Tenā te fakaikuga a te tīmu fai sukesukega e uiga ki te mafulifuliga o tau o aso. Kafai e talitonu koe me isi se Mafuaga telā e atafai ki tino, kāti ka fai ne te fakaikuga tenei ke masaua ne koe a te auala ne faite ne te Atua a te ‵tou paneta tenei ke toe faka‵lei aka ne ia i a ia eiloa a nisi mea kolā ko oti ne fakamasei aka i ei.

Kae i te onoono atu ki te tulaga o fakamaseiga ko oti ne fai ne tino ki te lalolagi, ko uke atu a faka‵leiga e manakogina ke fai ki ‵tou paneta i lō auala masani kolā e faka‵lei aka ne ia i a ia eiloa, ko te mea ke tumau eiloa te ‵tou paneta. Kaia e tali‵tonu tatou me isi se faiga a te Atua ka fai ki ei?

Onoono ki tusi fai‵tau mai lalo i te pokisi kolā e fakamautinoa mai me ka tumau eiloa te lalolagi kae olaola ‵lei foki.

• Ne faite te ‵tou paneta ne te Atua. “I te kamataga ne faite ne te Atua a te lagi mo te lalolagi.”—Kenese 1:1

• Te paneta tenei i a te Atua. “A te lalolagi mo mea katoa i ei i a Ieova.” a—Salamo 24:1

• Ne faite ne te Atua a te ‵tou paneta ke tumau. “Ko oti ne faka‵mautakitaki ne ia te lalolagi ki ana fakavae; ka se fakagasue eiloa mai tena koga ke oko ki te se-gata-mai, se-gata-mai eiloa.”—Salamo 104:5

• Ne folafola mai te Atua me ka tumau te ola i te ‵tou paneta ki te se-gata-mai. “Te Atua tonu, te Atua telā ne fakafoliga ne ia te lalolagi, . . . ne seki faite fua ne ia ke se aoga, kae ne faite ke ‵nofo i ei a tino.”—Isaia 45:18

• Ne folafola mai te Atua me ka ola a tino ki te se-gata-mai i te ‵tou paneta. “A tino amio‵tonu ka fai mō latou te lalolagi, kae ka ‵nofo latou i ei ki te se-gata-mai.”—Salamo 37:29.

Ne faite ne te Atua a te lalolagi ke mafai o ola fiafia a te tagata e aunoa mo te fakamasei atu ki ei. E ‵valo mai te Tusi Tapu me ka fakaseai ne Ieova te Atua i tena taimi tonu a faifaiga e fai ne tino ke fakamasei ei te ‵tou paneta.—Fakaasiga 11:18

E folafola mai te Tusi Tapu me i te taimi tenā ka ‵fuli ne te Atua a te ‵tou paneta ki se palataiso ‵lei kae gali kae ‵tala tena lima ke “fakama‵lie . . . a manakoga o mea ola katoa.”—Salamo 145:16.