Nahume 1:1-15
1 Ku avanyisiwa ka muti wa Ninivha:+ Buku ya xivono xa Nahume* wa Muelikoxo:
2 Yehovha i Xikwembu lexi lavaka leswaku ku gandzeriwa xona ntsena+ naswona wa rihisela;Yehovha wa rihisela naswona u lunghekele ku kombisa vukarhi bya yena.+
Yehovha wa tirihisela eka valala va yena,Naswona vukarhi byakwe u byi hlayisela valala va yena.
3 Yehovha u hlwela ku hlundzuka+ naswona u ni matimba lamakulu,+Kambe Yehovha a nge tshiki ku xupula lava faneriwaka hi ku xupuriwa.+
Loko a famba ku ba moya ni xidzedze lexi lovisaka,Mapapa ma fana ni ritshuri emilengeni yakwe.+
4 U tshinya lwandle,+ a endla leswaku ri phya;U phyisa ni milambu hinkwayo.+
Swimilana swa tiko ra Baxani ni ra Karimeli swa vuna,+Ni swiluva swa Lebanoni swa vuna.
5 Tintshava ta tsekatseka hikwalaho ka yena,Ni swintshabyana swa n’oka.+
Misava yi ta tsekatseka hikwalaho ka xikandza xa yena,Swin’we ni tiko ni vanhu hinkwavo lava tshamaka eka rona.+
6 I mani loyi a nga yimaka emahlweni ka vukarhi bya yena?+
I mani loyi a nga tiyiselaka vukarhi bya yena lebyikulu?+
Vukarhi bya yena byi ta chuluriwa ku fana ni ndzilo,Naswona maribye ma ta fayeka hikwalaho ka yena.
7 Yehovha hi lonene,+ i vutumbelo hi siku ra maxangu.+
Wa va khathalela* lava lavaka vutumbelo eka yena.+
8 U ta khukhula muti* lowu hi ndhambi wu lova,Munyama wu ta hlongorisa valala vakwe.
9 Xana mi nga endlela Yehovha xikungu?
U lovisa hi ku helela.
Maxangu a ma nge he tlheli ma va kona.+
10 Hikuva va phasanile ku fana ni mitwa,Va fana ni vanhu lava dakweke hi byala;*Kambe va ta hisiwa ku fana ni mahlanga.
11 Eka wena ku ta huma loyi a endlaka kungu ro biha ro lwa na Yehovha,A nyikela xitsundzuxo lexi nga pfuniki nchumu.
12 Yehovha u ri:
“Hambileswi va nga ni matimba va tlhela va tala,Va ta herisiwa va lova.
Ndzi ku xanisile,* kambe a ndzi nge he tlheli ndzi ku xanisa.
13 Ndzi ta tshova joko ra yena leri nga ehenhla ka wena,+Ndzi ta ti tsema hi le xikarhi tintambhu leti ku boheke.
14 Yehovha u vule leswi hi wena,*‘Vito ra wena ri ta herisiwa.
Ndzi ta herisa swikwembu leswi vatliweke ni swa nsimbhi leswi nga etempeleni* ya wena.
Ndzi ta ku celela sirha, hikuva wa nyenyetsa.’
15 Vonani! Loyi a tisaka mahungu lamanene,Loyi a huwelelaka ku rhula+ u ta hi le tintshaveni.
Tlangela mikhuvo ya wena,+ wena Yuda, endla leswi u swi hlambanyeke,Hikuva xihunguki a xi nge he tlheli xi tsemakanya endhawini ya wena.
Xi ta lovisiwa hi ku helela.”
Tinhlamuselo ta le hansi
^ Leswi vulaka “Muchaveleri.”
^ Hi Xiheveru, “tiva.”
^ Ku nga Ninivha.
^ Kumbe “byala bya koroni.”
^ Ku nga Yuda.
^ Ku nga Asiriya.
^ Hi Xiheveru, “endlwini.”
