Esaya 36:1-22
36 Hi lembe ra vu-14 ra ku fuma ka Hosi Hezekiya, Senakeribi hosi ya Asiriya+ u te a ta hlasela miti hinkwayo leyi biyeriweke ya le Yuda, kutani a yi hlula.+
2 Endzhaku ka sweswo hosi ya Asiriya yi rhuma Rabuxake*+ ku suka eLakixi+ a ya eYerusalema eka Hosi Hezekiya, a ri ni masocha yo tala swinene. Kutani va fika va yima emugerhweni+ wa le henhla lowu nga endleleni leyi yaka ensin’wini ya muhlantswi.+
3 Hiloko ku huma Eliyakimi+ n’wana wa Hilkiya loyi a a hlayisa ndyangu wa hosi na Xebina+ loyi a a ri matsalana na Yowa n’wana wa Asafa mutsari wa matimu va ya hlangana na yena.
4 Hiloko Rabuxake a ku eka vona: “Ndzi kombela mi ya byela Hezekiya mi ku, ‘Hosi leyikulu, hosi ya Asiriya yi ri: “Xana u tshembe yini?+
5 U ri, ‘Ndzi tiva ku lwa nyimpi,’ kambe a wu tivi nchumu. Xana u tshembe mani lerova u kanya mbilu u ndzi pfukela?+
6 Vona! U tshembe ku seketeriwa hi rihlanga leri, leri tshovekeke, ku nga Egipta, leri loko munhu a tiseketela ha rona ri nga ta nghena exandleni xakwe ri xi tlhava. Faro hosi ya Egipta u tano eka hinkwavo lava n’wi tshembaka.+
7 Loko mi ku, ‘Hi tshembe Yehovha Xikwembu xa hina,’ xana a hi yena loyi tindhawu takwe leti tlakukeke ni tialtari takwe swi susiweke hi Hezekiya,+ kasi hi hala tlhelo u byela vanhu va Yuda ni va Yerusalema a ku, ‘Mi fanele mi gandzela ealtarini leyi’?” ’+
8 Kutani ndzi kombela u bejelana ni hosi ya mina, hosi ya Asiriya:+ Ndzi ta ku nyika tihanci ta 2 000 ku vona loko u ta swi kota ku kuma vanhu lava nga ta ti gada.
9 Xana u ta swi kota ku hlula hambi ko va ndhuna yin’we leyi nga nandza lontsongo wa hosi ya mina, leswi wa ha titshegaka hi Egipta leswaku ri ku nyika makalichi ni vagadi va tihanci?
10 Xana a hi Yehovha loyi a ndzi nyikeke mpfumelelo wo hlasela tiko leri ndzi ri lovisa? Yehovha u ndzi byele a ku, ‘Famba u ya hlasela tiko leri u ri lovisa.’ ”
11 Hiloko Eliyakimi na Xebina+ na Yowa va ku eka Rabuxake:+ “Hi kombela u vulavula ni malandza ya wena hi Xiaramu,*+ hikuva ha xi twa; u nga vulavuli na hina hi ririmi ra Vayuda hikuva lava nga ekhumbini va swi twa.”+
12 Kambe Rabuxake a ku: “Xana hosi ya mina yi ndzi rhume ku vulavula ni hosi ya n’wina na n’wina ntsena? Xana a yi ndzi rhumanga ni le ka vanhu lava tshameke ehenhla ka khumbi, lava nga ta dya thyaka ra vona va tlhela va nwa ni mitsakamiso ya vona swin’we na n’wina?”
13 Hiloko Rabuxake a yima, a huwelela hi ririmi ra Vayuda+ a ku: “Twanani rito ra hosi leyikulu, hosi ya Asiriya.+
14 Hosi yi ri, ‘Mi nga xisiwi hi Hezekiya, hikuva a nge swi koti ku mi ponisa.+
15 Naswona mi nga pfumeli loko Hezekiya a mi kucetela ku tshemba Yehovha,+ a ku: “Yehovha u ta hi ponisa, hosi ya Asiriya a yi nge wu hluli muti lowu.”
16 Mi nga n’wi yingisi Hezekiya, hikuva hosi ya Asiriya yi ri: “Endlani ku rhula na mina mi tinyiketa, kutani un’wana ni un’wana wa n’wina u ta dya emurhini wakwe wa madiriva ni le nkuweni wakwe, a nwa ni mati exihlobyeni xakwe,
17 kukondza ndzi ta ndzi mi yisa etikweni leri fanaka ni tiko ra n’wina,+ tiko ra koroni ni vhinyo leyintshwa, tiko ra xinkwa ni masimu ya madiriva.
18 Mi nga pfumeli ku xisiwa hi Hezekiya a ku, ‘Yehovha u ta hi ponisa.’ Xana swikwembu swa matiko laman’wana swi swi kotile ku ponisa matiko ya swona eka hosi ya Asiriya?+
19 Swi kwihi swikwembu swa Hamati na Aripadi?+ Swi kwihi swikwembu swa Sefaravhayimi?+ Xana swi swi kotile ku ponisa Samariya eka mina?+
20 Xana xi kona xikwembu eka swikwembu hinkwaswo swa matiko wolawo lexi koteke ku ponisa vanhu va xona eka mina, lerova mi tshemba leswaku Yehovha u ta ponisa Yerusalema evokweni ra mina?” ’ ”+
21 Kambe va miyela va ku whii, hikuva hosi a yi va lerise yi ku, “Mi nga n’wi hlamuli.”+
22 Hiloko Eliyakimi n’wana wa Hilkiya loyi a a hlayisa ndyangu* wa hosi, Xebina+ loyi a a ri matsalana na Yowa n’wana wa Asafa mutsari wa matimu, va ta eka Hezekiya va handzule swiambalo swa vona, va fika va n’wi byela leswi Rabuxake a swi vuleke.
Tinhlamuselo ta le hansi
^ Kumbe “ndhuna ya vacheri va vhinyo.”
^ Kumbe “Xisiriya.”
^ Kumbe “yindlu ya hosi.”
