Clodean, uyo njumoza wa Ŵakaboni ŵa Yehova ndipo wakukhala ku South Africa, wakagonekeka mu chipatala kuti ŵamuchite opareshoni yikuru. Wali na masuzgo ghanandi mu thupi lake ndipo wakwenera kusankha mwamahara wovwiri wakwenelera wa chipatala uwo wangapokera. Apo ŵakaŵa kuti ŵandamuchite opareshoni kweniso pamanyuma pa opareshoni, wakasuzgikanga maghanoghano, kupulika vyakuŵinya, kweniso kuchita phukwa. Pamanyuma pakuti pajumpha pafupifupi masabata 10 wati wafuma mu chipatala, wakatondekanga ni pera kuwuka kuti wakhale pasi. Ndipo chifukwa cha muliri wa COVID-19, ŵanthu ŵakatondekanga kwiza kuzakamuwona.

 Clodean wakaŵikapo mtima kuti waleke kusuŵilira waka kujilengera chitima ntheura wakapempha Chiuta kuti wamupe nkhongono zakuti wakhozgerenge ŵanji. Wati wamba waka kukhala pasi wakayimbira munung’una wa mzengezgani wake, uyo kumanyuma uku wakasambirangapo Baibolo na Ŵakaboni ŵa Yehova kweni pasono wali kuleka. Clodean wakadumbiskana nayo fundo yakukhozga yakufuma mu mazgu gha Chiuta, iyo yikapangiska mwanakazi uyu kwambiraso kusambira Baibolo. Clodean wakalongosoraposo vya uwemi wakuchitako maungano gha Chikhristu, ndipo wakawoneseska kuti msambiri wake uyu wali na mwaŵi wakujoyina ku maungano gha mpingo kwizira pa videoconference. Mwanakazi uyu wakajoyina ku maungano ndipo wakazgorapo panyengo ya chigaŵa cha mafumbo na mazgoro.

 Pamanyuma Clodean wakayowoya na munung’una wa sambiro lake, uyo nayo wakaŵa wakukhumbisiska kusambira Baibolo. Wakafika na pa kumuphalira Clodean vya ŵanji awo nawo ŵangaŵa ŵakunweka. Kasi chikachitika pamanyuma ntchivichi? Clodean wakamba kusambira Baibolo na ŵanakazi ŵanayi. Ndipouli vinthu viwemi vikamalira penepapo yayi!

 Chifukwa chakuti Clodean wakughanaghanira chomene ŵanji, wakambaso kusambira Baibolo na ŵanakazi ŵanyake 10, mu nyengo ya muliri iyi ndipo ivi vikung’anamura kuti wose pamoza ŵakaŵapo ŵanthu 16. Ŵanji mwa iwo ŵakuchitako maungano gha Chikhristu kwizira pa videoconference. Chifukwa chakuti Clodean wakuŵanga wakutangwanika kovwira ŵanji kuti ŵamumanye Yehova, wakuluwako vya masuzgo ghake. Iyo wakuwonaso kuti chifukwa chakuti Yehova “Chiuta wa chisangulusko chose,” wakumupembuzga mu masuzgo ghake, nayo wakufiska kupembuzga ŵanji.—2 Ŵakorinte 1:3, 4.

 Kasi awo ŵakusambira Baibolo na Clodean ŵakujipulika wuli chifukwa cha ivyo ŵakusambira? Yumoza wawo wakuti: “Nasanga chandulo munthowa zinandi. Kweni chandulo chikuru ntchakuti namanya zina la Chiuta. Ivi vyanovwira kusendelera kwa Yehova.” Mwanakazi wakwamba uyo Clodean wakamuyimbira sonosono apa wangabatizika. Ivyo vili kuchitika vikumupa Clodean chimwemwe chikuru. Ndipo pasono mabamba gha opareshoni ghakupora pachokopachoko.