BAIBEL i tok: “I no gat wanpela man i bin lukim God long wanpela taim.” (Jon 1:18) God i lait tumas, olsem na i no gat wanpela man inap lukim em na i stap laip yet. (Kisim Bek 33:20) Tasol Baibel i stori olsem sampela taim Jehova i save givim visen long sampela man na ol i lukim heven. Wanpela man olsem em profet Daniel. Samting em i lukim i kirapim em long givim bikpela ona na rispek long God na i mas kirapim yumi tu long mekim olsem. Ritim stori bilong samting Daniel i bin lukim long dispela visen. a—Ritim Daniel 7:9, 10.

“Man Bilong Bipo Bipo Yet.” Dispela biknem “Man Bilong Bipo Bipo Yet,” em Daniel wanpela tasol i bin kolim, i makim “man i gat bikpela krismas tru.” (Daniel 7:9, 13, 22) Olsem wanem Jehova i gat bikpela krismas tru? Em i “King bilong oltaim oltaim,” na em i bin stap oltaim long bipo yet na i go inap long oltaim bihain em bai stap. (1 Timoti 1:17; Jut 25) God i stap oltaim na dispela i strongim yumi olsem em i gat olgeta gutpela tingting na save, long wanem, Baibel i tok ol lapun i gat gutpela tingting na save. (Jop 12:12) Yumi ol man i save stap sotpela taim tasol, olsem na i hatwok long kliagut long dispela tingting olsem God i save stap oltaim oltaim. Tasol yu ting yumi mas kliagut long olgeta samting bilong dispela God i gat olgeta savetingting?—Rom 11:33, 34.

Baibel i tok Man Bilong Bipo Bipo Yet i kam “sindaun.” Bilong wanem em i sindaun? Ol ves i stap klostu i kolim ol tok olsem “kot” na “mekim kot,” na dispela i givim sampela tingting long yumi. (Daniel 7:10, 22, 26) Long visen, Jehova i sindaun olsem Jas. Em bai mekim kot long husat? Em bai mekim kot long ol kantri bilong graun em Daniel i bin lukim long driman olsem ol wel animal. b (Daniel 7:1-8) Jehova em i wanem kain Jas?

“Ol klos bilong en i waitpela tru olsem ais, na gras bilong het bilong en i wait moa yet olsem gras bilong sipsip.” Waitpela kala i makim stretpela pasin na pasin i klin tru. Kala tru bilong gras bilong sipsip em waitpela. Olsem na sapos gras bilong man i luk olsem gras bilong sipsip, orait kala bilong gras bilong dispela man em i waitpela. Yu inap piksaim long tingting samting Daniel i lukim? Yu inap lukim long tingting wanpela Jas i gat waitpela gras na i pasim klos i waitpela tru olsem ais? Ol dispela tok piksa i strongim yumi olsem Jehova i save bihainim stretpela pasin na gutpela tingting taim em i mekim kot bilong em. Em i dispela kain Jas we yumi inap bilip na rispek tru long em.

“I gat planti tausen manmeri i mekim wok bilong dispela Man, na planti milion manmeri i sanap klostu long em.” Husat dispela lain i mekim wok long heven? Baibel i tok ol dispela ensel i olsem ol “wokman” bilong God. (Song 104:4) Planti handret milion ensel bilong God i givim bel tru long “bihainim tok bilong en” na “bihainim laik bilong em.” (Song 103:20, 21) Dispela em narapela samting i kamapim klia bikpela savetingting bilong God, a? Tru tumas, Jehova wanpela tasol inap bungim gut kain bikpela lain ami olsem bilong heven na stiaim ol long mekim wok insait long planti milion yia!

Visen bilong Daniel i kirapim yumi long bilip tru long Jehova, em Man Bilong Bipo Bipo Yet. Kot bilong em i stret, na yumi ken bilip tru long savetingting bilong em. I gutpela yu kisim save long olsem wanem yu inap i go klostu moa long dispela God i gat olgeta savetingting.