Cifukwa Wuli Vimbundi Vikulutilira?

“Munthu yumoza wakuwusa pacanya pa munyake kujipweteka iye mwene.”—MUPHARAZGI 8:9.

Mazgu agha ghakulongora makora umo muwuso wa ŵanthu uliri. Ndiwo wacitiska kuti paŵe masuzgo ghanandi na kuyuzgika. Kwa vyaka vinandi, ŵanthu ŵa vilato viwemi ŵayezgapo kukhazikiska boma lambura vimbundi, kweni nyengo zose ŵakutimbanizgika na uryezi kweniso vimbundi. Cifukwa wuli vili nthena? Cifukwa wuli vimbundi vikulutilira? Nchifukwa ca vinthu vitatu vyakulondezgapo ivi.

1. Ndise ŵakwananga.

Baibolo likuyowoya mwakupulikikwa makora kuti tose tili “pasi pa kwananga.” (Ŵaroma 3:9) Nga ni nthenda yakwambukira yambura kukonda munkhwala, kwananga “kukukhala” mwa ise. Kwananga ‘kwawusa’ ŵanthu nga ni themba kwa vyaka vinandi. “Dango” la kwananga likulutilira kugwira nchito pa ise. Kwananga kwapangiska ŵanthu ŵanandi kuŵika vyakukhumba vyawo pakwamba, kuŵika mtima pa kusanga vinthu vyakuthupi panji kulongora  mazaza pacanya pa ŵanyawo.—Ŵaroma 5:21; 7:17, 20, 23, 25.

2. Caru ico tikukhala.

Ŵanthu ŵanandi mu caru ici mbaryezi kweniso ŵakujighanaghanira ŵekha. Lekani ŵanji cikuŵaŵira cakusuzga kuti ŵacite vinthu mwakupambana na ŵanandi. Cifukwa ca kujighanaghanira ŵekha, ŵanandi ŵakukhumba mazaza. Ŵakukhumbisiskaso kuŵa na ndalama zinandi kweniso katundu wakujumphizga. Cacitima nchakuti ŵakucita ukhuluku kuti ŵasange ivyo ŵakukhumba. M’malo mwa kukana vinthu ivi, ŵanthu aŵa ŵakulondezga “unandi wa ŵanthu kucita uheni.”—Exodus 23:2.

3. Satana Dyabulosi.

Satana uyo nchilengiwa cauzimu cakugaluka, “wakupuluska caru cose.” (Uvumbuzi 12:9) Wakuŵikapo mtima kupusika ŵanthu. Mwaucenjezi, wangapangiska kuti munthu waŵe na khumbo la kuŵa na vinthu vinandi mwakuti wangafika na pakucita ukhuluku.

Kasi ici cikung’anamura kuti tili nga ni vidoli mu mawoko gha Satana, kuti tipulikirenge waka cilicose? Nkhani yakulondezgapo ndiyo yizgorenge fumbo ili.

[Cithuzithuzi pa peji 4]