KUZIRWA KWAKE?

Ŵanyake ŵakuwona kuti para ŵafika mwakutendekera mtima ukuŵa m’malo kweniso ŵakuŵa na lumbiri luwemi. Chifukwa wuli?

Munthu uyo wakusunga nyengo wakuchita makora vinthu. Munthu uyo wakuchita vinthu pa nyengo yake wakuŵikapo mtima kuti vinthu vinyake vileke kutimbanizga ivyo wakhumbanga kuchita.

Munthu uyo wakusunga nyengo ŵanthu ŵakumugomezga. Ŵanthu ŵanandi mazuŵa ghano ŵakufiska yayi ivyo ŵalayizga, lekani ŵanthu ŵakutemwa uyo wakufiska ivyo walayizga. Ŵanthu awo mbakugomezgeka ŵakupika ntchindi na ŵanyawo kweniso ŵamubanja lawo. Mabwana ghakutemwa munthu uyo wakwamba na kumalizga ntchito pa nyengo yake. Awo mbakugomezgeka ŵangapika malipiro ghanandi ndipo mabwana ghawo ghakuŵagomezga chomene.

IVYO BAIBOLO LIKUYOWOYA

Malemba nagho ghakuti ntchakuzirwa kusunga nyengo. Mwachiyelezgero, Baibolo likuti: “Vinthu vyose vichitike mwakwenelera ndiposo mu ndondomeko.” (1 Ŵakorinte 14:40) Usange ŵanthu ŵapangana kuti ŵakumane pa nyengo na malo ghanyake, ntchiwemi kuti wose ŵafike panyengo yake. Baibolo likuti: “Kanthu kalikose kali na nyengo yake yakutemeka, nyengo ya chilichose icho chikuchitika pasi pa mtambo.” (Mupharazgi 3:1) Baibolo likutiso pali “nyengo ya kupanda na nyengo ya kuzgura ivyo vikapandika.” (Mupharazgi 3:2) Ŵalimi ŵakupanda mbuto pa nyengo yakwenelera mwakuti ŵazakavune vinandi. Fundo njakuti mulimi uyo wakuchita vinthu panyengo yake ndiyo vikumwendera makora.

Baibolo likuyowoya chifukwa chakuzirwa cha kusungira nyengo. Para tikusunga nyengo, tikulongora kuti tikuchindika ŵanyithu ndipo tikulongora kuti nawo nyengo yawo njakuzirwa. (Ŵafilipi 2:3, 4) Mwakuyana waka, awo nyengo zose ŵakutemwa kuti ŵanyawo ŵaŵalindilirenge, ndikuti wakwibira ŵanji nyengo.

“Kulaŵiska pa ivyo imwe mukukhumba pera yayi, kweniso ivyo ŵanyinu ŵakukhumba.”—Ŵafilipi 2:4.

IVYO BAIBOLO LIKUYOWOYA

Baibolo likuti tikwenera kunozgekera ivyo tikukhumba kuchita. (Zintharika 21:5) Para kanandi mukufika mwakuchedwa, ndikuti mukutangwanika na vinthu vinandi. Ntheura mukwenera kuvileka dankha vyambura kuzirwa. Nyengo zose para mwapangana mukwenera kutendekera na kuŵikapo mtima kuti mukafike mwaluŵiro. Ivi vingamovwirani kuti muleke kuchedwa nanga ni para mu msewu muli magalimoto ghanandi panji kuwaro kundache makora.

Baibolo likutichiska kuti tikwenera kuŵa ŵakujiyuyura. (Zintharika 11:2) Fundo iyi yikulongora kuti tikwenera kumanya kuti tingakwaniska yayi vyose. Nyengo zose mukwenera kumanya dankha usange mungafiska nadi ntchito pambere mundazomerezge. Usange mukutemwa kuzomera waka vinthu ivyo mungakwaniska yayi, ndikuti mukhalirenge waka kwenjerwa kweniso ŵanyinu ŵangaleka kumugomezgani.

Baibolo likutiso tikwenera kugaŵa makora nyengo yithu. (Ŵaefeso 5:15, 16) Nyengo zose muchitenge dankha vinthu ivyo ni vyakuzirwa chomene. (Ŵafilipi 1:10) Mwachiyelezgero, para mukulindilira basi panji munthu munyake, mungachitako vinyake kuti nyengo yileke kumalira pawaka.

“Maghanoghano gha munthu wachitatata ghakovwira kuti vinthu vyende makora.”—Zintharika 21:5.