NOA wantaim famili bilong em i bung klostu long narapela narapela taim bikpela ren tru i wok long pundaun. Piksaim long tingting olsem ol i stap long rum i tudak na i gat liklik lait bilong lam tasol, ai bilong ol i op na ol i wok long harim wara i paitim rup na i paitim strong sait sait bilong sip. Ating pairap bilong en i bikpela tru.

Noa i lukluk long pes bilong famili bilong em—gutpela meri bilong em, 3-pela strongpela pikinini man bilong em wantaim 3-pela meri bilong ol—na bel bilong em i amamas na tenkyu moa yet. Long dispela taim nogut, ating Noa i lukim pes bilong ol manmeri em i laikim tumas ol i stap wantaim em na dispela i mekim gut bel bilong em. Olgeta i stap gut. Yumi save olsem Noa i bungim famili na i mekim beten bilong tenkyu long God, na em i mekim long strongpela nek bambai ol inap harim em, long wanem, pairap bilong ren i bikpela moa.

Noa i gat strongpela bilip tru. Bilip bilong em i mekim na God bilong em, Jehova, i lukautim em wantaim famili bilong em. (Hibru 11:7) Tasol taim ren i stat long pundaun, yu ting ol i no gat wok moa long bilip? Nogat, ol i mas bilip strong bambai ol inap winim ol hevi bilong ol narapela de bihain. Na i wankain tu long yumi ol lain i stap long dispela taim nogut bilong nau. Orait nau yumi ken skelim wanem skul yumi inap kisim long bilip bilong Noa.

Ausait long sip, ren i wok long pundaun “long san na long nait, inap 40 de olgeta.” (Stat 7:4, 11, 12) Wara i wok long tait na i kam antap moa. Noa inap lukim olsem God bilong em, Jehova, i wok long lukautim ol man i gat stretpela pasin na givim strafe long ol man i gat pasin nogut.

Dispela Tait Wara i pasim wanpela pasin bikhet i bin kamap namel long ol ensel. Planti ol i bihainim pasin bilong Satan long tingim em yet tasol, na ol i lusim “ples stret bilong ol” long heven bilong maritim ol meri bilong graun, na ol i kamapim ol pikinini ol i kolim Nefilim. (Jut 6; Stat 6:4) Ating Satan i amamas tru taim em i lukim dispela pasin bikhet i wok long kamap, long wanem, dispela i mekim na ol manmeri em ol nambawan gutpela samting Jehova yet i bin wokim long graun, ol i mekim ol pasin nogut tru.

Tasol taim wara i tait i go bikpela moa, ol bikhetlain ensel i mas lusim skin bilong graun na go bek long ples spirit, na ol i no inap moa tanim na kisim skin bilong ol man. Ol i lusim ol meri pikinini bilong ol i stap na ol i dai long bikpela tait wara wantaim ol narapela man.

Kirap long taim bilong Enok, klostu olsem 700 yia paslain long dispela, Jehova i bin givim tok lukaut long ol manmeri olsem Em bai bagarapim ol man nogut. (Stat 5:24; Jut 14, 15) Kirap long dispela taim, pasin bilong ol man i go nogut moa, ol i bagarapim graun na ol i pulapim graun wantaim olkain pasin bilong pait na bagarapim man. Nau bagarap i painim ol. Yu ting Noa na famili bilong em i amamas long ol dispela lain i kisim bagarap?

Nogat! Na God bilong ol em God bilong marimari, em tu i no amamas. (Esekiel 33:11) Jehova i bin mekim olgeta samting bilong seivim laip bilong planti manmeri. Em i bin tokim Enok long givim tok lukaut long ol man, na em i tokim Noa long wokim bot. Noa wantaim lain bilong em ol i bin taitim bun tru long wokim dispela traipela sip inap planti yia long ai bilong ol man. Na tu, Jehova i bin givim wok long Noa olsem “man bilong tokaut long stretpela pasin.” (2 Pita 2:5) Olsem Enok husat i bin stap paslain long em, Noa i givim tok lukaut long ol man long strafe bilong kot bai painim ol man long graun. Ol i mekim wanem taim ol i harim dispela tok? Jisas i bin stap antap long heven na i lukim ol samting i kamap, na bihain em i tingim bek ol manmeri long taim bilong Noa na i tok: “Ol i no luksave long ol samting i wok  long kamap, i go inap long taim Bikpela Tait i kam na karim ol i go.”—Matyu 24:39.

