Baibel i tok: “Sapos man bilong mekim pasin nogut i bosim kantri, olgeta manmeri i save bel hevi tumas na krai.”—Sindaun 29:2.

Long bipo yet, planti bikman i mekim wok bos long hatpela pasin, na mekim nogut tru long ol manmeri i stap aninit long ol. Tru, i no olgeta bikman i gat kain pasin olsem. Sampela i gat laik tru long helpim ol manmeri i stap aninit long ol. Tasol taim ol i kirap mekim wok bos, ol i luksave olsem hatwok bilong ol long helpim ol man i lus nating bikos long pasin bilong pait na resis long kisim namba i stap namel long ol. O ating ol i yusim strong bilong ol long helpim ol yet tasol, na dispela i nogutim ol manmeri. Henry Kissinger, bipo em wanpela bikman long gavman bilong Amerika, i tok: “Long bipo yet, hatwok bilong ol man i lus nating, na ol samting ol i tingting long mekim i no bin kamap tru.”

Baibel i tok tu olsem: “Mipela man i no inap bosim wokabaut bilong mipela yet.” (Jeremaia 10:23) Ol man i gat sin na ol i no gat gutpela tingting na save inap long bosim gut olgeta samting long i stap bilong ol. Sapos ol man i no inap bosim wokabaut bilong ol yet, olsem wanem ol inap bosim ol manmeri bilong wanpela kantri? Yu inap luksave long as na ol gavman bilong graun i no inap pinisim ol pen na hevi? Tru tumas, planti taim ol wok bilong ol gavman nogut i as bilong ol pen na hevi ol man i karim.

Jisas i tok: “Sapos pasin laikim i stap namel long yupela, orait olgeta bai save olsem yupela i disaipel bilong mi.”—Jon 13:35.

Planti taim ol bikman bilong lotu i save toktok long pasin laikim na pasin wanbel. Tasol tru tru ol i lus long putim pasin laikim i go daun long bel bilong ol man i bihainim ol, dispela i mekim na pasin bilong heitim narapela i go bikpela tru. Lotu i no helpim ol man long kamapim pasin laikim, nogat, planti taim lotu i kirapim ol man long brukim lain, heitim narapela, bel nogut, na kros pait wantaim ol lain bilong narapela kantri. Long buk Christianity and the World Religions, wanpela tisa bilong lotu, Hans Küng, i tok: “Ol wok politik we i nogut tru na i bagarapim planti manmeri em ol wok politik we lotu i stiaim, i kirapim, na i orait long en.”

 Ol hetman bilong planti lotu i orait long man na meri singel i slip wantaim, man o meri marit i slip wantaim wanpela i no poroman marit bilong ol, na man i maritim man, o meri i maritim meri. Dispela i kamapim ol bikpela sik, pasin bilong rausim bel, meri i kisim bel nating, na ol marit na ol famili i bruk, dispela i mekim na ol man i karim planti pen na hevi.

“Laik bilong bel bilong olgeta man wan wan i save traim ol, dispela laik i save giamanim ol na pulim ol. Na taim dispela laik i stap long bel i kamap bikpela, em i save kamapim sin.”—Jems 1:14, 15.

Yumi olgeta i gat sin na yumi save mekim ol rong na popaia olsem na yumi mas wok strong long sakim “ol samting em bodi i laikim.” (Efesus 2:3) Tasol i hatwok long sakim laik nogut na moa yet sapos i gat rot bilong inapim dispela laik. Sapos yumi bihainim ol laik nogut bilong bodi, bikpela hevi inap painim yumi.

Wanpela man bilong raitim buk, P. D. Mehta, i tok: “Planti hevi i painim yumi bikos yumi gat ol laik nogut, yumi laik painim olkain amamas na inapim ol laik bilong yumi, na yumi gridi na yumi laik kisim planti samting.” Strongpela laik bilong bodi na pasin bilong kalabus long ol samting olsem alkohol, drak, pilai laki, pasin pamuk, na ol kain samting olsem, i bin bagarapim planti gutpela man na i putim hevi long famili na ol pren bilong ol na long ol narapela. Yumi ol man i gat ol pasin kranki, olsem na yumi wanbel long tok bilong Baibel olsem: “Yumi save olsem olgeta samting God i wokim, ol i wok long krai na pilim pen wantaim i kam inap long nau.”—Rom 8:22.

Baibel i tokaut olsem Satan em i “god bilong dispela graun,” na i gat ol strongpela spirit nogut i wok wantaim em.—2 Korin 4:4; Revelesen 12:9.

Wankain olsem Satan, ol dispela spirit nogut i insait tru long pasin bilong paulim tingting bilong ol man na giamanim ol. Aposel Pol i stori long dispela na i tok: “Yumi no pait wantaim ol manmeri, nogat, yumi pait wantaim ol gavman, na ol wok bos, na ol hetman i bosim tudak bilong dispela graun, na ol spirit nogut i stap antap.”—Efesus 6:12.

Ol spirit nogut i save amamas long nogutim ol man, tasol dispela i no nambawan laik tru bilong ol. Laik tru bilong ol em long stiaim ol man i go longwe bambai ol i no ken lotuim God Antap Tru, Jehova. (Song 83:18) Ol samting olsem pasin bilong lukluk long ol sta bilong kisim save long ol samting, mejik, pasin sanguma, na pasin bilong kisim save long ol samting bai kamap bihain, em sampela samting ol spirit nogut i yusim bilong giamanim na kontrolim ol manmeri. Olsem na Jehova i givim tok lukaut long yumi long ol dispela pasin we inap bagarapim yumi, na tu, em i tok long lukautim ol man husat i sakim Satan na ol spirit nogut.—Jems 4:7.

Inap 2,000 yia i go pinis, Baibel i tok profet olsem: “Yu mas save olsem, long taim bilong las de, taim nogut bai kamap na dispela bai givim hatwok long ol man.”

Baibel i kolim ol samting we bai givim hatwok long ol man, olsem: “Ol man bai laikim ol yet tasol, ol bai laikim tumas mani, ol bai litimapim nem bilong ol yet, ol bai i gat pasin antap, . . . ol bai i no gat pasin bilong laikim ol wanfamili, ol bai i no laik kamap wanbel, ol bai i gat pasin bilong bagarapim gutnem bilong ol arapela, ol bai i no gat pasin bilong bosim bel, ol bai kamap wail olgeta, ol bai i no laikim ol gutpela pasin, ol bai birua long ol pren bilong ol, ol bai i gat strongpela het, ol bai pulap long pasin antap, ol bai i no laikim God, nogat, ol bai laikim kain kain amamas.” Tru tumas, as tru na yumi lukim planti pen na hevi i stap tude em bikos yumi stap long “taim bilong las de.”—2 Timoti 3:1-4.

Taim yumi skelim pinis ol dispela samting i stap antap, yumi inap kliagut long as na ol man i no inap long pinisim pen na hevi, maski ol i tingting tru long helpim ol man. Sapos olsem, orait husat tasol inap helpim yumi? Yumi mas wetim Krieta bilong yumi, em i promis pinis long “bagarapim ol samting Satan [na ol spirit nogut] i kamapim.” (1 Jon 3:8) Long neks atikol, bai yumi skelim samting God bai mekim bilong pinisim olgeta samting i save kamapim pen na hevi.