Ndzi velekiwe eSzékesfehérvár, le Hungary, edorobeni leri matimu ya rona ma sukelaka eka malembe yo tlula 1 000 lama hundzeke. Khombo ra kona, ndza ha ma tsundzuka kahle maxangu ya nkarhi wa nyimpi ya vumbirhi ya misava.

Ndzi kurisiwe hi vakokwa va mina ku sukela loko ndza ha ri ntsongo. A ndzi va rhandza swinene—ngopfu-ngopfu kokwa wa xisati Elisabeth. U ndzi dyondzise leswaku ndzi va ni ripfumelo leri tiyeke eka Xikwembu. Ku sukela loko ndzi ri ni malembe manharhu, madyambu man’wana ni man’wana a ndzi phindha-phindha na yena xikhongelo lexi minkarhi yin’wana xi vuriwaka Xikhongelo xa Hosi. Hambiswiritano, ndzi sungule ku twisisa leswi xikhongelo xolexo a xi vula swona loko ndzi ri ekusuhi ni ku hlanganisa malembe ya 30.

Vakokwana va ndzi khathalerile loko ndza ha ri ntsongo hikuva vatswari va mina a va tirha vusiku ni nhlikanhi, hi xikongomelo xo hlayisa mali leswaku va ta xava yindlu. Kambe, Mugqivela un’wana ni un’wana wa vumbirhi, ndyangu wa ka hina a wu hlangana leswaku wu dya swin’we. Ndza yi tsundzuka minkarhi yoleyo a hi tiphina swin’we ha yona.

Hi 1958, leswi vatswari va mina a va lava swona swi endlekile, va swi kotile ku xava yindlu leyi a hi ta tshama eka yona hi ri vanharhu. A ndzi tsake swinene hi ku va ndzi ya tshama ni vatswari va mina. Kambe, endzhaku ka tin’hweti ta tsevu, ntsako wa mina wu hele hi xitshuketa. Tata wa mina u dlayiwe hi khensa.

Mbilu ya mina a yi vava swinene. Ndzi tsundzuka ndzi khongela ndzi ku: “Xikwembu, ndzi ku komberile leswaku u sirhelela vutomi bya papa. Ndza n’wi lava. Ha yini u nga swi hlamulanga swikhongelo swa mina?” A ndzi swi lava hi mbilu hinkwayo ku tiva laha tata wa mina a nga kona. Ndzi tivutise ndzi ku: ‘Xana u ye etilweni? Kumbe u lo fela makumu?’ A ndzi navela vana van’wana lava a va ha ri ni vatata va vona.

Ku hundze malembe yo tala ndzi tshamela ku ya emasirheni. Loko ndzi fika a ndzi khinsama esirheni ra tatana ivi ndzi khongela ndzi ku: “Xikwembu, ndza ku kombela, ndzi lava ku tiva leswaku papa u ye kwihi.” Ndzi tlhele ndzi khongela leswaku ndzi twisisa xikongomelo xa vutomi.

 Loko ndzi ri ni malembe ya 13, ndzi endle xiboho xo dyondza Xijarimani. A ndzi anakanya leswaku eka tibuku to tala ta Xijarimani ndzi ta kuma tinhlamulo ta swivutiso swa mina. Hi 1967, ndzi sungule ku dyondza edorobeni ra Jena, leri hi nkarhi wolowo a ri ri xiphemu xa Jarimani Vuxa. Ndzi hlaye tibuku ta Xijarimani leti a ti vulavula hi vativi va filosofi, ngopfu-ngopfu leti a ti vulavula hi vukona bya munhu. Hambileswi rungula rin’wana ra kona a ri tsakisa, a ri kona leri a ri endla ndzi eneriseka. Ndzi ye emahlweni ndzi khongelela ku kuma tinhlamulo.

Hi 1970, ndzi tlhelele eHungary, laha ndzi hlanganeke na Rose loyi ndzi tekaneke na yena. Hi nkarhi wolowo, Hungary a ri fumiwa hi Makhomunisi. Endzhakunyana ka loko hi tekanile, mina na Rose hi rhurhele eAustria. Xikongomelo xa hina a ku ri leswaku hi hetelela hi rhurhele eSydney, le Australia, laha malume a a tshama kona.

