“Ŵanakazi Nawo Ŵali na Mwaŵi wa Kugwira Ntchito ya Kuzenga”
Gulu linyake la vyakuzengazenga ku Britain likalumba chomene Ŵakaboni ŵa Yehova chifukwa cha kusambizga ŵanakazi kwendeska mathirakitara na kugwiliskira ntchito mashini ghakurughakuru pa malo apo ŵakazenganga ofesi ya munthavi pafupi na msumba wa Chelmsford, ku Essex. Wupu wa Considerate Constructors Scheme * (CCS), ukati Ŵakaboni ŵa Yehova ŵali pa malo ghakwamba chifukwa cha kusambizga ŵanakazi ntchito iyi, ndipo ukati ichi “ntchinthu chapadera chomene.” Chifukwa wuli ŵakalumbika nthena?
Ku Britain, ŵanakazi awo ŵakugwira ntchito ya vyakuzengazenga ŵakufika yayi na 13 peresenti. Ndipo kampani yinyake ku Britain yati yapanga kafukufuku, yikasanga kuti ŵanakazi ŵanandi ŵakughanaghanako yayi vya kugwira ntchito iyi. Mwakupambanako na ivi, ku Chelmsford kukaŵa ŵanakazi pafupifupi 40 peresenti awo ŵakagwiranga ntchito ya kuzenga. Pa ŵanakazi awo ŵakendeskanga mathirakitara na kugwiliskira ntchito mashini ghakurughakuru, chiŵelengero ichi chikalutilira kukwera m’paka chikajumpha pa 60 peresenti.
Ŵanakazi ŵakugwilira lumoza ntchito na ŵanalume ku Chelmsford
Kasi ntchivichi chikawovwira ŵanakazi aŵa kufiska ntchito iyi? Ŵakasambizgika kweniso kovwirika kuchita nthena. Wupu wa Considerate Constructors Scheme nawo ukulondezga fundo ziŵiri izi pakusambizga ŵanthu ŵake. Malango gha wupu uwu ghakuchiska awo ŵakwendeska ntchito ya vyakuzengazenga kuti ŵakwenera “kuwoneseska kuti pa malo ghawo gha ntchito waliyose wakupika ntchindi, wakuleka kuchitilika nkhaza, wakukhozgeka, wakovwilika, kweniso wakusambizgika.”
Kusambizga Ŵanakazi Kwendeska Mathirakitala na Kugwiliskira Ntchito Mashini Ghakurughakuru
Jade, uyo njumoza mwa ŵanakazi awo ŵali kusambizgika kwendeska mashini na galimoto zinyake zikuruzikuru pa malo agha, wakati: “Ntchakukondweska chomene! Nkhaghanaghananga kuti ningafiska yayi. Nyengo zinyake ntchito yikuŵa yinonono, kweni nkhusambizgika pafupipafupi ndipo nkhusambira vinthu viphya.” Nga ni Jade, Lucy nayo wali kusambira kwendeska mashini ghakurughakuru. Iyo wakati: “Apo nkhizanga pano, palije icho nkhamanyangapo. Kweni kufuma waka pa zuŵa ilo nkhamba kugwira ntchito pa malo ghano, nasambizgika vinandi. Kufika sono, nagwirapo na magulu ghakukwana 5, ntheura ningati nasambira vinandi!”
Ŵakusambizgika umo ŵangendeskera mashini
Ŵanakazi ŵa mu magulu agha ŵasambiraso maluso ghanandi chomene. Eric uyo njumoza wakulaŵilira magulu agha wakayowoya kuti: “Ŵanakazi ŵakupwelelera chomene mashini ghakugwilira ntchito kupambana na ŵanalume, kweniso ŵakumanya luŵiro usange mashini ghawo ghali na suzgo ndipo ŵakuyowoya.”
