Mu Baibolo, mazgu ghakuti “kuchanya” ghakugwiliskirika ntchito pakuyowoya za vinthu vikuruvikuru vitatu: (1) mu mlengalenga; (2) malo agho vilengiwa vyauzimu vikukhala; na (3) malo ghakutali chomene panji kuti ghapachanya. Palipose apo mazgu agha ghagwiliskirika ntchito ghakuŵa na ng’anamuro kuyana na nkhani iyo yikuyowoyeka. a

1.   Mu mlengalenga. Apa mazgu ghakuti, “kuchanya” ghakung’anamura mlengalenga, umo mphepo zikujumpha, viyuni vikuduka, mabingu ghakupanga vula na chiwuvi, kweniso umo tikuwona ŵaleza ŵakumwetuka. (Salimo 78:26; Zintharika 30:19; Yesaya 55:10; Luka 17:24) Ghangang’anamuraso malo ghakuchanya chomene uko kuli “dazi, mwezi, na nyenyezi.”​—Dotoronome 4:19; Genizesi 1:1.

2.   Malo agho vilengiwa vyauzimu vikukhala. Mazgu ghakuti “kuchanya” ghakung’anamuraso machanya ghauzimu, panji kuti uko kuli vilengiwa vyauzimu, malo agho tingaghawona yayi na maso ghithu. (1 Mathemba 8:27; Yohane 6:38) Machanya ghauzimu agha ndigho kukukhala Yehova Chiuta, uyo ni “Mzimu,” kweniso ŵangelo awo wali kulenga. (Yohane 4:24; Mateyu 24:36) Nyengo zinyake, mazgu ghakuti “machanya” ghakwimira ŵangelo ŵakugomezgeka awo ni “mpingo wa ŵatuŵa.”​—Salimo 89:5-7.

    Baibolo likugwiliskiraso ntchito mazgu ghakuti “kuchanya” kuti liyowoye vya malo ghauzimu agho Yehova wakukhala, agho ghakuchemeka “malo ghake ghakukhalapo.” (1 Mathemba 8:43, 49; Ŵahebere 9:24; Chivumbuzi 13:6) Mwachiyelezgero, Baibolo likayowoyerathu kuti Satana na viŵanda vyake ŵachimbizgikenge kuchanya, ndipo ŵazamuzomerezgekaso yayi kunjira ku malo agho kuli Yehova. Ndipouli, Satana na viŵanda vyake ŵachali vilengiwa vyauzimu.​—Chivumbuzi 12:7-9, 12.

3.   Malo ghakutali chomene panji kuti ghapachanya. Malemba ghakugwiliskira ntchito mazgu ghakuti “kuchanya” kuti ghayowoye vya malo ghapachanya, chomenechomene pakuyowoya vya mazaza gha kuwusa. Malo ghanthena agha pangakhala:

   •   Yehova Chiuta iyomwene pakuŵa Muwusi wankhongonozose.​—2 Midauko 32:20; Luka 15:21.

   •   Ufumu wa Chiuta, boma ilo lizamunjira m’malo mwa maboma gha ŵanthu. Baibolo likuchema Ufumu uwu kuti “machanya ghaphya.”​—Yesaya 65:17; 66:22; 2 Petrosi 3:13. b

   •   Ŵakhristu awo ŵali pa charu ndipo ŵali na chigomezgo cha kuluta kuchanya.—Ŵaefeso 2:6.

   •   Maboma gha ŵanthu agho ghajikwezga pachanya chomene.—Yesaya 14:12-14; Daniyeli 4:20-22; 2 Petrosi 3:7.

   •   Mizimu yiheni iyo yikuwusa charu chose pasono.—Ŵaefeso 6:12; 1 Yohane 5:19.

Kasi kuchanya kukuwoneka wuli?

 Kuchanya uko kuli vilengiwa vyauzimu kukuchitika vinthu vinandi chomene. Kuli vilengiwa vyauzimu mamiliyoni ghanandi chomene, ivyo vikuchita “ivyo [Yehova] wakuyowoya.”​—Salimo 103:20, 21; Daniyeli 7:10.

 Baibolo likuti kuchanya kuli ungweru wambura kufikirika. (1 Timote 6:15, 16) Ntchimi Ezekiyeli yikapokera mboniwoni ya kuchanya ndipo yikawona “ungweru ukuru,” kweniso mu mboniwoni iyo Daniyeli wakawona mukaŵa “mlonga wa moto.” (Ezekiyeli 1:26-28; Daniyeli 7:9, 10) Kuchanya ni malo ghatuŵa, panji kuti ghakutowa, na ghakuwoneka makora chomene.​—Salimo 96:6; Yesaya 63:15; Chivumbuzi 4:2, 3.

 Vyose ivyo Baibolo likuyowoya pa nkhani ya kuchanya, vikulongora kuti nkhwakuzizwiska chomene. (Ezekiyeli 43:2, 3) Ndipouli, vingachitika yayi kuti taŵanthu tipulikiske vyose ivyo vikuchitika kuchanya, chifukwa vikujumpha apo nkhongono yithu ya kughanaghana yikugota.