A tauavaga kolā e āva e iloa i ei me atafai eiloa te suā tino ki te suā tino, faitalia me isi se mea e se loto tasi lāua ki ei. “A tauavaga konei e se taki nofo loa te tino i a ia eiloa mo tena se malie ki te suā tino,” ko pati mai i te tusi ko te Ten Lessons to Transform Your Marriage. “I lō te fai penā, e sau‵tala eiloa lāua ki mea kolā e se ma‵lie a lāua ki ei. E fakalogologo faka‵lei a te suā tino ki te suā tino mo te āva, kae e ‵sala ne lāua a te ‵toe auala ‵lei ke faka‵lei aka i ei a te lā fakalavelave kae ke ‵lei foki a te fakatokaga tenā ki a lāua.”

FAKATAKITAKIGA MAI TE TUSI TAPU: “A te alofa . . . e se salasala ki mea mō tena ‵lei eiloa.”—1 Kolinito 13:4, 5.

“Ke āva au ki taku avaga fafine e fakauiga loa me e fiafia lasi au ki ana uiga ‵gali, kae ka se talia lele eiloa ne au se mea telā e mafai o fakamasei ne au a ia io me ko te maā olaga fakatauavaga.”—Micah.

Kafai e seai se āva i te tauavaga, ka iku atu lā fesokotakiga ki te fakamasei ne te suā tino a te suā tino ki pati fakatauemu, ke oko foki eiloa ki te fakaaogaga o pati se ‵lei—ko uiga kolā e fai mai a tino suke‵suke me e mafai o iku atu ei ki te ‵talaga o te avaga.

“A te faiga o pati sē āva, pati faka‵mae loto mo vaegā pati faifa‵kata kolā e fakamasei ei ne koe a tau avaga fafine, e tamate fua ne koe a te loto talitonu o tou avaga ki a koe, kae ka fakamasei foki i ei a te lua olaga fakatauavaga.”—Brian.

KE TOFOTOFO AKA A KOE KI EI

Onoono faka‵lei ki au faifaiga mo te auala e fai ei ne koe au fesokotakiga i loto i te vaiaso. Ko fesili ifo ei a koe ki a koe eiloa penei:

• ‘E pefea te uke o taimi ne fakamasei sāle ne au a taku avaga, kae pefea a te uke o taimi ne fai ne au a pati fakamālō ki tou fafine?’

• ‘Ne a auala ne fakaasi atu ei ne au te āva ki taku avaga?’

KE SAU‵TALA KI EI MO TAU AVAGA

• Ne a faifaiga mo pati e mafai o fesoasoani atu ki a koulua ke fakaasi atu a te āva o te suā tino ki te suā tino?

• Ne a faifaiga mo pati e fai ei ke se āva te suā tino ki te suā tino?

NISI MANATU FESOASOANI

• Ke tusi ki lalo a auala e tolu e manako ei koe ke fakaasi atu ne tau avaga a te āva ki a koe. Kae ke fai foki penā ne tau avaga ki a koe. Fesuiaki a lua manatu konā ne tusi ki lalo, kae ke ga‵lue ki mea kolā ne fakaasi ne te suā tino ki te suā tino ke ga‵lue koulua ki ei.

• Fai se fakasologa o uiga ‵gali kolā e fiafia i ei a koe ki tau avaga. Kae ke fakaasi ‵tonu atu ne koe ki tau avaga a te ‵gali o ana uiga konā ki a koe.

“A te āva ki taku avaga tagata e fakaasi atu i aku faifaiga me e tāua ‵ki a ia ki au kae manako foki au o fakafiafia atu faeloa ki a ia. Kae e se fai fua pelā me fakaasi atu a toku āva ki a ia i mea ‵lasi fua e fai ne ia, kae i mea fo‵liki foki e tumau eiloa o fakaasi atu ne au a toku āva tonu ki a ia.”—Megan.

I te fakaotiga loa, e se ‵tau o fakatāua ne koe a tau kilokiloga ki a koe me e mata e āva a koe io me ikai; kae ko te lagonaga o tau avaga me e āva atu koe ki ei io me ikai.

FAKATAKITAKIGA MAI I TE TUSI TAPU: “Ke fakapei ki luga i a koutou a te alofa atafai, te atafai, te loto maulalo, te agamalu mo te kufaki.”—Kolose 3:12.