi bilong ol. (1 Tim. 5:13) Maski i olsem, em bai karim yet ol hevi i kamap insait long marit na long famili.

9. Taim poroman marit i dai, olsem wanem dispela em wanpela bikpela hevi?

⁹ Ol marit bai bungim planti hevi. Wanpela bikpela hevi em planti marit i karim em hevi bilong poroman marit i dai. Ating ol i no bin ting olsem dispela kain hevi bai painim ol. Ol Kristen i bilip strong long tok promis bilong Jisas long kirapim bek ol man i dai pinis. (Jon 5:28, 29) Ol lain em poroman marit bilong ol i dai, ol i pilim olsem wanem long dispela tok promis? Dispela tok i mekim gut bel bilong ol. Gutpela Papa bilong yumi i yusim ol tok long Baibel bilong strongim na mekim gut bel bilong ol lain i karim hevi. Orait nau yumi ken skelim sampela eksampel bilong ol wokman bilong Jehova husat i kisim helpim long Em na karim hevi.

10. Olsem wanem Hana i kisim bel isi? (Lukim piksa long kirap bilong stadi.)

¹⁰ Hana em gutpela meri bilong Elkana, na em i no inap karim pikinini. Tasol narapela meri bilong Elkana, em Penina, em i karim ol pikinini. (Ritim 1 Samuel 1:4-7.) Inap “planti yia,” Penina i save tok bilas long Hana. Dispela i mekim na Hana i pilim nogut tru. Olsem na em i beten askim Jehova long givim bel isi long em. Olsem Baibel i tok, em i “beten longpela taim long Bikpela.” Olsem wanem? Yu ting Hana i bilip olsem Jehova bai bekim beten bilong em? Yumi ken ting olsem. Baibel i tok “bihain em i no moa bel hevi.” (1 Sml. 1:12, 17, 18) Hana i bilip tru olsem Jehova bai helpim em long karim pikinini o Em bai helpim em long kisim bel isi long narapela rot.

11. Olsem wanem beten inap helpim yumi long kisim bel isi?

¹¹ Yumi gat sin na yumi stap long graun em Satan i bosim, olsem na yumi bai karim yet ol pen na hevi long nau. (1 Jon 5:19) Yumi amamas tru long save olsem Jehova em i “God bilong mekim isi bel bilong ol man”! Beten em wanpela rot we inap helpim yumi long kisim bel isi. Long rot bilong beten, Hana i kamapim bel hevi bilong em long Jehova. Olsem tasol, taim yumi karim hevi yumi mas tokim Jehova long tingting na filings bilong yumi. Yumi mas kamapim ol askim bilong yumi na tokim em long tingting tru i stap long bel bilong yumi.—Fili. 4:6, 7.

12. Wanem samting i helpim wido meri Ana long i stap amamas?

¹² Yumi inap kisim bel isi maski yumi no gat pikinini o wanpela yumi laikim tru i dai. Long taim bilong Jisas, man bilong profet meri Ana i dai bihain long tupela i marit inap 7-pela yia. Baibel i no stori olsem ol i gat pikinini. Taim Ana i gat 84 krismas, em i wok yet long mekim wanem? Luk 2:37 i tok: “Em i save go long tempel long olgeta taim, na long san na long nait em i save lotuim God, em i save tambu long kaikai na beten strong.” Ana i lotuim Jehova, olsem na em i kisim bel isi na em i stap amamas.

13. Stori long olsem wanem ol gutpela pren inap mekim isi bel bilong narapela narapela taim ol wanfamili i no mekim olsem.

¹³ Taim yumi bung wantaim ol bratasista, yumi inap painim ol gutpela pren na pas gut wantaim ol. (Snd. 18:24) Taim Paula i gat 5-pela krismas, Mama i lusim tok i tru na dispela i mekim em i bel hevi tru. Em i karim dispela hevi inap sampela haptaim. Ann em wanpela painia sista insait long kongrigesen, na em i bin strongim Paula na helpim em long stap strong yet long bilip. Paula i tok: “Maski em i no wanfamili bilong mi, mi pilim tru pasin laikim em i kamapim. Dispela i helpim mi long mekim yet wok bilong Jehova.” Nau Paula i amamas tru olsem em na Mama inap wok wantaim long mekim ol wok lotu long kongrigesen bilong ol. Ann tu i amamas bikos em i stap olsem mama bilong Paula long sait bilong bilip.

