A KU ri hi lembe ra 49 C.E. Petro, Yakobo na Yohane—“lava a va vonaka va ri tiphuphu”—va nyike muapostola Pawulo ni mutirhi-kulobye wa yena Barnaba ntirho. Loko va ri karhi va chumayela ematikweni a va fanele va tsundzuka Vakreste lava nga swisiwana. (Gal. 2:9, 10) Xana vutihlamuleri lebyi byi hetisisiwe njhani?

Mapapila ya Pawulo ma kombisa nyingiso lowu a wu nyikeleke eka mhaka leyi. Hi xikombiso, u tsalele Vakreste va le Korinto a ku: “Malunghana ni nhlengo lowu nga wa vakwetsimi, hilaha ndzi leriseke hakona emavandlheni ya Galatiya, na n’wina endlani hi ndlela yoleyo. Siku rin’wana ni rin’wana ro sungula evhikini, un’wana ni un’wana wa n’wina a a veke swo karhi etlhelo endlwini ya yena a swi hlayisa, hi ku ya hilaha a fuweke hakona, leswaku ku nga endliwi mihlengo hi nkarhi lowu ndzi nga ta fika ha wona. Kambe loko ndzi fika kwahalano, vanhu van’wana ni van’wana lava mi va bumabumelaka hi mapapila, hi vona ndzi nga ta va rhuma leswaku va yisa nyiko ya n’wina ya musa eYerusalema.”—1 Kor. 16:1-3.

Eka papila ra yena ra vumbirhi leri huhuteriweke leri a ri tsaleleke Vakorinto, Pawulo u tlhele a hlamusela xikongomelo xa mihlengo. A ku ri leswaku “hi ku ringanisela, leswi [va] seleke na swona sweswi swi pfala ku kayivela ka vona.”—2 Kor. 8:12-15.

Loko Pawulo a tsalela Vakreste va le Rhoma kwalomu ka lembe ra 56 C.E., mihlengo hinkwayo se a yi ringanile. U te: “Se ndzi lava ku khoma riendzo ro ya eYerusalema ndzi ya tirhela vakwetsimi. Hikuva lava va nga eMakedoniya ni le Akaya va tsakele ku hanana hi swilo swa vona hi ku swi nyikela eka vakwetsimi lava nga swisiwana lava nga eYerusalema.” (Rhom. 15:25, 26) Endzhakunyana ka kwalaho Pawulo u hetisise ntirho wa yena, hikuva loko a tlhelela eYerusalema niloko a ta va a khomiwile kwalaho, u byele Felikisi, Ndhuna-nkulu ya Murhoma a ku: “Ndzi fikile ndzi tisa tinyiko ta tintswalo etikweni ra ka hina, ni magandzelo.”—Mint. 24:17.

Moya lowu kombisiweke hi Vakreste va lembe-xidzana ro sungula wu le rivaleni eka leswi Pawulo a swi vuleke hi vanhu va le Makedoniya. U vule leswaku va “hambeta va hi kombela hi xikhongotelo lexikulu hi ku tilavela ka vona lunghelo ra ku nyika ka musa.” Muapostola loyi u khutaze Vakorinto leswaku va landzela xikombiso xolexo. U te: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” I yini lexi susumeteleke mavandlha leswaku ma hanana hi ndlela yoleyo? Ku navela ka wona a ku nga ri “ku enerisa hi xitalo ntsena leswi laviwaka hi vakwetsimi, kambe [a ku ri] ku tlhela ku fuwisiwa hi marito yo tala ya ku nkhensa Xikwembu.” (2 Kor. 8:4; 9:7, 12) Hi endla kahle loko ku hanana ka hina ku ri ni xikongomelo lexi fanaka. Hakunene Yehovha Xikwembu u ta wu katekisa moya wolowo lowunene ni lowu nga riki na vutianakanyi—naswona hakunene nkateko wa yena hi wona wu endlaka leswaku munhu a fuwa.—Swiv. 10:22.

