Nga umo tikayowoyera pa March 9, 2023, munthu uyo wakaŵa na futi wali kulasa ŵabali na ŵadumbu pa Nyumba ya Ufumu ya Hamburg-Winterhude pamanyuma pakuti maungano ghamukati mwasabata ghamara waka. Pamanyuma pakuti wakoma na kupweteka ŵabali na ŵadumbu ŵanandi, munthu uyu wakaleka kulasa ŵabali na ŵadumbu ŵapolisi ŵati ŵanjira mu Nyumba ya Ufumu. Wati wawona ŵapolisi munthu uyu wakajilasa yekha. Ŵakaboni ŵa Yehova ku malo agha kweniso pa charu chose, ŵakuwonga chomene lusungu na chitemwa, icho ŵalara ŵaboma, mawupu, kweniso ŵanthu ŵakupambanapambana pa charu chose chapasi ŵakalongora.

• Chachitima ntchakuti ŵabali ŵanayi, ŵadumbu ŵaŵiri, na mwana wa mudumbu uyo wakaŵa wandababike ŵali kukomeka.

• Ŵabali ŵaŵiri na ŵadumbu 7 ŵakapwetekeka

• Ŵabali ŵakwimira ofesi ya munthavi ya Central Europe, ŵalaŵiliri ŵadera ŵaŵiri, na ŵalara ŵa ku malo agha ŵakupembuzga na kukhozga ŵabali na ŵadumbu aŵa

Pakuŵa ŵakukolerana, tikuŵalombera ŵabali na ŵadumbu awo ŵali kukhwaskika pa chiŵembu ichi. Yehova “ni linga lakukhora mu zuŵa la suzgo,” ndipo watovwirenge kuti tizizipizge nyengo zakusuzga izi apo tikulutilira kusopa mwamtende.—Nahumu 1:7.