Mahungu Ya Ku Tsakisa Ya Ku Tsaliwa Hi Luka 4:1-44
4 Kutani Yesu a suka Yordani, na a tale hi moya wa ku kwetsima. Se matimba ya Xikwembu ma mu yisa mananga+
2 ku ringana 40 wa masiku. Se Davulosi a ya mu ringa.+ A nga dlanga nchumu ka masiku wolawo, kutani nkama ma nga hela, a a twa ndlala.
3 Se Davulosi a ku: “Loko u li n’wana wa Xikwembu, byela ribye leli swaku li txintxa li va pawu.”
4 Kambe Yesu a mu hlamula a ku: “Ku tsaliwile: ‘Munhu a nga fanelanga a hanya hi pawu ntsena.’”+
5 Kutani a famba na yena ka ntshava a mu komba mimfumu hinkwayu ya misava hi nkama wawutsongo.+
6 Se Davulosi a ku: “Ni ta ku nyika mimfumu leyi hinkwayu ni ku phatima ka yona, hikusa ni nyikiwe yona+ naswona ni yi nyika mun’wani ni mun’wani lweyi ni lavaka ku mu nyika yona.
7 Se loko wo khizama u ni gandzela, ni ta ku nyika yona hinkwayu.”
8 Yesu a ku: “Ku tsaliwile: ‘U fanele u gandzela Yehovha* Xikwembu xa wena naswona u fanele u tirhela yena ntsena.’”+
9 Kutani a famba na yena Yerusalema a fika a mu nyimisa henhla ka tempele,* se a ku: “Loko u li n’wana wa Xikwembu, titxukumeteli hansi,+
10 hikusa ku tsaliwile: ‘Xi ta rhuma tintsumi ta xona leswaku ti ta ku vhikela,’
11 kutani ‘ti ta ku tlhamukela hi mavoko ya tona leswaku nenge wa wena wu nga tshuki wu ba ribye.’”+
12 Yesu a mu hlamula a ku: “Ku tsaliwile: ‘U nga tshuki u ringa Yehovha* Xikwembu xa wena.’”+
13 Nkama Davulosi a nga gama ku mu ringa, a fambile a mu siya, a nyimela nkama wun’wani leswaku a ta tlhela a mu ringa.+
14 Kutani Yesu a tlhelela Galileya+ na a tale hi moya wa ku kwetsima wa Xikwembu. Se ndhuma ya yena yayinene yi hangalaka tikweni hinkwalu.
15 A tlhela a sungula ku djondzisa ka masinagoga* ya vona naswona vanhu hinkwavu a va mu hlonipha.
16 Se a ya Nazareta+ lomu a nga kulela kona; kutani a nghena ka sinagoga+ hi ku ya hi leswi a a tshamela ku swi yendla hi siku la Savata, se a sekeleka leswaku a lerha Matsalwa.
17 Kutani a nyikiwa buku* la muprofeta Esaya, a gama a li pfula a kuma lani ku nga tsaliwa leswi:
18 “Moya wa ku kwetsima wa Yehovha* wu le henhla ka mina, hikusa a ni langile swaku ni chumayela mahungu ya ku tsakisa ka swisiwana. A ni rhume ku ya byela swib’ochwa leswaku swi ta chunsiwa, ku yendla swaku lava nga fa matihlo va tlhela va vona, ku chunsa lava hluphekaka+
19 ni ku chumayela swaku i nkama wa kuva Yehovha* a ponisa vanhu.”+
20 Se a pfala* buku a li tlhelisa ka mupfunisi, se a tshama hansi; hinkwavu lava a va li ka sinagoga a va mu txuvukisisa swinene.
21 Kutani a ku: “Namuntlha tsalwa leli ma ha ku li twaka se li hetisekile.”+
22 Se hinkwavu va sungula ku vulavula swaswinene hi yena ni ku hlamalisiwa hi leswi a a swi vula+ va ku: “Lweyi a hi yena n’wana wa Yosefa ke?”+
23 Kutani a va hlamula a ku: “Na swi tiva swaku mi ta ni byela xihlayahlaya lexi nge: ‘Dotori, tihanyisi. Naswona mi ta ku: Swilo leswi hi nga twa swaku u swi yendlile aKapernawume,+ swi yendli ni kola tikweni la wena.’”
