KASI MUNGASANKHA IVYO MUKUKHUMBA KUTI VIZAKAMUCHITIKIRANI KUNTHAZI? Ŵanthu ŵanyake ŵakugomezga kuti vinthu vikuchitika waka mwamwaŵi. Ŵakuti palije icho wamunthu ungachitapo kuti vizakakuyendere makora munthazi. Para ŵatondeka kufiska ivyo ŵakakhumbanga, ŵakuti waka: “Chiuta wakalemberathu.”

Ŵanyake ŵakukhuŵara chifukwa cha masuzgo agho ŵakusangana nagho mu charu chambura urunji ichi. Ŵakuyezgayezga kuti ŵakhalenge umoyo uwemi kweni nkhondo, nkhaza, ngozi zachilengiwa na matenda vikutimbanizga mapulani ghawo. Ŵakujifumba kuti: ‘Chifukwa wuli?’

Mbunenesko kuti vinthu vyamabuchi vingatimbanizga mapulani ghinu. (Mupharazgi 9:11) Ndipouli, pa nkhani ya ivyo mukukhumba kuti vizakamuchitikirani munthazi, vilipo ivyo mungachita kuti muzakaleke kudandawura. Nakuti Baibolo likuti ivyo tikuchita sono ndivyo vingaphara umo munthazi mwithu muzamuŵira. Wonani ivyo likuyowoya.

Ŵaisrayeli ŵati ŵakhala pachoko kunjira mu Charu cha Layizgano, Mozesi mulongozgi wawo wakaŵaphalira kuti: “Naŵika pamaso pinu umoyo na nyifwa, thumbiko na nthembo. Ntheura sorani umoyo kuti muŵe ŵamoyo, imwe na ŵana ŵinu. Mutemwe Yehova Chiuta winu, mupulikire mazgu ghake, na kudemelera kwa iyo.”—Dotoronome 30:15, 19, 20.

“Naŵika pamaso pinu umoyo na nyifwa, thumbiko na nthembo. Ntheura sorani umoyo.”—Dotoronome 30:19

Nadi, Chiuta wakafumiska Ŵaisrayeli ku wuzga mu charu cha Eguputo ndipo wakaŵalayizga kuti ŵakhalenge mwakukondwa mu Charu cha Layizgano. Kweni ivi vikate vichitikenge waka vyekha yayi. Kuti ŵasange vitumbiko ivi, ŵakeneranga ‘kusora umoyo.’ Mwawuli? Iwo ŵakeneranga ‘kutemwa Yehova Chiuta wawo, kupulikira mazgu ghake, na kudemelera kwa iyo.’

Mazuŵa ghano, namwe mukwenera kusankha mwekha. Ivyo mwasankha ndivyo vingaphara umo vinthu vizamuŵira kwa imwe munthazi. Kweni para mwasankha ‘kutemwa Yehova Chiuta winu, kupulikira mazgu ghake, na kudemelera kwa iyo,’ ndikuti mwasankha kuzakakhala na umoyo wamuyirayira mu paradiso pa charu chapasi. Kweni kasi munthu wangalongora wuli kuti wasankha kuteŵetera Chiuta?

Mukhaliro ukuru wa Chiuta ntchitemwa. Mpositole Yohane wakalemba kuti: “Chiuta ntchitemwa.” (1 Yohane 4:8) Pa chifukwa ichi, Yesu wakati wafumbika za ilo ni dango likuru pa malango ghose, iyo wakati: “Utemwenge Yehova Chiuta wako na mtima wako wose na umoyo wako wose na maghanoghano ghako ghose.” (Mateyu 22:37) Ntheura munthu wakuŵa paubwezi wakukhora na Yehova chifukwa cha wofi panji kugomezgeramo bweka yayi, kweni chifukwa cha chitemwa. Chifukwa wuli pera tikwenera kusankha kutemwa Yehova?