Tingim Noa na famili bilong em insait long dispela 40 de bihain long taim Jehova i pasim dua bilong sip. Long olgeta de traipela ren i wok long pundaun antap long sip, na ating 8-pela i mekim ol wok bilong olgeta de, olsem lukautim narapela narapela, klinim ol rum, na lukautim ol animal i stap insait long ol banis bilong ol yet. Tasol wantu dispela traipela sip i seksek na i olsem wanpela samting i subim sip i go. Em nau, sip i drip i go! Em i sindaun antap long wara, na wara i wok long go antap na “i litimapim sip” i go antap tru na em i drip i stap antap long wara. (Stat 7:17) Man! Jehova, em God i Gat Olgeta Strong, em i kamapim klia moa yet bikpela pawa bilong em!

Ating Noa i tenkyu tru long Jehova i bin lukautim em wantaim famili bilong em, na tu, long marimari bilong Jehova long yusim ol long givim tok lukaut long ol manmeri husat i bin kisim bagarap. Insait long ol dispela planti yia ol i bin taitim bun na wok strong, na i luk olsem wok bilong ol i lus nating. Ol man i no putim yau liklik! Tingim, ating Noa i gat ol brata, ol susa, na ol kandere em ol i bin stap paslain long Bikpela Tait i kamap, tasol i no gat wanpela i harim tok, ol famili stret bilong em tasol i harim tok bilong em. (Stat 5:30) Orait nau dispela 8-pela manmeri i stap gut insait long sip, na ol i belgut taim ol i tingim bek olgeta taim ol i bin lusim bilong autim tok long ol man na givim rot long ol long abrusim bagarap.

Kirap long taim bilong Noa na i kam inap nau, Jehova i no senis. (Malakai 3:6) Jisas Krais i tok taim bilong yumi long nau i wankain olsem “taim bilong Noa.” (Matyu 24:37) Baibel i makim taim bilong yumi olsem taim bilong bikpela hevi tru, em bai pinis long taim bikpela bagarap i painim ol lain man, na pasin nogut bilong dispela graun. Olsem Noa i bin mekim, long nau lain bilong God i givim tok lukaut long olgeta man i laik harim. Bai yu putim yau long dispela tok lukaut? Sapos yu bilip pinis long dispela tok i tru bilong seivim laip, bai yu tu tokim ol narapela long dispela tok i tru? Noa wantaim famili bilong em i stap olsem gutpela piksa long yumi olgeta.

Sip i drip antap long wara we traipela si i bruk, na ating ol lain insait long sip i harim nois bilong ol plang samting taim wara i sakim sip i go i kam. Yu  ting Noa i tingting planti long traipela si i wok long bruk o long sip i no strong na bai bruk? Nogat. Tru, sampela man long nau i no bilip ol bai tingting planti, tasol Noa i no olsem. Baibel i tok: “Noa i bilip . . . na em i wokim wanpela sip.” (Hibru 11:7) Em i bilip long wanem samting? Jehova i bin mekim wanpela promis, olsem kontrak, long lukautim Noa na ol lain i stap wantaim em na bai ol i abrusim bagarap long Bikpela Tait. (Stat 6:18, 19) Yu ting Man bilong wokim ples antap, graun, na olgeta samting i stap laip long en inap lukautim dispela sip na em i no ken bagarap? Em inap tru long mekim olsem! I stret Noa i bilip olsem Jehova bai bihainim tok promis bilong Em. Na tru tumas, Noa wantaim famili bilong em i stap gut na “wara i no bagarapim ol.”—1 Pita 3:20.

