Mu April 2012, Vivienne Falcone wa vyaka 7, ŵapapi ŵake ŵakamutuma kalata kuti wakapeleke kwa ahedi yakupempha kuti ŵamuzomerezge kuzakakhala ku sukulu zuŵa limoza la Chinkhondi. Ŵapapi ŵake ŵakakhumbanga kuti ŵalute nayo ku ungano wa mazuŵa ghatatu wa Ŵakaboni ŵa Yehova ku Mainz. Kweni ŵalara ŵa pa sukulu ŵakakana pempho ili. Pakuti ŵapapi ŵa Vivienne ŵakakhumbanga chomene kuti mwana wawo wakasambire vya Chiuta, ŵakaluta nayo. Pamanyuma, ŵapapi ŵa Vivienne ŵakatolera nkhani iyi ku Unduna wa vya Masambiro ku Germany. M’malo mwakuzomerezga kuti ungano uwu ni holide ya chisopa, unduna uwu ukuŵayimba mulandu na kuŵaphalira kuti ŵalipire ndalama.

Ivyo Unduna uwu ukadumura, mphanyi vikapangiska ŵapapi ŵa Vivienne kusangika na mulandu unyake. Chifukwa ntchakuti boma la Germany lili na dango lakuti mupapi waliyose wakwenera kutumizga mwana wake ku sukulu, ndipo wakwenera yayi kumukhazika pa chifukwa chambura kwenelera. Waliyose uyo waswa dango ili wakuŵa na mulandu ndipo ŵakumulipiliska panji kumujalira mu jele para wakulutilizga. Kweni ŵapapi ŵa Vivienne ŵakawona kuti unduna uwu waswa wanangwa wawo wa kusopa, na kulera mwana wawo kuyana na ivyo ŵakugomezga.

Ŵapapi ŵa Vivienne, Stefano na Elisa, ŵakamangalira unduna uwu ku khoti. Iwo ŵakati maungano ghakuŵapa mwaŵi wakusopa Chiuta kweniso kuti ŵaŵe na chipulikano chakukhora. Lekani ŵakawona kuti chikaŵa chambura kwenelera kuti mwana wawo wakhale ku ungano nanga lingaŵa zuŵa limoza. Iwo ŵakati: “Ungano wa mazuŵa ghatatu tikuŵa nawo kamoza pa chaka ndipo ngwakuzirwa chomene pakusopa kwithu.” * Khoti likati ŵalije mulandu chifukwa ungano uwo Ŵakaboni ŵa Yehova ŵakuchita wa mazuŵa ghatatu, nawo ni holide yachisopa. Unduna uwu ukachita apilu. Ukati maungano gha Ŵakaboni ŵa Yehova ni maholide ghachisopa yayi chifukwa ghakupambana na maholide ghanyake nga Khisimasi, na Isitara.

Pa July 27, 2015, Khoti Likuru la Hesse likakolerana na ivyo khoti lichoko likadumura. Khoti ili likadumura kuti holide yikuŵa yachisopa kuyana na umo ŵenecho ŵakuwonera. Khoti likati pali mphambano pakati pa nkhani za chisopa na za boma, ndipo likati: “Para boma likunjilirapo pa nkhani za chisopa ndikuti likuswa wanangwa wakusopa uwo Malango gha Charu cha Germany ghakupeleka ku ŵavisopa. Malango agha ghakuzomerezga kuti matchalitchi ghalondezge ivyo ghakugomezga.” Khoti ili likayowoyaso kuti:“Boma likwenera kunjilirapo yayi pa vyachisopa.”

Khoti likuru likayowoyaposo za webusayiti yakuzomerezgeka ya Ŵakaboni ŵa Yehova. Ilo likati pa webusayiti iyi pakusangika vya maungano ghakurughakuru gha Ŵakaboni ŵa Yehova, kulongora kuti nagho ni maholide gha chisopa chawo. Khoti likati unduna uwu “ukaswa wananga wa mwana, kweniso wa ŵapapi kuti ŵalere mwana wawo kuyana na ivyo ŵakugomezga.” Paumaliro khoti likati ivyo unduna uwu ukachita “vikupambana na malango gha Germany.”

Khoti lati laŵadumulira makora mulandu, ŵapapi ŵa Vivienne ŵakati: “Ise Ŵakaboni ŵa Yehova tikuwona kuti ntchakuzirwa kuti ŵana ŵalutenge ku sukulu, ndipo tikuchiska ŵana ŵithu kuti ŵatemwenge sukulu. Kweni tikuwona kuti masambiro ghauzimu ndiwo ngakuzirwa chomene, chifukwa ŵana ŵakusambizgika kutemwa Chiuta, kweniso kuŵa mubwezi wawo. Ivi vikovwira ŵana kuti ŵatemwenge ŵanyawo, ŵaŵe ŵalusungu, kweniso ŵakhalenge makora na ŵanyawo. Tikuwonga chomene chifukwa cha ivyo khoti ladumura.”

Armin Pikl uyo ni loya wa ŵapapi ŵa Vivienne, wakati: “Ivyo khoti ili likadumura vikulongora kuti maungano ghakurughakuru gha Ŵakaboni ŵa Yehova ngakuzirwa chomene, ndipo ghakovwira ŵapapi kuti ŵasambizgenge makora ŵana ŵawo kuyana na ivyo ŵakugomezga. Ŵana awo Mbakaboni ŵa Yehova ŵakwenera kupika mwaŵi wakuti ŵakhale ku sukulu kuti ŵalutenge ku maungano agha. Nkhugomezga kuti mu vyaru vinyake namo, makhoti ghachitenge mwakuyana waka.”