Ŵaŵazgi Ŵithu Ŵakufumba Kuti . . .

Kasi Caru ici Cizamumara?

▪ Ŵanyake ŵakaghanaghananga kuti caru cimalenge pa Okutobala 21, 2011. Kweni cikamara yayi. Ntheura, ucimi wa Harold Camping muyowoyeri wa wayilesi yinyake ku U.S. ukafiskika yayi. Iyo wakacima kuti pa Meyi 21, 2011 ni zuŵa la ceruzgo, ndipo kuzamucitika cindindindi cikuru pa caru cose, ndiposo kuti para pajumpha myezi yinkhondi, pa Okutobala 21, caru cizamuparanyika.

Kweni caru, cizamuparanyikapo yayi. Uyo wakalenga caru wazamuzomerezgapo yayi kuti ivi vicitike. Mazgu ghake ghakuti: “Mwakhozga caru ndipo cikukhalilira nganganga.”—Salmo 119:90.

Ndipouli, ŵanthu ŵanyake awo ŵakuŵazga Baibolo ŵangati caru ici cizamuparanyika na moto. Pakukhozgera maghanoghano ghawo, ŵakukora mazgu gha pa 2 Petrosi 3:7, 10 agho ghakuti: “Na mazgu gheneagha pera, macanya na caru capasi ivyo viliko sono, vyaŵikikira moto, ndipo vikusungikira zuŵa la ceruzgo na la pharanyiko la ŵanthu . . . . Ndipouli, zuŵa la Yehova lizenge nga ni munkhungu, mu leneilo macanya ghazamufumapo luŵiro na mphomo yikuru, kweni visinkho pakuŵa vyakocha comene vizamusongonoka, ndipo caru capasi na milimo iyo yilimo vizamuvumbukwa.” Kasi mazgu gha mpositole Petrosi tikwenera kughapulika umo ghalembekera?

Cara. Cifukwa wuli? Kuti tipulikiske ivyo mavesi agha ghakung’anamura tikwenera kuyaniska na mavesi ghanyake mu kalata ya Petrosi kweniso Baibolo lose. Kung’anamura mazgu agha umo ghalembekera, kungang’anamura kuti macanya panji caru cose pamoza na vinthu ivyo vilimo, vizamocheka na moto cifukwa cakuti kacigaŵa kacoko waka kali na ŵanthu ŵakwananga. Kasi mungawocha thumba lose la skaŵa cifukwa cakuti yimoza njakuvunda? Cingaŵa camahara yayi kucita nthena. Ntheura, Yehova nayo wangaparanya yayi kucanya na caru capasi cifukwa ca kugaluka kwa cilengiwa cake cimoza.

Nakuti maghanoghano ghanthena ghakususkana na mazgu gha Yesu ghakuti: “Mbakukondwa awo mbakuzika, pakuti ŵazamuhara caru capasi.” (Mateyu 5:5; Salmo 37:29) Kasi dada wacitemwa wangazengera nyumba yiwemi ŵa mu mbumba yake pamanyuma na kuyibuska na moto? (Salmo 115:16) Ici cingacitika yayi. Yehova ni Mlengi kweniso Dada wacitemwa.—Salmo 103:13; 1 Yohane 4:8.

Apo Petrosi wakazunuranga mazgu ghakuti “caru” wakang’anamuranga caru ceneko yayi, kweni wakang’anamuranga ŵanthu ŵaheni. Wonani kuti Petrosi wakayaniska caru na kuparanyika kwa ŵanthu ŵaheni mu nyengo ya Nowa. (2 Petrosi 3:5, 6) Pa nyengo yira, mbanthu ŵaheni pera awo ŵakaparanyika, kweni caru cikaparanyika yayi. Nowa uyo wakaŵa murunji pamoza na ŵamumbumba yake ŵakapona. Mwakuyana waka, mazgu gha Petrosi ghakuti “macanya” ghakung’anamura macanya gheneko yayi. Ntheura, apa Petrosi wakang’anamuranga muwuso wa ŵanthu pa ŵanthu ŵambura kumanya Ciuta. Ntheura, ŵaheni wose ŵambura kupera ŵazamuparanyika, kweniso maboma ghose ghaheni, ghazamusongonoka ndipo Ufumu wa Ciuta uzamuwusa m’malo mwa maboma agha.—Daniel 2:44.

Ipo kasi caru cizamumara? Yayi. Ico cizamuparanyika ni caru cakuyelezgera, panji kuti ŵanthu ŵaheni. Caru ndiposo ŵanthu ŵarunji vikhalilirenge muyirayira.—Zintharika 2:21, 22.