Yehovha u nyike vanhu misava. I kaya ra hina. Hikwalaho, mpatswa wo sungula ku nga Adamu na Evha a wu nga vumberiwanga ku ya tshama etilweni—Xikwembu se a xi vumbe tintsumi leswaku ti tshama etilweni. (Yobo 38:4, 7) Ematshan’weni ya sweswo, Xikwembu xi teke munhu wo sungula ivi xi n’wi veka eparadeyisini yo saseka leyi vuriwaka ntanga wa Edeni. (Genesa 2:15-17) Yehovha u n’wi nyike ntshembo wo tiphina hi vutomi lebyi nga heriki emisaveni swin’we ni vana va yena.—Hlaya Pisalema 37:29; 115:16.

Eku sunguleni, a ku ri ntanga wa Edeni ntsena lowu a wu ri paradeyisi. Mpatswa wo sungula a wu fanele wu tata misava hi vana va wona. Hi ku famba ka nkarhi, a va ta tata misava hinkwayo naswona va yi endla paradeyisi. (Genesa 1:28) Misava a yi nge herisiwi. Yi ta tshama yi ri kaya ra vanhu.—Hlaya Pisalema 104:5.

Hlalela vhidiyo leyi nge Ha Yini Xikwembu Xi Tumbuluxe Misava?

Adamu na Evha a va n’wi yingisanga Yehovha, hikwalaho u va hlongorile entangeni. Ku ve ku lahleka ka paradeyisi naswona a ku na munhu la swi koteke ku yi pfuxeta. Bibele yi ri: “Misava yi vekiwe evokweni ra lowo homboloka.”—Yobo 9:24.—Hlaya Genesa 3:23, 24.

Xana Yehovha a nge he xi hetisisi xikongomelo xa yena xo sungula hi vanhu? Nikatsongo! U ni matimba hinkwawo. A nge tsandzeki. (Esaya 45:18) U ta vuyetela rixaka ra vanhu ri va hi ndlela leyi a a lava leswaku ri va ha yona.—Hlaya Pisalema 37:11, 34.

Paradeyisi yi ta vuyeteriwa emisaveni loko Yesu a ta va a fuma tanihi Hosi leyi vekiweke hi Xikwembu. Enyimpini leyi vuriwaka Armagedoni, Yesu u ta rhangela tintsumi ta Xikwembu kutani a  lovisa hinkwavo lava kanetaka Xikwembu. Endzhaku, Yesu u ta pfalela Sathana ku ringana malembe ya 1 000. Vanhu va Xikwembu a va nge lovisiwi hikuva Yesu u ta va kongomisa ni ku va sirhelela. Va ta tiphina hi vutomi lebyi nga heriki emisaveni leyi nga Paradeyisi.—Hlaya Nhlavutelo 20:1-3; 21:3, 4.

Xikwembu xi ta byi herisa rini vubihi laha misaveni? Yesu u vule “xikombiso” lexi nga ta kombisa loko makumu ma ri ekusuhi. Swiyimo swa misava leyi, leswi xungetaka vutomi bya vanhu swi kombisa leswaku sweswi hi hanya ‘emakumu ka mafambiselo ya swilo.’—Hlaya Matewu 24:3, 7-14, 21, 22.

Hi nkarhi wa ku fuma ka Yesu ka malembe ya 1 000 a ri etilweni, u ta herisa ku xaniseka hinkwako emisaveni. (Esaya 9:6, 7; 11:9) Handle ko fuma tanihi Hosi, Yesu u ta va Muprista Lonkulu naswona u ta herisa swidyoho swa lava rhandzaka Xikwembu. Hikwalaho, hi ku tirhisa Yesu, Xikwembu xi ta herisa mavabyi, ku dyuhala ni rifu.—Hlaya Esaya 25:8; 33:24.

Vanhu lava yingisaka Xikwembu va ta hanya eParadeyisini. (1 Yohane 2:17) Yesu u rhume valandzeri va yena leswaku va ya lava vanhu lavo rhula leswaku va va dyondzisa ndlela leyi va nga amukelekaka ha yona eka Xikwembu. Namuntlha, Yehovha u lunghiselela timiliyoni ta vanhu leswaku ti ta hanya eParadeyisini ya le nkarhini lowu taka leyi nga ta va yi ri laha misaveni. (Sofaniya 2:3) ETiholweni ta Mfumo ta Timbhoni ta Yehovha, vanhu va dyondza ku va vanuna ni vatatana lavanene ni ku va vasati ni vamanana lavanene. Vana ni vatswari va gandzela swin’we ni ku dyondza ndlela leyi va nga vuyeriwaka ha yona eka mahungu lamanene.—Hlaya Mikiya 4:1-4.