Ki te Kau i Filipi 2:1-30
2 Tela la, kafai e maua ne koutou se fakamalosiga i a Keliso, kafai e isi se fakamafanafanaga ona ko te alofa, kafai e amanaia a te suā tino ki te suā tino, kafai e isi se alofa mo te alofa atafai,
2 e fakakatoatoa ei toku fiafia mai i te tasi o otou mafaufau mo te tasi o te otou a‵lofa, e fealofani katoatoa, kae e tasi koutou i otou manatu.+
3 Ke se fai ne koutou se mea i te loto fakatautau+ io me ko te fia takutakua,+ kae i te loto maulalo mo te manatu me e tāua atu a nisi tino i a koutou,+
4 ke se onoono fua koutou ki mea e ‵lei ei koutou+ kae ki mea foki e ‵lei ei a nisi tino.+
5 Ke fakatumau te kilokiloga tenei i otou mafaufau e pelā eiloa mo Keliso Iesu,+
6 me e tiga eiloa ne foliga a ia ki foliga o te Atua,+ ne seki mafaufau eiloa a ia o puke te tulaga tenā mai te fai atu me e ‵pau lāua mo te Atua.+
7 Ikai, kae ne tiaki ne ia ana mea katoa kae fai mo fai se pologa+ i tena faiga e pelā me se tagata.+
8 Kae e sili atu i te mea tenā, i tena vauga e pelā me se tagata, ne fakamalalo ne ia a ia eiloa kae ne fakalogo foki ke oko eiloa ki te mate,+ ao, ko te mate i luga i te pou fakasaua.*+
9 Ko te pogai eiloa tenei ne fakamaluga aka ei ne te Atua a ia ki se tulaga telā e maluga atu+ kae tuku atu ki a ia mo te kaimalie a te igoa telā e sili atu i nisi igoa katoa,+
10 ko te mea ke ifo atu ki a ia a tino katoa i te lagi mo tino i te lalolagi mo tino i lalo i te laukele i te igoa o Iesu,+
11 kae ka fakaasi ‵tonu atu ei i gutu o tino katoa i a Iesu Keliso ko te Aliki+ mō te vikiga o te Atua te Tamana.
12 Tela la, e oku taina pele, e pelā eiloa mo te otou tumau i te faka‵logo i aso mua, e se i taimi fua e fakatasi ei tatou kae e sili atu māfai au e galo, ke tumau i te ga‵lue mō te otou fakaolataga mo te ma‵taku mo te pole‵pole.
13 Me ko te Atua eiloa telā e fai ne ia koutou ke ma‵losi, i te tukuatuga o te fiafia mo te ‵mana ke ga‵lue koutou e ‵tusa mo te mea e fiafia a ia ki ei.
14 Ke fai faeloa ne koutou a mea katoa e aunoa mo te mui‵mui+ mo te kinau,+
15 ko te mea ke ‵ma kae seai se mea e ‵losi atu ki a koutou, kae ke fai koutou mo tama a te Atua+ e aunoa mo se pona i loto i te kautama fai mea piko‵piko+ kae ‵numi valevale tenei, telā e maina atu koutou ki ei e pelā me ne moli i te lalolagi,+
16 mai te puke ‵mau ki te muna o te ola.+ Tenā ko maua ei ne au se pogai e fiafia ei au i te aso o Keliso, i te iloa atu me ne aoga eiloa taku tele mo toku galue ‵mafa.
17 Kae e tiga eiloa e ‵ligi atu au e pelā me se taulaga uaina+ ki luga i te taulaga+ mo te taviniga ‵malu kolā ne iku mai i te otou fakatuanaki, e fiafia eiloa au fakatasi mo koutou katoa.
18 E penā foki te auala e ‵tau ei o fia‵fia fakatasi koutou mo au.
19 Kae e fakamoemoe au ki te Aliki ko Iesu ke uga atu a Timoteo+ ki a koutou i se taimi pili mai mua nei, ko te mea ke fakamalosi aka ei au māfai e lagona ne au a tala e uiga ki a koutou.
20 Me e seai aka foki se isi tino i konei e ‵pau ana faifaiga mo ia, telā ka saga faka‵lei atu ki mea e uiga ki a koutou.
21 Me e ‵sala atu eiloa a nisi tino katoa ki mea e ma‵nako latou ki ei, kae e se ki mea e manako ki ei a Iesu Keliso.
22 Kae e iloa ne koutou a te fakamaoniga telā ne tuku mai ne ia, me ne ga‵lue fakapologa eiloa māua i te fakatelega ki mua o te tala ‵lei e pelā eiloa me se tama+ mo tena tamana.
23 Tela la, tenei eiloa te tino e fakamoemoe au ke uga atu i te taimi e iloa ei ne au a te mea ka tupu ki a au.
24 Me e talitonu eiloa au ki te Aliki me ka fanatu foki au i se taimi pili mai nei.+
25 Kae i te taimi nei e mafaufau au o uga atu a Epafeloti ki a koutou, ko toku taina telā e ga‵lue fakatasi māua e pelā me ne sotia, kae ko te otou sui foki mo toku fesoasoani i mea e manako au ki ei,+
26 me ko oko eiloa i tena fia fetaui mo koutou katoa kae e mafatia foki tena loto me i a koutou ne ‵logo i a ia ne masaki.
27 E tonu, ne masaki a ia kae toeitiiti ko mate; kae ne maua ne ia te alofa fakamagalo o te Atua, e se gata fua ki a ia kae e pelā foki ki a au, ko te mea ke mo a ma taotaomaki mai ki a au a te fanoanoa.
28 Tenā te pogai ka uga fakavave atu ei ne au a ia, ko te mea ke fia‵fia koutou māfai e toe fetaui koutou kae ke tai feoloolo aka foki toku fanoanoa.
29 Tela la, fakafetaui atu ki a ia i te fakatalofa masani i te Aliki mo te fiafia lasi, kae āva malosi faeloa ki vaegā tino penā mo te loto fiafia,+
30 me toeitiiti ko mate a ia ona ko te galuega a Keliso,* i te talia ne ia ke tu tena ola i se tulaga fakamataku* ke sui ne ia koutou me i a koutou e se ‵nofo i konei o fesoasoani mai ki a au.+
Fakamatalaga mai lalo
^ Io me kāti, “ko te galuega a te Aliki.”
^ Io me “tuku faka‵sau atu tena ola ki mea fakama‵taku.”