Kovwira Ŵanakazi pa Ntchito ya Kuzenga
Carl, uyo wakulaŵilira magulu ghakupambanapambana agho ghakugwiliskira ntchito mashini ghakurughakuru pa malo agha, wakati: “Nazizwa chomene na umo ŵanakazi wakusambilira kwendeska magalimoto na mashini ghakurughakuru. Ndipo nyengo zinyake, nkhusankha ŵanakazi kuti ndiwo ŵendeske mashini agha m’malo mwa ŵanalume awo ŵagwira ntchito iyi vyaka vinandi!”
Mwanakazi wakugwiliskira ntchito mashini ghakujoyinira mapayipi
Para awo ŵakulaŵilira magulu ŵakovwira ŵanthu awo ŵakugwira nawo ntchito, nkhongono zikukwera. Ivi ndivyo wakayowoyaso Therese, uyo wagwira ntchito yakwendeska mashini agha kwa vyaka vinandi. Iyo wakumanya kuti munthu uyo wakugwiliskira ntchito mashini agha wakuŵa na udindo ukuru wakuwoneseska kuti wakusankha makora vinthu mwakuti wagege ngozi. Therese wakati: “Para namanya kuti uyo wakulaŵilira gulu lithu wakunovwira, nkhongono zikukwera chifukwa nkhumanya kuti wakunigomezga kuti ningafiska ntchito iyo. Kweniso nkhuŵikapo mtima kugwira ntchito iyo para namanya kuti ŵanthu ŵakuzirwiska ivyo nkhuchita!”
Abigail, uyo nayo wakwendeska mashini ghakurughakuru, wakuwonga wovwiri kweniso kukolerana uko kukuŵapo pakugwira ntchito iyi, iyo wakuti: “Ŵanalume awo nkhugwira nawo lumoza ŵakuniwona wapasi yayi. Para chinthu chinyake chanisuzga ŵakuŵa ŵakunozgeka kunovwira, ŵakunipoka waka yayi ntchito kuti ŵachite ŵekha. Kweni ŵakunileka kuti nimalizge.”
Ŵakuŵikapo Mtima Kweniso Ŵakuchita Mwakugomezgeka
Padera pa kugwiliskira ntchito mashini ghakuru, Ŵanakazi ku Chelmsford ŵali kusambizgikaso ntchito zinyake nga umo ŵangapimira malo, umo ŵangagwiliskira ntchito makora malo, kunozga mashini, kweniso kupanga vyakukwerapo pakuzenga. Robert, uyo wagwirapo ntchito zakupambanapambana lumoza na ŵanakazi wakati ŵanakazi “ŵakuŵikapo mtima, ndipo ŵakulondezga mwakupwelelera malango agho ŵaphalirika.” Tom, uyo wali mu gulu la awo ŵakupima malo, wakati: “Ŵanakazi awo nkhugwira nawo mu gulu lane wakuŵikapo mtima pa ntchito yawo ndipo ivyo ŵapima vikuŵa vyaunenesko. Ŵakuwoneseska kuti ŵaleke kupima vyakubudika.”
Lekani mulaŵiliri wa gulu linyake zina lake, Fergus wakayowoya mwakukondwa kuti: “Mbunenesko nadi ŵanakazi nawo ŵangagwira ntchito ya kuzenga!”
^ ndime 2 Wupu wa Considerate Constructors Scheme ngwakujiyimira pawekha ndipo ukugwira ntchito ya kulutiska panthazi ntchito ya vyakuzengazenga ku Britain.
Panji Mungatemwa Kuŵerengaso Nkhani Izi
GONGWE LA MULINDA
Kasi Ciuta Wakuŵawona Wuli Ŵanakazi?
Kasi mukughanaghana kuti Baibolo likuti ŵanakazi mbambura kuzirwa? Wonani ivyo Baibolo likuyowoya umo Chiuta wakuwonera ŵanakazi.
IVYO ŴANTHU ŴAKUTEMWA KUFUMBA
Kasi Ŵanakazi Awo Mbakaboni ŵa Yehova Ŵakupharazga?
Kasi udindo wa ŵanakazi pa ntchito yakusambizga ŵanthu pa charu chose ngwakuti wuli?