Yehova wakutitemwa nga umo mupapi wakutemwera mwana wake. Nangauli ŵapapi mbakwananga, kweni ŵakutemwa ŵana ŵawo. Ŵakuŵalongozga, kuŵakhozga, kuŵawovwira na kuŵalanga chifukwa ŵakuŵakhumbira viwemi. Kasi ŵapapi ŵakukhazga vichi ku ŵana ŵawo? Iwo ŵakukhumba kuti ŵana ŵawo nawo ŵaŵatemwenge na kulondezga vyose ivyo ŵakuŵasambizga kuti vinthu  viŵayendere makora. Ipo ntchakupulikikwa kuti Dada withu wachitemwa nayo wakukhumba kuti nase tiwongenge vyose ivyo wakutichitira. Asi nthe?

Kupulikira Chiuta ni para tikuchita ivyo wakuyowoya. Pakuti Chiuta tingayowoya nayo yayi maso na maso, tikupulika mazgu ghake para tikuŵazga Baibolo na kulondezga ivyo tikusambira.—1 Yohane 5:3.

Kuti wadidimizge kuti ntchakuzirwa kupulikira Chiuta, Yesu wakati: “Munthu wakhalenge wamoyo na chingwa pera chara, kweni na lizgu lililose ilo likufuma mu mulomo wa Yehova.” (Mateyu 4:4) Nga umo chakurya chiliri ntchakukhumbikwa ku thupi la munthu, kusambira vya Chiuta nako nkhwakuzirwa chomene. Chifukwa wuli? Themba Solomoni likati: “Vinjeru ntchivikiliro, ndalama nazo ntchivikiliro. Kweni uwemi wa kumanya vinthu ni uwu: Vinjeru vikusunga umoyo wa uyo wali navyo.” (Mupharazgi 7:12) Vinjeru vyakufuma kwa Chiuta vingativikilira mazuŵa ghano na kutovwira kuti tisankhenge mwamahara vinthu na kuzakasanga umoyo wamuyirayira.

Kasi muchali kukumbuka ntharika ya Yesu iyo tanguzunura mu nkhani iyo yajumpha? Iyo wakati: “Chipata chifinyi chili na nthowa yichoko iyo yikuya ku umoyo, ndipo mbachoko awo ŵakuyisanga.” (Mateyu 7:13, 14) Kuti tende makora mu nthowa yanthena iyi na kukafika uko tikuluta, tikwenera kulongozgeka na munyake uyo wakuyimanya makora. Lekani ntchakupulikikwa kuŵa paubwezi wakukhora na Yehova. (Salimo 16:8) Kweni kasi tingachita wuli?

Zuŵa lililose pakuŵa vinthu vinandi ivyo tikwenera kuchita kweniso ivyo tikukhumba kuchita. Vinthu ivi vingatitimbanizga na kutilyera waka nyengo mwakuti tingachita kusoŵa na nyengo yakuchitira ivyo Chiuta wakukhumba. Lekani Baibolo likutikumbuska kuti: “Muŵe maso chomene na umo mukwendera, nga mbambura vinjeru yayi, kweni nga mbanthu ŵavinjeru. Mugwiliskirenge ntchito makora nyengo yinu, pakuti mazuŵa ngaheni.” (Ŵaefeso 5:15, 16) Tikudemelera kwa Chiuta para ubwezi withu na iyo ndiwo ukuŵa pakwamba mu umoyo withu.—Mateyu 6:33.

Palije icho mungachita kuti musinthe ivyo vili kuchitika kumasinda. Kweni vilipo ivyo mungachita kuti muŵe na munthazi muwemi, imwe na ŵakutemweka ŵinu. Baibolo likuti Dada withu wakuchanya Yehova, wakutitemwa chomene ndipo wakutimanyiska ivyo tikwenera kuchita. Wonani ivyo ntchimi Mika yikalemba, iyo yikati:

“Iwe wamunthu, wakakuphalira icho ntchiwemi. Kasi Yehova wakukhumbachi kwa iwe? Wakukhumba kuchita urunji pera na kuŵa wakugomezgeka, na kwenda mwakujiyuyura na Chiuta wako!”—Mika 6:8.

Kasi mungatemwa kuti mwendenge na Yehova na kuzakasanga umoyo wamuyirayira uwo wasungira awo ŵakwenda nayo? Vyose vili mu mawoko ghinu!