Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. Wanem mining bilong baptais Kristen?

Taim man i baptais em i kamapim olsem em i laik pas gut wantaim God. Olsem na Kristen i no ken baptais taim em i bebi yet, nogat, em i mas kisim baptais taim em i bikpela pinis na em i ken kisim save long God na kamap disaipel bilong Jisas. (Aposel 8:12; 1 Pita 3:21) Yumi kamap disaipel bilong Jisas taim yumi kisim save long ol lo bilong em na bihainim.—Ritim Matyu 28:19, 20.

Long taim bilong ol aposel bilong Jisas, planti manmeri i kirap kwik long kisim save long God na long Jisas. Olsem, taim wanpela man i bin kisim save olsem indai bilong Jisas i opim rot long God i ken kisim bek ol man, wantu em i kamap disaipel. Long nau, planti manmeri i gat gutpela bel ol i kamap disaipel bilong Jisas.—Ritim Aposel 8:26-31, 35-38.

2. Bilong wanem Jisas i kisim baptais?

Jisas i gat 30 krismas taim Jon Bilong Baptais i putim em i go insait olgeta long wara Jordan bilong baptaisim em. Baptais bilong Jisas i makim disisen bilong em long mekim ol samting God i laik em i mas mekim. (Hibru 10:7) Olsem Mesaia, em bai givim tu laip bilong em olsem ofa bilong baim bek sin bilong ol manmeri. Taim Jisas i stap yet long heven paslain long em i kam daun long graun, oltaim em i save laikim tru Papa bilong em, Jehova, na bihainim tok bilong em.—Ritim Mak 1:9-11; Jon 8:29; 17:5.

  3. I gat wanem as na Kristen i mas kisim baptais?

Yumi no wankain long Jisas—yumi gat sin pinis taim mama i karim yumi. Tasol indai bilong Jisas olsem ofa i opim rot long yumi bambai yumi inap pas gut wantaim God. (Rom 5:10, 12; 12:1, 2) Rot i op long yumi inap stap insait long famili bilong God. (2 Korin 6:18) Yumi mas mekim wanem bilong stap insait long famili bilong em? Long rot bilong beten yumi dediket long Jehova, olsem yumi tok promis long mekim laik bilong em long laip olgeta bilong yumi. Taim yumi dediket pinis, orait yumi kisim baptais long ai bilong ol man bilong soim olsem yumi dediket.—Ritim Matyu 16:24; 1 Pita 4:2.

4. Olsem wanem yumi ken redi long kisim baptais?

Ol Witnes Bilong Jehova i save amamas long stadi long Baibel wantaim olgeta man husat i laik i go klostu long God. Pasin bilong stadi long Baibel na go long ol miting Kristen bai strongim bilip bilong yu na pasin bilong yu long laikim tru God. Na tu, em bai helpim yu long kisim stretpela tingting na ol gutpela pasin. Taim yu wok long kisim pasin laikim, bilip, na sampela narapela pasin bilong God, dispela bai helpim yu long truim promis bilong yu long mekim wok bilong Jehova inap oltaim oltaim.—Ritim Jon 17:3; Hibru 10:24, 25.

Bilong kisim sampela save moa, lukim sapta 18 bilong dispela buk em ol Witnes Bilong Jehova i wokim. Tru Tru Baibel i Tok Wanem?