Bihain long 40 san na 40 nait i go pinis, ren i pinis. Long kalenda bilong yumi, em Disemba bilong yia 2370 B.C.E. Tasol famili bilong Noa i stap insait yet long sip. Sip i gat ol animal samting i pulap long en, na em wanpela tasol i drip long bikpela solwara antap tru long het bilong ol maunten. (Stat 7:19, 20) Yumi ken piksaim Noa i stretim tok wantaim ol pikinini man bilong em, Siem, Ham, na Jafet na ol i mekim bikpela wok bilong givim kaikai long ol animal na klinim ples bambai ol animal i stap klin na i no gat sik. Dispela God husat i bin mekim ol wel animal samting bilong bus i stap isi na go insait long sip, em inap mekim ol i stap olsem inap long Tait Wara i pinis. a

I luk olsem Noa i bin raitim gut stori bilong olgeta samting i bin kamap. Dispela rait i tokim yumi long wanem taim stret ren i stat long pundaun na wanem taim ren i pinis. Na i tok tu olsem tait wara i bin karamapim graun inap long 150 de. Bihain wara i wok long slek. Orait long wanpela de sip i pas isi isi long “ples maunten bilong Ararat” i stap long hap nau ol i kolim Teki. Em long mun Epril bilong yia 2369 B.C.E. Inap 73 de bihain, olsem long Jun, ol inap lukim het bilong ol maunten. Tripela mun bihain, long Septemba, Noa i rausim wanpela hap rup bilong sip. Em i bikpela wok, tasol i gat gutpela lait na kolwin i kam insait. Paslain long dispela, Noa i laik painimaut olsem graun na ol samting ausait i gutpela long ol i ken stap long en o nogat. Olsem na em i lusim wanpela kotkot i go, na em i raun na flai i kam bek na i go raun gen, na ating sampela taim em i kam malolo antap long sip. Bihain Noa i lusim wanpela pisin balus, na em i wok long kam bek long Noa inap long em i painim pinis diwai bilong sindaun long en.—Stat 7:24–8:13.

Long olgeta taim, Noa i tingim tru ol samting bilong God. Yumi ken piksaim long tingting olsem famili i bung long olgeta de bilong beten na toktok long Papa bilong ol long heven long em i bin lukautim gut ol. Noa i larim Jehova i stiaim em long olgeta bikpela disisen em i mekim. Maski Noa i lukim graun i “drai olgeta,” na em i stap long sip winim wanpela yia pinis, em yet i no opim dua na bringim famili na ol animal samting i go ausait, nogat. (Stat 8:14) Em i wetim tok bilong Jehova!

Ol het bilong famili long nau ol inap kisim gutpela skul long pasin bilong dispela bilipman. Em i man bilong stretim gut ol samting, wok strong, i no les kwik, na em i lukautim gut olgeta i stap aninit long em. Tasol bikpela samting tru, em i putim laik bilong God Jehova i go pas long olgeta narapela samting. Sapos yumi bihainim bilip bilong Noa long ol dispela samting, famili bilong yumi bai kisim ol gutpela blesing tru.

Orait nau Noa i kisim tok i kam long Jehova. Em i tokim Noa: “Yu lusim sip na yu go daun wantaim meri bilong yu na ol pikinini bilong yu wantaim ol meri bilong ol.” Famili i bihainim tok na ol i go pas na ol animal i bihainim ol. Ol i go olsem wanem? Ol i longlong na ran nabaut nabaut i go? Nogat! Baibel i tok: “Ol kain kain animal na ol pisin i bung long lain bilong ol yet, na i lusim sip na i go daun.” (Stat 8:15-19) Noa wantaim famili bilong em i go ausait pinis na ol i pulim klinpela win bilong maunten, na ol i lukluk i go long ples maunten bilong Ararat na ol i lukim klinpela graun. I no gat moa ol Nefilim, pasin pait, ol bikhetlain ensel, na olgeta manmeri nogut bilong dispela taim! b Ol i gat rot long kamapim ol nupela lain man.

Noa i save long samting em i mas mekim. Em i kirap long lotu. Em i wokim wanpela alta na kisim sampela animal God i tok ol i klin—em ol i bin kisim ‘7-pela  7-pela’ i go insait long sip—na em i kukim long paia na givim olsem ofa long Jehova. (Stat 7:2; 8:20) Yu ting Jehova i amamas long lotu Noa i mekim?