Hilaha a swi ri hakona emasikwini ya muapostola Pawulo, vo tala va “veke swo karhi etlhelo,” kumbe va tivekele mali yo karhi leyi va nga ta yi hoxa eka mabokisi ya minyikelo evandlheni, lawa ma funghiweke hi marito lama nge, “Ntirho Wa Misava Hinkwayo.” (1 Kor. 16:2) N’hweti yin’wana ni yin’wana, mavandlha ma rhumela minyikelo yoleyo ehofisini ya Timbhoni ta Yehovha leyi langutelaka tiko ra ka vona. Nakambe swa koteka leswaku u rhumela minyikelo hi ku kongoma eka vandla ra swa nawu leri tirhisiwaka hi Timbhoni ta Yehovha ta le tikweni ra ka n’wina. Leswaku u tiva vandla ra swa nawu leri tirhisiwaka hi Timbhoni ta Yehovha ta le tikweni ra ka n’wina, hi kombela u fonela rhavi leri langutelaka tiko ra ka n’wina. Adirese ya rhavi yi nga kumiwa eka www.ps8318.com. Minyikelo leyi u nga ha yi rhumelaka hi ku kongoma hi leyi landzelaka:

MINYIKELO LEYI KONGOMEKE

• Minyikelo ya mali, swin’wetsin’wetsi kumbe nhundzu yin’wana ya nkoka.

• Katsa ni papila leri kombisaka leswaku mali kumbe nhundzu ya kona i minyikelo leyi kongomeke.

KU NYIKELA LOKU KUNGUHATIWEKE

Ku engetela eka ku nyikela hi mali ni hi nhundzu ya nkoka, ku ni maendlelo man’wana yo nyikela lama vuyerisaka ntirho wa Mfumo emisaveni hinkwayo. Maendlelo lawa ma xaxametiwe laha hansi. Ku nga khathariseki leswaku u lava ku tirhisa endlelo rihi kumbe maendlelo wahi, hi kombela u rhanga u fonela rhavi leri langutelaka tiko ra ka n’wina leswaku u ta tiva leswaku hi wahi maendlelo lawa ma xaxametiweke laha hansi lawa ma tirhisiwaka etikweni ra ka n’wina. Tanihi leswi swilaveko swa le nawini ni milawu ya swibalo swi hambanaka, i swa nkoka leswaku u vulavurisana ni mutsundzuxi wa ta swibalo ni wa swa nawu lava va swi dyondzeleke, loko u nga si hlawula ndlela leyi u lavaka ku nyikela ha yona.

Ndzindza-khombo: Minyikelo yi nga endliwa hi ku tsala vandla leri tirhisiwaka hi Timbhoni ta Yehovha tanihi leri nga ta sala ri kuma mali ya ndzindza-khombo wa vutomi kumbe wa mudende loko n’wini wa wona a fa.

Tiakhawunti ta Bangi: Ku nga ha tsarisiwa vandla leri tirhisiwaka hi Timbhoni ta Yehovha loko sweswo swi fambisana ni swilaveko swa tibangi ta tiko ra ka n’wina eka tiakhawunti ta bangi, mali leyi lombisiweke hi ntswalo (certificates of deposit), kumbe akhawunti leyi munhu a yi pfulaka loko a kuma mali leyi a nyikiweke yona loko a huma penceni kumbe leyi nyikeriwaka loko n’wini wa yona a fa.

Tixere ni Mali leyi Lombisiweke hi Ntswalo (Bonds): Tixere ni mali leyi lombisiweke hi ntswalo leswi nyikeriweke eka vandla leri tirhisiwaka hi Timbhoni ta Yehovha tanihi nyiko leyi kongomeke kumbe ku endliwa ntwanano wa leswaku yi ta tekiwa ntsena loko loyi a nyikeleke ha yona a fa.

Miako ni Ndhawu: Miako ni ndhawu leswi xavisekaka leswi nyikeriweke eka vandla leri tirhisiwaka hi Timbhoni ta Yehovha tanihi minyikelo leyi kongomeke kumbe loko ku ri yindlu, hi ku endla leswaku loyi a nyikeleke ha yona a va ni mfanelo ya le nawini yo tshama eka yona vutomi bya yena hinkwabyo.

Testamente (Wills) ni Minhlangano ya le Nawini (Trusts): Muako kumbe mali swi nga ha nyikeriwa eka vandla leri tirhisiwaka hi Timbhoni ta Yehovha hi ku tirhisa testamente ya le nawini ya mufi kumbe hi ku tsala vandla tanihi leri nga ta kuma mali eka nhlangano wolowo. Vandla leri ri nga ha tshikiwa ri nga hakerisiwi xibalo xa mali ya kona.

Loko u lava rungula leri engetelekeke, u nga ha bela ndzawulo ya Accounting Office riqingho kumbe u yi tsalela eka adirese leyi nga laha hansi kumbe u vutisa rhavi leri langutelaka tiko ra ka n’wina.