Pa September 25, 2021, buku la mu Baibolo la—Makani Ghawemi Umo Wakalembera Mateyu lakuŵelengera pa Intaneti, likafumiskika mu Chihmong. Mubali Geoffrey Jackson, uyo ngwa mu Wupu Wakulongozga, ndiyo wakafumiska buku la mu Baibolo ili panyengo ya ungano wapadera uwo ukachitikira pa Intaneti, ndipo ŵanthu ŵakujumpha 2,500 pa charu chose ŵakawonelera.

Ili ni buku lakwamba la mu Baibolo la Malemba Ghakupatulika mu Mang’anamuliro gha Charu Chiphya kufumiskika mu Chihmong, icho chikuyowoyeka na ŵanthu ŵakujumpha 3.9 miliyoni pa charu chose. a Ŵanthu ŵanandi awo ŵakuyowoya Chihmong, ŵakugomezga kuti vinthu ivyo vili kulengeka vili na umoyo ndipo vikwenera kusopeka. Kweniso ŵakugomezga kuti charu chili pasi pa mazaza gha mizimu yiwemi na yiheni, ndipo mizimu iyi yingalongozgeka na ŵanthu awo ŵali na nkhongono zapadera.

Cha m’ma 1970 ŵanthu ŵanandi awo ŵakuyowoya Chihmong ŵakachimbilira ku misasa ya awo ŵachimbira kwawo ku Thailand. Mukuluta kwa nyengo, ŵanandi mwa ŵanthu ŵakuchimbira kwawo aŵa ŵakaluta mu vyaru vinyake ndipo ŵanandi ŵakasamukira ku United States.

Mazuŵa ghano, ŵanthu ŵakuyowoya Chihmong awo ŵakukhala ku United States ŵakusangika chomene ku California, Minnesota, na Wisconsin. Ŵakaboni ŵa Yehova ŵakamba kung’anamura mabuku gha mu Chihmong mu 2007. Mu 2012, ofesi ya kung’anamulirako mabuku yikazengeka ku Sacramento, California.

Awo ŵakang’anamuranga buku la Mateyu ŵakamalizga ntchito yakung’anamura buku ili kwa myezi yitatu. Ŵakawovwirika na gulu la ŵanthu ŵakufuma mu vyaru vyakupambanapambana 5 kuti ŵawone usange ivyo vyang’anamulika vikupulikikwa makora.

Awo ŵakang’anamuranga buku la mu Baibolo ili ŵakasangana na masuzgo ghakuru apo ŵakachitanga ntchito iyi. Chiyowoyero cha Chihmong, icho chikamba kulembeka cha m’ma 1950, chilije malango gha kalembero pa nkhani ya masipeling’i na vinyake ivyo ŵanthu wose ŵakwenera kulondezga.

Mabaibolo gha mu chiyowoyero ichi ghakamba kusangika cha m’ma 1980, kweni ŵanthu ŵanandi awo ŵakuyowoya chiyowoyero ichi ŵakakwaniskanga yayi kugura Mabaibolo agha chifukwa ghakaŵa ghakudura chomene. Kweniso Mabaibolo agha ghakaŵa na vinthu vinandi vyakubudika ivyo vikapangiskanga kuti unenesko wa mu Malemba uleke kupulikikwa makora. Mwachiyelezgero, Baibolo linyake likawuskamo zina leneko la Chiuta, lakuti Yehova, na kuŵikamo zina linyake ilo likayowoyanga za chiuta uyo wakuzunulika mu vidokoni vya ŵa Hmong.

Munthu munyake uyo nayo wakang’anamurako wakati: “Na buku la mu Baibolo la Mang’anamuliro gha Charu Chiphya mu chiyowoyero cha Chihmong, ŵanthu ŵa mtima yiwemi ŵaŵenge na mwaŵi wakuŵerenga zina la Yehova mu Baibolo lawo na kuŵa nayo paubwezi. Ichi ndicho tikalindiliranga ndipo tikalombanga kwa vyaka vyose ivi.”

Ŵanthu awo ŵakuŵerenga buku la mu Baibolo ili ŵakuwonga chomene kuti ŵali na Baibolo ilo lili kung’anamulika makora kweniso lambura kusuzga kuŵerenga. Munthu munyake uyo wakuŵerenga buku la mu Baibolo ili wakuti: “Nati naŵerenga buku la Mateyu mu chiyowoyero cha Chihmong, nkhazizwa chomene. Nkhajifumba kuti, ‘Chifukwa wuli nkhukhwaskika chomene para nkhuŵerenga Baibolo ili?’ Nati namba waka kuŵerenga buku ili nkhamba kuwona nga kuti nkhani izo nkhuŵerenga zikuchitika nadi.”

Kufumiskika kwa buku la Mateyu mu chiyowoyero cha Chihmong mbukaboni wankhongono wakuti Chiuta withu wambura kutemwera wapangiskenge Mazgu ghake kuti ghafikire ŵanthu wose awo ŵakumupenja.—Milimo 10:34, 35.