Baibel i bekim gutpela tok olsem: “Bikpela i smelim switpela smel bilong dispela ofa.” Bipo God i bel hevi tru taim em i lukim ol man i pulimapim graun long pasin bilong pait na bagarapim man, tasol nau em i belgut na amamas long lukim wanpela famili long graun i lotuim em na ol i tingting strong long mekim laik bilong em. Jehova i no ting ol i mas i stap olsem man i stretpela olgeta. Dispela ves i tok moa: “Stat long taim ol manmeri i yangpela yet ol i save tingting long mekim ol pasin nogut.” (Stat 8:21) Jehova i mekim sampela tok moa i kamapim pasin bilong isi na pasin sori bilong em long ol man.

God i tekewe strongpela tok em i mekim bilong bagarapim graun. Taim Adam na Iv i bin mekim pasin bikhet, God i mekim tok bilong bagarapim graun, olsem na ol man i hatwok stret long wokim gaden na kamapim kaikai. Papa bilong Noa, em Lamek, em i kolim pikinini bilong em Noa, ating nem i makim “Malolo,” o “Mekim Gut Bel” na em i tok profet olsem pikinini bilong em bai bringim ol man i go long taim we i no gat hevi moa bilong wokim gaden. Ating Noa i amamas tru taim em i kisim save olsem em bai lukim dispela tok profet i kamap tru, na taim ol man i wokim gaden, kaikai bai kamap gut. Olsem na i no longtaim Noa i kamap fama!—Stat 3:17, 18; 5:28, 29; 9:20.

Long dispela taim yet, Jehova i givim ol tumbuna pikinini bilong Noa sampela lo i klia tru bilong soim rot long ol na wanpela i olsem, i tambu long kilim man i dai na long mekim wok nogut long blut. Na God i mekim kontrak wantaim ol man bilong graun na em i tok promis long em i no ken salim gen bikpela tait wara bilong bagarapim olgeta samting i gat laip long graun. Bilong kamapim klia olsem em bai truim tok bilong em, Jehova i kamapim wanpela mak long skai i narapela kain tru na em i fes taim bilong ol man long lukim—em renbo. I kam inap long nau, olgeta renbo yumi lukim i mas kirapim yumi long tingim bek gutpela tok promis bilong Jehova.—Stat 9:1-17.

Sapos stori bilong Noa em wanpela stori nating tasol, ating stori bai pinis long dispela renbo. Tasol Noa em i wanpela man tru tru, na i stap bilong em i bin gat hatwok tu long en. Long dispela taim bipo ol man i save stap laip longpela taim, na dispela gutpela bilipman i stap laip inap 350 yia moa, na insait long ol dispela yia em i karim planti pen na hevi. Em i mekim wanpela bikpela pasin kranki taim em i no bosim gut em yet na em i dring spak, tasol dispela rong i go bikpela taim tumbuna pikinini bilong em Kenan i mekim wanpela rong i bikpela moa—em rong we i kamapim bikpela hevi tru long famili bilong Kenan. Noa i stap laip longpela taim na em i lukim ol tumbuna pikinini bilong em i mekim olkain sin olsem lotuim ol god giaman, na pait na bagarapim man long taim bilong Nimrot. Tasol i gat gutpela samting tu—Noa i lukim pikinini bilong em Siem i stap gutpela piksa tru bilong famili bilong em long pasin bilong bilip.—Stat 9:21-28; 10:8-11; 11:1-11.

Olsem Noa, yumi tu i mas bihainim pasin bilong bilip, maski wanem ol hevi i painim yumi. Sapos ol narapela i givim baksait long God tru, o sampela i lusim wok bilong em, orait yumi mas bihainim yet stretpela rot olsem Noa i bin mekim. Jehova i save tingim tru ol man i stap gut long em na ol i karim hevi na sanap strong. Olsem Jisas Krais i bin tok: “Man i sanap strong i go inap long pinis, dispela man bai abrusim bagarap.”—Matyu 24:13.