24 A tlhela a ku: “Ni tiyisile na mi byela: A ku na muprofeta lweyi a yamukeliwaka ka tiko la yena.+
25 Ni mi byela ntiyiso: Ka masiku ya Eliya a ku ni vavasati va vanyingi aIsrayele va ku feliwa hi vavanuna nkama lowu matilo ma nga pfaliwa ku ringana malembe manharhu ni 6 wa tiwheti, ku za ku va ni ndlala yayikulu ka tiko hinkwalu.+
26 Kambe Eliya a nga rhumiwanga ka vavasati volavo, a rhumiwe ka wansati wa le Sarepta ka tiko la Sidoni+ lweyi na yena a a feliwe hi nuna.
27 Naswona a ku ni vanhu va ku tala lava a va ni mavabyi ya nhlokonho* le Israyele ka nkama wa muprofeta Elixa; kambe ku yo hanyisiwa* Namani wa le Siriya ntsena.”+
28 Kutani hinkwavu lava a va mu yingisela sinagogeni va kwata swinene,+
29 se va mu humesa handle ka doropa, va mu yisa ka ntshava, lomu doropa la vona a li yakiwe kona leswaku va ta mu txukumetela hansi.
30 Kambe a tsemakanya hi le xikarhi ka vona a tifambela.+
31 Kutani a ngirimela a ya Kapernawume, ka doropa la Galileya. A fika a va djondzisa hi siku la Savata,+
32 kutani va hlamalisiwa hi madjondzisela ya yena,+ hikusa leswi a a va djondzisa swona a swi ta hi ka Xikwembu.
33 A ku ni wanuna lweyi a a ni dimoni asinagogeni, a a huwelela a ku:+
34 “Ha! Hi ku wonhele yini wena Yesu wa le Nazareta?+ U tele ku ta hi helisa? Ni ku tiva kahle, u Mukwetsimi wa Xikwembu.”+
35 Kambe Yesu a li kawuka a ku: “Miyela! Huma ka yena!” Se dimoni li mu tlatlalata hansi li gama li huma na li nga mu vavisanga.
36 Nkama vanhu va nga vona leswo, hinkwavu va hlamala se va ku: “I mavulavulelo ya ku tshamisa ku yini lawa? Hikusa a ni matimba ya ku hlongola ni madimoni!”
37 Kutani ndhuma ya yena yi hangalaka tikweni hinkwalu.
38 Nkama a nga suka ka sinagoga, a ye kaya ka Simoni. Mamani wa nsati wa Simoni a a karhatiwa hileswi muzimbha wa yena a wu hiseta hintamu, kutani va kombela Yesu leswaku a mu pfuna.+
39 Se Yesu a ya lomu a a yetlele kona a fika a mu hanyisa. Kutani a pfuka a sungula ku va lunghiselela swakudla.
40 Kambe nkama a li ya ku peleni, va mu tisele vanhu lava a va ni mavabyi ya ku hambanahambana. Kutani a va hanyisa hi ku va tlhateka mavoko.+
41 Madimoni a ma humetela ka vanhu va ku tala na ma huwelela ma ku: “U N’wana wa Xikwembu.”+ Kambe a a ma kawuka, a nga ma pfumeleli swaku ma vulavula,+ hikusa a ma swi tiva swaku hi yena Kreste.+
42 Nkama li nga xa a ye nhoveni.+ Kambe xitshungu xi sungula ku famba xi mu lava anze xi fika lomu a a li kona, se xi zama ku mu sivela swaku a nga fambi.
43 Kambe a xi byela a ku: “Ni fanele ni ya chumayela mahungu ya ku tsakisa ya Mfumu wa Xikwembu ni le ka madoropa man’wani, hikusa hi swona ni nga rhumiwa swona.”+
44 Se a tama a chumayela ka masinagoga ya le Yudiya.
Tinhlamunselu ta le hansi
^ Vona Xiyengetelo A5.
^ Kumbe: “ka ndhawu ya ku leha ya kona ya tempele”.
^ Vona Xiyengetelo A5.
^ I tindhawu leti Vayuda a va kumana ka tona swaku va khongela va tlhela va lerha matsalwa.
^ Ku nga buku ya xikhale leyi a va yendla hi ku yi songa.
^ Vona Xiyengetelo A5.
^ Vona Xiyengetelo A5.
^ Kumbe: “songa”.
^ Kumbe: “lepra”. Ku nga muxaka wa mavabyi ya ku bola xikhumba.
^ Kumbe: “basisiwa”.
