NKHANI ZAKWAMBILIRA | KASI CIUTA WAKUMUGHANAGHANIRANI?
Ciuta Wakukhumba Kuŵa Namwe Paubwezi
“Palije munthu uyo wangiza kwa ine kwambura kuti Ŵadada, awo ŵakanituma, ŵamuguza.”—YOHANE 6:44.
CIFUKWA WULI ŴANJI ŴAKUKAYIKA?: Ŵanandi awo ŵakusopa ŵakuwona nga Ciuta wali kutali comene na iwo. Christina wa ku Ireland, sabata yiliyose wakalutanga ku chalichi. Iyo wakati: “Nkhamanyanga waka kuti Ciuta ndiyo wali kulenga vyose, kweni nkhamumanyanga makora yayi. Ndipo nkhaghanaghanangako yayi vyakuti ningaŵa nayo paubwezi.”
IVYO BAIBOLO LIKUSAMBIZGA: Para mwawona kuti mwapuluka, kutaya mtima yayi, Yehova wakovwira nyengo zose. Yesu wakayowoya ntharika yakulongora kuti Ciuta wakutipwelelera. Wakati: “Usange munthu munyake wali na mberere makumi khumi (100) ndipo yimoza yazgeŵa, asi walekenge makumi ghankhondi na ghanayi pacanya zinkhondi na zinayi (99) pa lupiri na kuluta kukapenja iyo yazgeŵa?” Kasi tikusambirapo vici? Baibolo likuti: “Mwakuyana waka, Ŵadada awo ŵali kucanya ŵakukhumba cara kuti yumoza wa ŵacoko aŵa watayike.”—Mateyu 18:12-14.
Waliyose “wa ŵacoko aŵa” ngwakuzirwa kwa Ciuta. Kasi Ciuta wakupenja wuli “iyo yazgeŵa”? Lemba ilo lili kukwambilira kwa nkhani iyi, likuti Yehova wakuguzira ŵanthu kwa iyo.
Kasi mazuŵa ghano mbanjani awo ŵakwenda mu zinthowa na mu nyumba za ŵanthu, kuphalirako ŵanyawo uthenga wa mu Baibolo?
Ciuta ndiyo wakwamba kucitapo kanthu kuti waguze ŵanthu ŵamitima yiwemi. Wonani umo wakacitira kale. Ciuta wakatuma Filipu kuti wakakumane na munthu munyake wa ku Etiyopiya, na kumulongosolera ivyo ucimi uwo munthu uyu wakaŵazganga ukung’anamura. (Milimo 8:26-39) Nyengo yinyakeso Ciuta wakatuma Petrosi kuti walute ku nyumba ya Koroneliyo, uyo wakalombanga na kuŵikapo mtima kusopa Ciuta. (Milimo 10:1-48) Ciuta wakalongozgeraso Paulosi na ŵanyake ku mlonga uwo ukaŵa kuwaro kwa msumba wa Filipi. Ku malo agha, ŵakakumana na Lidiya “musopi wa Ciuta,” ndipo “Yehova wakajura mtima wake kuti wategherezge.”—Milimo 16:9-15.
Nga umo tawonera, Yehova wakawovwiranga wose awo ŵakakhumbanga kumumanya. Kasi mazuŵa ghano mbanjani awo ŵakwenda mu zinthowa na mu nyumba za ŵanthu, kuphalirako ŵanyawo uthenga wa mu Baibolo? Ŵanandi ŵangazgora kuti, “Mbakaboni ŵa Yehova.” Ntheura jifumbani kuti, ‘Kasi Ciuta ndiyo wakuŵatuma kuti nane niŵe nayo paubwezi?’ Tikumuciskani kuti mulombe kwa Ciuta kuti wamovwirani kuti muzomere para wakumuguzani. *
^ ndime 8 Kuti mumanye vinandi wonelerani vidiyo yakuti Cifukwa Wuli Mukwenera Kusambira Baibolo? Vidiyo iyi, yili pa www.ps8318.com.
Panji Mungatemwa Kuŵerengaso Nkhani Izi
UPHARAZGI WAPADERA
Chifukwa Wuli Mukwenera Kusambira Baibolo?
Baibolo likuzgora mafumbo ghakuzirwa gha ŵanthu ŵanandi pa charu chose. Kasi mukukhumba kuti mafumbo ghinu ghazgoreke?
