Pa February 19, 2022, Mubali Didier Koehler, wa mu Komiti ya Munthavi ya France, wakafumiska buku la mu Baibolo la Makani Ghawemi Umo Wakalembera Mateyu mu Chiyowoyero cha Mawoko cha ku France. Buku ili likusangika pa webusayiti yithu ya jw.org kweniso pa JW Library Sign Language app ndipo mungachita dawunilodi. Buku ili la mu Baibolo la Malemba Ghakupatulika mu Mang’anamuliro gha Charu Chiphya ndakwamba kufumiskika na Ŵakaboni ŵa Yehova mu Chiyowoyero cha Mawoko cha ku France.

Ŵanthu pafupifupi 1,500 ŵakawonelera pulogiramu yakufumiska buku la mu Baibolo iyi. Mu nkhani yake, Mubali Koehler wakayowoya kuti: “Pakuti chiyowoyero ichi chikukhumba kuti munthu wachitenge kuwona, ŵakuchita kuyowoya na mawoko. Chisko, maso, na thupi la uyo wakuyowoya, vingalongora umo munthu uyo wakuyowoyeka wakajipulikiranga kweniso umo wakachitiranga vinthu. Tikupulikiska makora chomene! Nakuti chikuŵa chipusu kupulikiska mazgu gha mu Baibolo!”

Ŵakaboni ŵa Yehova ŵakamba kupharazga mu Chiyowoyero cha Mawoko cha ku France cha m’ma 1960. Kukwambilira kwa m’ma 1970, mpingo wakwamba wa Chiyowoyero cha Mawoko cha ku France ukapangika mu chigaŵa cha Vincennes ku Paris, France. Ndipo kukwambilira kwa m’ma 2000, Wupu Wakulongozga ukazomerezga Ofesi ya Munthavi ya France kuti yambepo mulimo wakung’anamura mu Chiyowoyero cha Mawoko. Mu 2019, pambere muliri undambe, awo ŵakachitanga mulimo wakung’anamura mu Chiyowoyero cha Mawoko ŵakaŵasamuskira ku Ofesi ya Munthavi ku Louviers, France. Pasono, pali mipingo 11 ya chiyowoyero cha mawoko na magulu 39 mu chigaŵa chose cha ofesi ya munthavi ya France.

Pasono ŵali kung’anamura dankha buku la Makani Ghawemi la Mateyu. Ndipo lakulondezgapo liŵenge buku la Makani Ghawemi la Yohane. Mabuku agha ghakulongosora makora chomene umoyo wa Yesu kweniso ngapusu kung’anamura pakuyaniska na mabuku ghanyake. Apo buku la Mateyu likaŵa kuti lindafumiskike, ŵapharazgi ŵakaŵa na mwaŵi wakuwonelera mavesi ghachoko waka mu Baibolo la Chiyowoyero cha Mawoko cha ku France.

Mudumbu munyake uyo ngwakumangwa ndipo wakuchitako mulimo wakung’anamura wakayowoya kuti: “Apo nkhaŵa mwana, nkhatemwanga chomene kuwona vithuzi vya mu buku la Munthu Mukuru Kuluska Wose Awo Ŵali Kuŵako. Ntheura nati nawonelera buku la Mateyu lakuchita kujambura ili mu Chiyowoyero cha Mawoko, nkhakumbuka vithuzi vyose ivyo nkhatemwanga kuwona apo nkhaŵa mwana. Aka kakaŵa kakwamba pa umoyo wane kuti nipulikiske makora.”

Munyakeso uyo nayo wakuchitako mulimo wakung’anamura uwu wakayowoya kuti: “Ŵapapi ŵane mbakumangwa, ntheura nkhakhumbisiskanga chomene kuti kufumiskike Baibolo la Chiyowoyero cha Mawoko cha ku France. Kweni nkhaghanaghanangako yayi kuti nane ningazakachitako mulimo wa wakung’anamura uwu. Buku ili ntchawanangwa chapadera chomene!”

Takondwa chomene chifukwa chakufumiskika kwa buku la mu Baibolo ili mu Chiyowoyero cha Mawoko cha ku France. Uwu mbukaboni wakuti Yehova wachali kuchema ŵanthu kuti “ŵatore maji gha umoyo kwawanangwa.”—Chivumbuzi 22:17.