Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. Ol ensel ol i husat?

Ol ensel ol i spirit na ol i stap long heven. Laip bilong ol i winim laip bilong ol man. God tru em i wanpela spirit na em i bin wokim ol ensel paslain long em i wokim graun. (Jop 38:4, 7; Matyu 18:10) Planti milion ensel i stap daun long Jehova na ol i stap raunim sia king bilong em.—Ritim Song 103:20, 21; Daniel 7:9, 10.

2. Yu ting ol ensel i save helpim ol man?

Ol ensel i bin helpim wanpela stretpela man, nem bilong em Lot. Em i stap long wanpela taun em God i tingting pinis long bagarapim, long wanem, ol manmeri i mekim planti pasin nogut. Tupela ensel i go toksave long Lot na famili bilong em long ranawe. Sampela man i ting dispela tok lukaut em wanpela tok pilai, olsem na ol i no bihainim. Tasol Lot na tupela pikinini meri bilong em i abrusim bagarap, long wanem, ol i bihainim tok lukaut em God i bin givim ol long rot bilong ol ensel.—Ritim Stat 19:1, 13-17, 26.

Baibel i tok, long nau ol ensel i wok long helpim na stiaim wok bilong ol man husat i autim gutnius bilong Kingdom Bilong God. (Matyu 24:14) Dispela gutnius i kamapim tu wanpela tok lukaut. Wankain olsem tok lukaut em ol ensel i bin givim long Lot, dispela tok lukaut long nau em i no wanpela tok pilai. God yet i givim dispela tok lukaut long rot bilong ol ensel.—Ritim Revelesen 1:1; 14:6, 7.

God inap yusim ol ensel long strongim yumi taim yumi bungim ol hevi. Em i bin yusim wanpela ensel long strongim Jisas.—Ritim Luk 22:41-43.

Klostu nau God bai yusim ol ensel long mekim narapela wok, em long bagarapim ol man nogut em ol i as bilong pen na hevi. Dispela bai helpim tru sindaun bilong ol man.—Ritim 2 Tesalonaika 1:6-8.

  3. Ol spirit nogut i save mekim wanem long yumi?

Planti manmeri long graun i bin sakim tok bilong God, na long heven tu, planti ensel i bin bikhet na sakim tok bilong God. (2 Pita 2:4) Ol dispela ensel husat i bin sakim tok em ol spirit nogut. Hetman bilong ol em Satan, narapela nem bilong em Devil. Satan na ol spirit nogut i wok long giamanim ol manmeri.—Ritim Revelesen 12:9.

Satan i yusim ol bisnis nogut, ol gavman bilong graun, na ol lotu giaman long stiaim ol man na bai ol i no tingim God. Satan i as bilong pasin i no stret, pait, na ol pen na hevi i painim ol man long nau.—Ritim 1 Jon 5:19.

4. Olsem wanem ol spirit nogut i save giamanim ol manmeri?

Satan i bin giamanim planti man long rot bilong skulim ol olsem ol daiman i save kamap spirit na ol inap toktok wantaim ol manmeri i stap laip. Tasol Baibel i skulim ol man olsem ol daiman i no inap tru long mekim wanpela samting. (Saveman 9:4, 5) Planti taim ol spirit nogut i save giamanim ol man taim ol i bihainim nek bilong ol wanblut o pren bilong ol i dai pinis. (Aisaia 8:19) Ol spirit nogut i save giamanim ol manmeri long rot bilong ol glasman na pasin bilong glasim ol sta samting. Baibel i tok lukaut long yumi mas abrusim olgeta dispela pasin. Olsem na yumi mas rausim olgeta kain samting we inap helpim wok bilong ol spirit nogut.—Ritim Lo 18:10, 11; Aposel 19:19.

Sapos yumi laikim tru Jehova, i no gat wok long yumi pret long ol spirit nogut. Taim yumi stadi long Baibel na bihainim tok bilong en, yumi sakim Satan na yumi go klostu long God. Jehova i gat bikpela strong moa winim strong bilong ol spirit nogut. Ol gutpela ensel bilong God inap strongim yumi long taim yumi nidim helpim.—Ritim Song 34:7; Jems 4:7, 8.

Bilong kisim sampela save moa, lukim sapta 10 bilong dispela buk em ol Witnes Bilong Jehova i wokim. Tru Tru Baibel i Tok Wanem?