Umo ŵanthu ŵakumumanyirani ni nkhani ya kumanya waka zina linu panji umo mukuwonekera yayi. Kweni vikusazgapo nkharo yinu, ivyo mukugomezga, kweniso wunthu winu panji kuti umo imwe muliri nadi.

Para mukujimanya makora umo muliri panji kuti fundo izo mukwendera, mukulondezga ivyo mukugomezga ndipo mukuyegheka waka yayi na ivyo ŵanyinu ŵakumuphalirani.

Adrian wakati: “Ŵanthu ŵanandi ŵali nga ni vidoli ivyo ŵakuvivwalika malaya ivyo tikuwona mu masitoro. Vikusankha yayi vyakuvwara, m’malo mwake ŵakuchita waka kuvisankhira.”

Courtney wakati: “Nasambira umo ningakanira kuchita viheni nanga ŵanyane ŵanganichichizga wuli. Nkhumanya awo ŵangaŵa ŵabwezi ŵane ŵanadi para nkhuwona umo ŵakuchitira vinthu kweniso umo ine nkhuchitira para tili lumoza.”

FUNDO YA MU BAIBOLO: “Lekani kutolera nkharo ya ŵanthu ŵa mu nyengo iyi, kweni musinthe maghanoghano ghinu.”—Ŵaroma 12:2.

Jimanyani umo muliri pasono kweniso umo mukukhumbira kuti munthazi muzakaŵire. Mungachita nthena para mungajisanda pa ivyo mukuchita makora, ivyo mukutondeka, kweniso ivyo mwasimikizga kuchita. Mafumbo ghakulondezgapo agha ghangamovwirani kuti muchite makora pa nkhani iyi.

Ivyo mukuchita makora: Kasi nili na maluso wuli? Kasi ni vigaŵa wuli ivyo nkhuchita makora chomene? (Mwachiyelezgero: Kasi nkhusunga nyengo, nkhujikora, nkhulimbikira ntchito kweniso ndine wakupa?) Kasi ni vinthu wuli ivyo nkhuchita makora?

IVYO MUNGACHITA: Kasi vikumusuzgani kumanya ivyo mukuchita makora? Fumbani mupapi winu panji mubwezi winu uyo mukumugomezga kuti wamuphalirani ivyo mukuchita makora na chifukwa chake.

FUNDO YA MU BAIBOLO: “Waliyose wapime mulimo wake, apo ndipo waŵenge na chifukwa chakukondwera pa iyo yekha, kwambura kujiyaniska na munthu munyake.”—Ŵagalatiya 6:4.

Ivyo mukutondeka kuchita makora: Kasi ni vinthu wuli ivyo nkhutondeka kuchita makora? Mphawuli apo kanandi nkhusangana na chiyezgo? Kasi ni vigaŵa wuli ivyo nkhwenera kujikora?

FUNDO YA MU BAIBOLO: “Usange tikuyowoya kuti: ‘Tilije zakwananga,’ tikujipuluska tekha ndipo unenesko mulije mwa ise.”—1 Yohane 1:8.

Ivyo mwasimikizga kuchita: Kasi nkhwendera fundo wuli ndipo chifukwa wuli? Kasi nkhugomezga kuti Chiuta waliko? Kasi pali vifukwa wuli ivyo nkhugomezgera kuti Chiuta waliko? Kasi ni vinthu wuli ivyo nkhuwona kuti ni vyambura urunji ndipo chifukwa wuli? Kasi ni vichi ivyo nkhugomezga kuti vichitikenge munthazi?

FUNDO YA MU BAIBOLO: “Kaghanaghaniro kawemi kakusungilirenge, ndipo umanyi ukuvikilirenge.”—Zintharika 2:11.