E tokouke a tino i te lalolagi kātoa e seai ne mea‵kai mo fale. Nisi tino e ma‵nako ki se olaga ‵lei i aso mai mua. E mafai pefea o maua ne tatou te taliaga mo te fakamanuiaga a te Atua mai te fesoasoani atu ki vaegā tino penā?

“A te tino e fakaasi atu te alofa ki tino ma‵lalo e avatu ne ia a mea ki a Ieova, kae ka toe ‵togi atu ne Ia ki tou tagata e ‵tusa mo tena mea ne fai.”—FAATAOTO 19:17.

Ne fai ne Iesu se tala fakatusa e uiga ki se tagata telā ne ta ne tino kai‵soa kae tuku ke mate. (Luka 10:29-37) Ne tu atu se tino fakaa‵tea o fesoasoani kae tausi atu ki te tagata pakia tenā. Ne fai ne ia te mea tenei faitalia me ko ia se tino fakaa‵tea.

Ne seki tuku atu fua ne te tagata alofa tenei a te fesoasoani muamua ki te tino pakia, kae ne fakamafanafana foki ne ia tou tagata, maua i ei ne ia se fakatapūga mai tena logo‵mae.

Se a te mea e tauloto ne tatou mai te tala fakatusa tenei? Ne fakaasi mai ne Iesu me e ‵tau mo tatou o fesoasoani atu ki tino kolā e ma‵nako ki se fesoasoani i so se feitu. (Faataoto 14:31) E akoako mai te Tusi Tapu me ka fakagata ne te Atua a te tulaga mativa mo logo‵maega. Kae e mafai o mafau‵fau tatou penei, i te auala fea mo te taimi fea ka fai ne te Atua te mea tenā? Ka fakamatala mai i te suā mataupu a fakamanuiaga kolā ne fakatoka ne te ‵tou Mafuaga alofa mō tatou.