Pa Sabata, November 20, 2022, ndilo zuŵa ilo ungano wa wupu wa COP27 United Nations Climate Change Conference ukamaliranga. Nangauli ŵakakolerana chimoza pa nkhani yakovwira vyaru ivyo vyakhwaskika na suzgo ili, kuti vizizipizge masoka agho ghakwiza chifukwa cha kusintha kwa nyengo, kweni ŵanandi ŵakuwona kuti ivi vingamazga yayi icho chikwambiska suzgo ili.

•     Pa November 19, 2022, António Guterres uyo ni mulembi wa wupu wa United Nations, wakati “Nkhukolerana navyo kuti tisunge thumba la ndalama zakovwira para kwachitika soka. Mbunenesko kuti kuchita ivi nkhwakukwana yayi . . . Nakuti charu chose chili pa ngozi yikuru chomene.”

•    “Charu chakhala pachoko chomene kunangikirathu na suzgo la kusintha kwa nyengo.”—Mary Robinson, pulezidenti wakale wa ku Ireland kweniso uyo kale wakaŵa UN High Commissioner for Human Rights, November 20, 2022.

 Ŵachinyamata ŵanandi ŵakufipa mtima chomene na umo vinthu vizamuŵira kunthazi pa charu chapasi. Ndipouli, fumbo lingaŵa lakuti, kasi vyaru vingakolerana na kufiska layizgo lawo lakumazga suzgo la kusintha kwa nyengo? Kasi Baibolo likutipo wuli?

 Baibolo likuphara pakweru kuti nanga ŵanthu ŵa mtima uwemi ŵangaŵikapo mtima kuyezga kumarana na suzgo ili, kweni ŵangafiska yayi kulimazga. Wonani vifukwa viŵiri ivyo tikuyowoyera nthena:

•    “Chinthu icho ntchakubendera chinganyoloskeka chara.”—Mupharazgi 1:15.

   Ng’anamuro lake: Maboma gha ŵanthu ngakutondeka chifukwa ŵanthu ŵakalengeka kuti ŵajiwusenge ŵekha yayi. (Yeremiya 10:23) Nanga vyaru vingakolerana, vingafiska yayi kumazga masuzgo agho ghali mu charu, nanga vingayezga nthowa iyi na iyi.

•    “Pakuti ŵanthu ŵazamuŵa ŵakujitemwa, ŵakutemwa ndalama, . . . ŵanonono.”—2 Timote 3:2, 3.

   Ng’anamuro lake: Baibolo likayowoyerathu kuti ŵanthu ŵanandi mu mazuŵa ghithu ghano ŵazamuŵa ŵakujighanaghanira ŵekha ndipo ŵazamuŵavya mtima wakuti ŵakolerane chimoza kuti vinthu viyende makora.

 Kweni chakukondweska ntchakuti, kuti vinthu vizakambe kwenda makora pa charu chapasi, vikuthemba pa ivyo maboma gha ŵanthu ghakulayizga yayi. Chiuta wali kusankha Muwusi uyo wangafiska kusintha vinthu, Yesu Khristu. Pakuyowoya vya iyo, Baibolo likuti:

•    “Kuwusa kuzamuŵa pa chiŵegha chake. Zina lake lizamuŵa Wakupeleka Fundo Wakuzizwiska, Chiuta Wankhongono, Dada Wamuyirayira, Karonga wa Mtende.”—Yesaya 9:6.

 Yesu ndiyo ni Fumu ya Ufumu wa Chiuta, panji kuti boma lakuchanya. (Mateyu 6:10) Iyo wali na nkhongono, vinjeru, na khumbo la kupwelelera charu chose kweniso ise taŵanthu. (Salimo 72:12, 16) Mu muwuso uwu, boma lakuchanya ili lizamuwuskapo wose awo “ŵakunanga charu chapasi” na kunozga vinthu vyose ivyo vili kunangika.—Chivumbuzi 11:18; Yesaya 35:1, 7.

 Kuti mumanye vinandi pa nkhani ya umo suzgo la kusintha kwa nyengo lizamumalira, ŵazgani nkhani yakuti, “Ivyo Baibolo Likuyowoya pa Nkhani ya Kusintha Kwa Nyengo na Ivyo Vikwiza Kunthazi.”