PLANTI taim Baibel i stori long ol wasman bilong sipsip, kirap long fes buk, Stat, i go inap long laspela buk, Revelesen. (Stat 4:2; Revelesen 7:17) Ol bikman olsem Abraham, Moses, na King Devit, ol i wasman bilong sipsip. Man bilong raitim song, Devit, i stori gut long ol wok na ol wari bilong gutpela wasman bilong sipsip. Na wanpela song em Asap i raitim i tok long Devit em i wasman bilong ol manmeri bilong God long bipo.—Song 78:70-72.

Bihain, long taim bilong Jisas tu, wok bilong lukautim ol sipsip em wanpela bikpela wok. Jisas i kolim em yet olsem “gutpela wasman bilong sipsip” na planti taim em i stori long ol pasin bilong wasman bilong sipsip taim em i skulim ol man long ol bikpela samting. (Jon 10:2-4, 11) Baibel i tok tu olsem Jehova, God i Gat Olgeta Strong, em i olsem wanpela “wasman bilong sipsip.”—Aisaia 40:10, 11; Song 23:1-4.

Wasman bilong sipsip i save lukautim wanem kain ol animal? Wanem ol samting i insait long wok bilong em? Na yumi inap kisim wanem skul long ol dispela man bilong wok strong?

Ol wasman bilong sipsip long Israel bilong bipo, i lukautim wanpela kain sipsip bilong Siria i gat patpela tel na bikpela gras. Ol man sipsip bilong dispela kain sipsip i gat 2-pela kom, na ol meri sipsip, nogat. Ol dispela animal i save stap isi na i no hatwok long stiaim ol, ol i no inap lukautim ol yet long bikpela kol, ren, na ol wel animal.

 Ol wasman bilong sipsip i save lukautim ol meme tu. Gras bilong ol meme i blakpela o braunpela. Taim ol i wokabaut long sait bilong ol maunten i gat ston na kaikai gras samting, ol bus na rop i gat nil i save katim longpela yau bilong ol.

Oltaim wasman bilong sipsip i mas wok strong long skulim ol sipsip na ol meme long harim tok bilong em. Maski i olsem, gutpela wasman bilong sipsip i lukautim gut ol animal na em i givim nem tu long ol na ol animal i save long en.—Jon 10:14, 16.

Long Epril samting, long olgeta de wasman bilong sipsip inap kisim lain sipsip long banis i stap klostu long haus bilong em, na bringim ol i go long gutpela gras i stap klostu long viles. Long dispela taim, ol sipsip na meme i karim ol pikinini na mekim namba bilong ol i go bikpela. Na tu, em taim we ol wokman bai rausim gras bilong sipsip i bin gro long taim bilong kol, na dispela em i taim bilong bikpela amamas!

Ating wanpela asples man i gat sampela sipsip tasol. Olsem na em inap baim wanpela wasman bilong sipsip long bungim dispela liklik sipsip wantaim narapela lain sipsip na lukautim. Ol dispela kain wasman bilong sipsip i gat nem long tingim sipsip bilong ol yet na ol i no tingim tumas sipsip bilong ol narapela.—Jon 10:12, 13.

Taim ol i bungim wit samting long ol gaden klostu long viles, wasman bilong sipsip i larim ol sipsip i go kaikai ol nupela kru bilong wit na wit i bin pundaun long graun. Long taim bilong hot san, ol wasman bilong sipsip i kisim lain sipsip i go kaikai gras long ol ples i antap na i kol liklik. Inap planti de, ol wasman bilong sipsip i save wok na slip ausait, na ol i larim lain sipsip i kaikai gras long sait bilong ol maunten na long nait ol i was long ol sipsip. Sampela taim wasman bilong sipsip inap putim ol sipsip i go slip long keiv long nait, we ol weldok i no ken kisim ol. Sapos singaut bilong weldok i pretim lain sipsip long nait, gutpela nek bilong wasman i mekim ol i stap isi.

Long olgeta nait, wasman bilong sipsip i save kaunim ol sipsip na sekim olsem ol i sik o nogat. Long moning, em bai singautim lain sipsip na ol i bihainim em i go long gutpela gras. (Jon 10:3, 4) Long belo, wasman i bringim lain sipsip i go long ol liklik wara bilong ol i ken dring. Taim ol wara i drai, wasman bilong sipsip i kisim ol i go long hulwara na pulim wara i kam antap na givim long ol.

Long pinis bilong drai sisen, wasman bilong sipsip inap kisim lain sipsip bilong em i go long ol veli na ples daun i stap klostu long nambis. Taim kol ren i kirap long pundaun, em bai kisim ol i go bek long ples na putim ol i go stap insait long haus sipsip long taim bilong kol. Sapos em  i no mekim olsem, ren, ren ais, na sno inap kilim i dai ol sipsip. Kirap long Novemba i go long Mas, ol wasman bilong sipsip i no save bringim ol sipsip i go ausait.

Klos bilong wasman bilong sipsip i strong. Bilong lukautim em long ren na kol bilong nait, em i save werim saket i no gat han em ol i wokim long skin bilong sipsip. Na em i werim siot aninit long saket. Sendol i lukautim lek bilong em long ol ston na nil, na em i pasim het long laplap ol i wokim long wul.

Wasman bilong sipsip i save karim ol dispela tul samting: Beg ol i wokim long skin bilong animal na i gat kaikai long en, olsem bret, oliv, prut ol i draim pinis, na sis, (1); strongpela stik bilong lukautim ol sipsip, longpela inap 1 mita na i gat sap ston long wanpela sait bilong en (2); naip (3); longpela stik, em i helpim wasman long wokabaut na go antap long maunten (4); wara kontena (5); baket ol i wokim long skin bilong animal bilong kisim wara long ol hulwara (6); katapel, wasman i yusim dispela bilong tromoi ston klostu long sipsip o meme husat i go longwe liklik bilong pretim em na bai sipsip i kam bek, o bilong rausim ol wel animal (7); flut ol i wokim long pitpit, wasman i pilaim flut bilong amamasim em yet na bilong mekim isi bel bilong ol sipsip (8).

Wasman i lukautim gut ol sipsip na em inap kisim milk na abus long ol sipsip. Ol i yusim skin bilong sipsip bilong baim ol samting na bilong wokim klos na ol kontena bilong holim wara. Ol i wokim laplap long gras bilong meme, na ol i givim ol sipsip na meme olsem ofa.

Ol gutpela wasman bilong sipsip ol i man bilong wok, mekim gut wok bilong ol, na i no pret. Ol i redi long lusim laip bilong ol bilong lukautim ol sipsip.—1 Samuel 17:34-36.

Olsem na yumi no kirap nogut long Jisas na ol disaipel i tok olsem wasman bilong sipsip i stap gutpela piksa em ol wasman Kristen i ken bihainim. (Jon 21:15-17; Aposel 20:28) Wankain olsem ol gutpela wasman bilong sipsip long taim bilong ol man i bin raitim Baibel, ol wasman bilong kongrigesen long nau i wok strong long ‘lukautim gut ol sipsip bilong God i stap aninit long ol. Ol i no mekim olsem wanpela i subim ol long mekim, nogat, ol i amamas long mekim. Ol i no mekim bilong kisim ol samting bilong helpim ol yet, nogat. Ol i gat bikpela laik long mekim dispela wok.’—1 Pita 5:2.