Pa April 5, 2020, chimphepo cha Harold, icho ntchankhongono chomene, chikaputa kumpoto kwa virwa vya Vanuatu ndipo chili kusakaza vinthu vinandi. Pa April 8, chimphepo ichi chikakanangaso vinthu kumwera cha kumafumiro gha dazi kwa virwa vya Fiji. Malipoti ghakulongora kuti palije yumoza wa ŵabali ŵithu uyo wapwetekeka panji kufwa na chimphepo ichi.

Ŵapharazgi 280 ŵakukhala ku Espiritu Santo, icho ntchirwa chikuru pa vyose kweniso chili kumpoto chomene pa virwa vyose vya Vanuatu. Nyumba na mbewu zinandi zili kusakazika chomene pa chirwa ichi kweniso pa virwa vya pafupi. Ku Fiji, katundu wa ŵapharazgi pafupifupi 260, uli kusakazika chomene. Pasono ku virwa ivi ŵanthu ŵanandi ŵakusoŵa maji, chakurya kweniso kulije magesi.

Ofesi ya munthavi ya Fiji yikupeleka wovwiri ku ŵabali na ŵadumbu ŵa pa virwa ivi. Ŵalara ŵakukhozga ŵabali na ŵadumbu awo ŵakhwaskika na soka ili. Ndise ŵakukondwa chomene kuti ŵabali ŵithu awo ŵakhwaskika na soka ili ŵakupokera wovwiri wakuthupi na wauzimu.—Zintharika 17:17.