14. Ol lain i mekim isi bel bilong ol narapela i kisim wanem ol blesing?

¹⁴ Taim yumi soim pasin laikim long ol narapela, dispela inap daunim sampela bel hevi bilong yumi yet. Maski ol sista i marit o ol i stap singel, ol i save olsem ol bai kisim bikpela amamas taim ol i stap olsem ol wanwok bilong God na autim gutnius. Ol i mekim laik bilong God bikos ol i laik givim biknem long em. Sampela i pilim olsem wok autim tok i helpim ol long daunim bel hevi. Taim yumi soim olsem yumi tingim ol  manmeri long teritori na ol narapela insait long kongrigesen, dispela bai strongim pasin bilong kongrigesen long pas gut wantaim. (Fili. 2:4) Aposel Pol i stap gutpela eksampel. Em i tingim tru ol Kristen long Tesalonaika “olsem wanpela mama i tingim tru pikinini bilong en.” Na tu, em i stap olsem papa bilong ol long sait bilong bilip.—Ritim 1 Tesalonaika 2:7, 11, 12.

15. Em wok bilong husat long skulim ol pikinini long tok i tru?

¹⁵ Yumi olgeta i gat wok long helpim na mekim isi bel bilong ol narapela famili. Sampela taim, ol nupela pablisa i save askim ol pablisa i stap strong long bilip long helpim ol long skulim ol pikinini bilong ol long tok i tru, o stadi wantaim ol pikinini long Baibel. Tasol Baibel i tok olsem namba 1 wok bilong papamama em bilong skulim ol pikinini. (Snd. 23:22; Efe. 6:1-4) Sampela taim i gutpela long kisim helpim long ol narapela. Dispela i no makim olsem papamama i no gat wok moa long skulim ol pikinini, nogat. Em i bikpela samting long oltaim papamama i mas toktok gut wantaim ol pikinini.

16. Sapos wanpela Witnes i helpim ol pikinini long sait bilong bilip, em i mas tingim wanem samting?

¹⁶ Sapos papamama i larim ol bratasista i stadi wantaim ol pikinini, orait ol dispela bratasista i no ken mekim ol samting i soim olsem ol i kisim ples bilong papamama. Sampela taim wanpela Witnes bai stadi wantaim ol pikinini em papamama bilong ol i no laikim tok i tru. Dispela Witnes i mas tingim olsem taim em i helpim pikinini long sait bilong bilip, dispela i no makim olsem em i kamap papa o mama bilong em. I gutpela long ol i mekim stadi long haus bilong pikinini taim papamama i stap, o taim wanpela Kristen husat i stap strong long bilip i stap wantaim ol, o ol i ken stadi long wanpela hap em planti man i stap long en. Long dispela rot, papamama bai no gat tok long wok em Witnes i mekim bilong skulim pikinini. Na tu, dispela Witnes i mas holim tingting olsem sapos rot i op long bihain, papamama bai mekim wok em God i givim ol long skulim pikinini long sait bilong bilip.

17. Olsem wanem ol pikinini inap mekim isi bel bilong ol wanfamili?

¹⁷ Ol yangpela husat i kisim pasin bilong laikim God na bihainim ol tok bilong em, ol inap helpim famili long i stap bel isi. Ol i ken mekim olsem taim ol i soim rispek long papamama na helpim ol long sait bilong kaikai na klos samting. Na tu, ol inap helpim famili long sait bilong bilip. Paslain long Bikpela Tait, Lamek em tumbuna bilong Set, em i lotuim Jehova. Lamek i mekim dispela tok long pikinini man bilong em Noa, em i tok: “Dispela pikinini bai i mekim kaikai i kamap long graun na bai yumi malolo liklik long hatwok bilong yumi.” Dispela tok profet i kamap tru taim God i tokaut olsem em i no inap bagarapim graun gen. (Stt. 5:29; 8:21) Ol pikinini husat i laikim tok i tru, ol inap mekim isi bel bilong ol wanfamili, na helpim ol long sanap strong na karim ol hevi bilong nau na abrusim Armagedon.

18. Wanem samting bai helpim yumi long sanap strong na karim ol hevi?

¹⁸ Planti milion manmeri i beten, tingim tingim ol gutpela eksampel bilong Baibel, na bung wantaim ol man i lotuim Jehova, na dispela i helpim ol long kisim bel isi long taim bilong hevi. (Ritim Song 145:18, 19.) Taim yumi save olsem Jehova i save givim bel isi i stap oltaim, dispela bai helpim yumi long sanap strong na karim ol hevi i painim yumi long nau na long bihain.