Tshinela Eka Xikwembu

‘Xi Ta Endla Leswaku U Xi Kuma’

1 TIKRONIKA 28:9

XANA wa xi tiva Xikwembu? Ku hlamula xivutiso lexi a swi olovi hilaha u nga ehleketaka hakona. Entiyisweni ku tiva Xikwembu swi katsa ku tiva ku rhandza ka xona ni tindlela ta xona. Hi fanele hi va ni vuxaka lebyikulu na xona naswona vuxaka byebyo byi fanele byi khumba ndlela leyi hi hanyaka ha yona. Xana swa koteka ku va ni vuxaka byo tano? Loko swi ri tano, njhani? Tinhlamulo ta swivutiso leswi ti kumeka eka xikhutazo lexi Hosi Davhida a xi nyikeke n’wana wakwe Solomoni, lexi nga eka 1 Tikronika 28:9.

Vona xiendlakalo lexi hi mahlo ya mianakanyo. Davhida se a a ri ni malembe ya kwalomu ka 40 a ri karhi a fuma tiko ra Israyele naswona swilo a swi ri fambela kahle. Solomoni loyi a a ta n’wi tlhandlama a a ha ri ntsongo swinene. (1 Tikronika 29:1) Xana hi xihi xikhutazo lexi Davhida a xi nyikeke n’wana wakwe loko a ri ekusuhi ni ku fa?

Loko Davhida a vulavula hi ntokoto lowu a veke na wona loko a tirhela Xikwembu, u te: “Solomoni n’wananga, tiva Xikwembu xa tata wa wena.” Hi marito lawa, Davhida a a nga vulavuli hi ku va ni vutivi ntsena hi Xikwembu. Solomoni se a a ri mugandzeri wa Yehovha, Xikwembu xa Davhida. Hi nkarhi wolowo, Matsalwa yo tala ya Xiheveru se a ma ri kona, naswona swi le rivaleni leswaku Solomoni se a swi tiva leswi Matsalwa wolawo yo kwetsima ma swi vulaka hi Xikwembu. Xidyondzi xin’wana xi vula leswaku rito ra Xiheveru leri hundzuluxeriweke ri va “tiva,” ri nga ha vula “ku tolovelana swinene ni nchumu wo karhi.” Davhida a a lava leswaku n’wana wakwe a n’wi tekelela hi ku va na yena a va ni vuxaka lebyikulu ni Xikwembu.

Vuxaka byo tano a byi ta yi khumba swinene ndlela leyi Solomoni a a ta hanya ha yona. Davhida u khutaze n’wana wakwe a ku: “Tirhela [Xikwembu] hi mbilu leyi heleleke ni hi moya-xiviri lowu tsakeke.” * Xiya leswaku u n’wi khutaze leswaku a tirhela Xikwembu endzhaku ka loko a n’wi khutaze leswaku a xi tiva. I ntiyiso leswaku ku tiva Xikwembu swi endla leswaku hi xi tirhela. Kambe hi fanele hi xi tirhela hi timbilu ta hina hinkwato ku nga ri hi vukanganyisi. (Pisalema 12:2; 119:113) Davhida u kombele n’wana wakwe leswaku a tirhela Xikwembu swi suka embilwini naswona hi ku swi rhandza.

I yini lexi endleke leswaku Davhida a khutaza n’wana wakwe ku gandzela hi xikongomelo lexinene? Davhida u ri: “Hikuva Yehovha u kambisisa timbilu hinkwato, naswona u xiya mboyamelo wun’wana ni wun’wana wa miehleketo.” Solomoni a a nga fanelanga a tirhela Xikwembu hi xikongomelo xo tsakisa Davhida tata wakwe. Xikwembu xi lava vanhu lava lavaka ku xi tirhela hi timbilu ta vona hinkwato.

Xana Solomoni a a ta landzela xikombiso xa tata wakwe kutani a tshinela eka Yehovha? Sweswo a swi ri eka yena. Davhida u byele n’wana wakwe a ku: “Loko u n’wi lavisisa, u ta endla leswaku u n’wi kuma; kambe loko u n’wi siya, u ta ku cukumetela makumu.” Leswaku Solomoni a va mugandzeri la nga ekusuhi ni Xikwembu, a a fanele a tikarhatela ku tiva Yehovha. *

Ndzayo leyi Davhida a yi nyikeleke tanihi mutswari ya hi tiyisekisa leswaku Yehovha u lava leswaku hi tshinela eka yena. Leswaku hi va ni vuxaka lebyikulu na yena, hi fanele hi “n’wi lavisisa” hi ku dyondza Matsalwa hi xikongomelo xo lava ku n’wi tiva ku antswa. Sweswo swi ta hi susumetela ku n’wi tirhela hi timbilu ta hina hinkwato ni hi ku swi rhandza. Yehovha u lava leswaku hi n’wi tirhela hi ndlela yoleyo naswona sweswo hi swona leswi a swi languteleke eka malandza yakwe.—Matewu 22:37.

[Tinhlamuselo ta le hansi]