Vakorinto Va Wumbirhi 6:1-18
6 Leswi hi tirhaka ni Xikwembu,+ hi mi kombela swaku mi nga yamukeli timpsalu tatikulu ta Xikwembu mi gama mi tlanga hi tona.+
2 Hikusa xi li: “Ni ku twile hi nkama wa kona wawunene naswona ni ku pfunile hi siku la ku ponisiwa.”+ Vonani! Lowu i nkama wawunene wa leswaku Xikwembu xi hi komba timpsalu. Phela leli i siku la ku ponisiwa.
3 A hi yendli nchumu lexi nga ta kwatisa munhu, leswaku ntirho lowu hi wu yendlelaka Xikwembu wu nga soliwi.+
4 Ka swilo hinkwaswu leswi hi swi yendlaka hi kombisa swaku hi tirhela Xikwembu:+ Hi tiyisela mindzingo ya yinyingi, mahlomulu, ku pfumala, swiyimu swa ku karhata,+
5 ku biwa, ku pfaleliwa madjele,+ ku terekeliwa hi xitshungu, ku tirha yi nga chayi, ku tsandzeka ni ku yetlela masiku man’wani, ni ku fa hi ndlala minkama yin’wani.+
6 Hi hanya wutomi leli nga basa, hi hanya hi wutivi, hi lehisa mbilu,+ hi vanhu vavanene,+ hi pfumelela swaku moya wa ku kwetsima wu rhangela wutomi la hina naswona lirhandzu la hina a hi la ku kanganyisa.+
7 Hi vulavula ntiyiso, hi tshemba matimba ya Xikwembu,+ hi khome matlharhi ya ku lulama+ ka voko la xinene* ni la ximatsi.*
8 Ha dzunisiwa ni ku danisiwa, va hi sola ni ku vulavula swaswinene hi hina. Va li hi vakanganyisi kambe hi vulavula ntiyiso.
9 Vanhu a va hi tivi kambe Xikwembu xa hi tiva, va hi vona na hi file* kambe ha hanya,+ ha khatisiwa* kambe a hi dlayiwanga.+
10 Vanhu va pimisa swaku hi kwatile kambe hi tshama na hi tsakile, va li hi swisiwana kambe hi ganyise va ku tala, va li a hi na nchumu kambe hi ni swilo hinkwaswu.+
11 Hi pfule nomo wa hina swaku hi vulavula* na n’wina Vakorinto naswona ha mi rhandza swinene.*
12 A hi mi yalelanga lirhandzu la hina,+ kambe n’wina ma hi tsona lirhandzu la n’wina.
13 Ni vulavula na n’wina ku fana ni vana va mina. Hi kombela mi hi khomisa xileswi na hina hi nga mi khomisa xiswona. Na n’wina hi rhandzeni hi mbilu hinkwayu.*+
14 Mi nga patsiwi* ni lava kalaka va nga li vapfumeli.+ Hikusa ku lulama ni ku biha swi kumana kwini ke?+ Kumbe a ku vonakala ni munyama swi tlhangana kwini ke?+
15 Naswona Kreste na Beliyali* va nga tirhisana ke?+ Kumbe mupfumeli* ni lweyi a kalaka a nga li mupfumeli va kumana kwini ke?+
16 Tempele ya Xikwembu yi twanana kwini ni swikwembu swa mavunhwa?+ Phela hina hi tempele ya Xikwembu lexi hanyaka;+ hilaha Xikwembu xi nga vula xi ku: “Ni ta tshama xikarhi ka vona+ ni tlhela ni famba xikarhi ka vona, ni ta va Xikwembu xa vona kutani vona va ta va vanhu va mina.”+
17 “‘Hi mhaka leyo, humani xikarhi ka vona, mi tihambanisa na vona,’ ku vula Yehovha,* ‘naswona tshikani ku khumba nchumu lowu kalaka wu nga basanga’”;+ “‘kutani ni ta mi yamukela.’”+
18 “‘Ni ta va Papayi wa n’wina,+ na n’wina mi ta va vana va mina va madjaha ni va tintombhi,’+ ku vula Yehovha,* Xikwembu xa Matimba Hinkwawu.”
Tinhlamunselu ta le hansi
^ Kumbexana leswaku hi tivhikela.
^ Kumbexana leswaku hi hlasela.
^ Kumbe: “na hi faneliwa hi ku fa”.
^ Kumbe: “layiwa”.
^ Kumbe: “hi mi pfulele timbilu ta hina.”
^ Kumbe: “hi vulavula na hi chunsekile”.
^ Kumbe: “na n’wina pfulani timbilu ta n’wina.”
^ Kumbe: “Mi nga paniwi”.
^ Kumbe: “munhu wa ku tshembeka”.
^ Li huma ka rito la Xiheberu leli vulaka “Lweyi A Kalaka A Nga Pfuni Nchumu”. Ku vuliwa Sathana.
^ Vona Xiyengetelo A5.
^ Vona Xiyengetelo A5.