Hi xihatla ndzi kume ntirho eAustria. Siku rin’wana, munhu loyi a ndzi tirha na yena u ndzi byele leswaku ndzi nga kuma tinhlamulo ta swivutiso swa mina eBibeleni. U ndzi nyike tibuku leti sekeriweke eBibeleni. Ndzi hlaye tibuku teto hi xihatla ni hi ku hiseka naswona a ndzi lava ku dyondza swo tala. Hiloko ndzi tsalela Timbhoni ta Yehovha, ku nga tona leti kandziyiseke tibuku toleto naswona ndzi kombela tibuku leti engetelekeke.

Hi siku leri mina na Rose a hi hlanganisa lembe hi tekanile, hi endzeriwe hi muntshwa la nga Mbhoni ya Yehovha wa le Austria. U ndzi nyike tibuku leti ndzi ti kombeleke ivi a kombela ku dyondza na mina Bibele kutani ndzi pfumela. Leswi a ndzi lava ku tiva swo tala, a hi dyondza kambirhi hi vhiki naswona eka dyondzo yin’wana ni yin’wana a hi heta tiawara ta kwalomu ka mune!

A ndzi tsakisiwa hi ku va Timbhoni ti ndzi dyondzisa leswi humaka eBibeleni. Loko ti ndzi komba vito ra Xikwembu, ku nga Yehovha eka Bibele ya mina ya Xihungary, swi ndzi hlamarise swinene. Ndzi ni malembe ya 27 ndzi ya ekerekeni, kambe a ndzi nga si tshama ndzi twa ku vulavuriwa hi vito ra Xikwembu. A ndzi tsakisiwa hi tinhlamulo ta Bibele leti twisisekaka ta swivutiso swa mina. Hi xikombiso, ndzi dyondze leswaku vafi a va twi nchumu, onge hi loko va etlele vurhongo lebyikulu. (Eklesiasta 9:5, 10; Yohane 11:11-15) Ndzi tlhele ndzi dyondza hi xitshembiso xa Bibele xa misava leyintshwa laha ‘rifu ri nga ta va ri nga ha ri kona.’ (Nhlavutelo 21:3, 4) Ndzi navela ku tlhela ndzi vona tata wa mina hikuva emisaveni yoleyo leyintshwa ku ‘ta va ni ku pfuxiwa ka lava feke.’—Mintirho 24:15.

Rose na yena u sungule ku swi tsakela hi mbilu hinkwayo ku dyondzeriwa Bibele. Hi endle nhluvuko hi xihatla, hi hete ku dyondza nkandziyiso hi tin’hweti timbirhi ntsena! A hi va kona eka minhlangano hinkwayo leyi Timbhoni ti vaka na yona eHolweni ya Mfumo. Hi tsakisiwe swinene hi rirhandzu, mpfuno ni vun’we lebyi Timbhoni ta Yehovha ti nga na byona.—Yohane 13:34, 35.

Hi 1976, mina na Rose hi pfumeleriwe ku nghena eAustralia. Hi xihatla hi kume Timbhoni ta Yehovha ta kwalaho. Timbhoni toleto ti hi amukele hi mandla mambirhi. Hi 1978, na hina hi ve Timbhoni.

Eku heteleleni ndzi kume tinhlamulo ta swivutiso leswi a swi ndzi karhata nkarhi wo leha swinene. Hi ku tshinela eka Yehovha Xikwembu, ndzi tlhele ndzi kuma Tatana la nga pimanisiwiki na nchumu. (Yakobo 4:8) Nakambe ntshembo wa mina wo tlhela ndzi vona tata wa mina wa nyama emisaveni leyintshwa wa ndzi chavelela swinene.—Yohane 5:28, 29.

Hi 1989, mina na Rose hi teke xiboho xo tlhelela eHungary leswaku hi ta byela vanghana, vandyangu wa ka hina ku katsa ni vanhu van’wana hi leswi hi swi dyondzeke. Hi ve ni lunghelo ro dyondzisa vanhu vo tala Bibele. Ku tlula 70 wa vona va ve Timbhoni ta Yehovha, ku katsa na mama.

Ndzi khongele malembe ya 17 leswaku ndzi kuma tinhlamulo ta swivutiso swa mina. Se ku hundze malembe ya 39 naswona ndza ha ya emahlweni ndzi khongela—kambe sweswi ndzi ri: “Ndza nkhensa, Tata wa mina wa le tilweni, ku va u hlamule swikhongelo swa mina swa loko ndza ha ri ntsongo.”