Kenese 18:1-33
18 Mai tua ifo i ei, ne fakasae atu a Ieova+ ki a Apelaamo i va o lakau ‵lasi o Mamele+ i te taimi ne sagasaga ei a ia i te mataloa o te faleie i te ‵toe taimi ‵vela eiloa o te aso.
2 Ne kilo aka a ia kae lavea ne ia a tāgata e tokotolu e ‵tu ‵mao mai.+ I te laveaga ne ia latou, ne tele atu a ia mai te mataloa o tena faleie o fakafetaui ki a latou, kae ne ifo a ia ki lalo i te laukele.
3 Tenā ne fai atu ei a ia: “Ieova, kafai e fiafia mai koe ki a au, fakamolemole sa fakaseke koe i tau tavini.
4 Fakamolemole, ke aumai ne au ne mu vai mo ‵fulu otou vae;+ ko malō‵lo ei koutou i lalo o te lakau.
5 Ona ko koutou ne afe mai penei ki te otou tavini, ke aumai ne au ne mu falaoa ke fakama‵losi aka ei koutou.* Tenā ko mafai ei koutou o olo i te otou auala.” Ne fai atu latou: “Ko ‵lei la. Ke na fai te mea tenā ne fai mai ne koe.”
6 Ne tele fakavave atu a Apelaamo ki a Sala i te faleie kae fai atu: “Fakavave! Puke mai ne sea* falaoa ‵mata ‵lei e tolu, palu, kae fai ne falaoa mai i ei.”
7 Oti aka, ne tele a Apelaamo ki te lafu pulumakau kae fili mai ne ia se tamā pulumakau tagata putaputa kae ‵lei. Ne tuku atu ne ia ki tena tavini telā ne fakatoka fakavave ne ia.
8 Tenā ne puke ei ne ia a pata mo susu mo te tamā pulumakau tagata telā ko oti ne fakatoka kae laulau atu a meakai i olotou mua. Tenā ne tu ei a ia i olotou tafa mai lalo o te lakau i te taimi ne ‵kai ei latou.+
9 Ne fai atu latou ki a ia: “Tefea tau avaga ko Sala?”+ Ne tali atu a ia: “Tenei i loto i te faleie.”
10 Ne toe fai atu se tokotasi i a latou: “Au ka toe foki mai ki a koe i te suā tausaga i te taimi eiloa penei, kae kiloke! a tau avaga ko Sala ka maua ne ia se tamaliki tagata.”+ I te taimi nei, a Sala e fakalogologo mai i te mataloa o te faleie, telā e tu mai tua o te tagata tenei.
11 A Apelaamo mo Sala ko ma‵tua ‵ki.+ Kae ko Sala ko se mafai o fanau.+
12 Ne kata a Sala kae fai ifo ki a ia eiloa: “Au nei ko lomatua kae ko toeaina foki taku avaga, e mata, ka maua eiloa ne au a te fiafia tenei?”+
13 Tenā ne fai atu ei a Ieova ki a Apelaamo: “Kaia ne kata ei a Sala kae fai ifo penei, ‘E a, e tonu eiloa i a au ka fanau e tiga eiloa au ko lomatua?’
14 E mata, e isi se mea ko tō faigata ki a Ieova?+ Au ka toe foki mai ki a koe i te suā tausaga i te taimi eiloa penei, kae ko Sala ka maua ne ia se tamaliki tagata.”
15 Ne fakafiti a Sala kae fai atu, “Au e seki kata!” me i a ia ko mataku. Ne fai atu tou tagata: “Ao! A koe ne kata eiloa.”
16 I te taimi ne ‵tu aka ei a tāgata konā o olo kae ‵kilo atu ki Sotoma,+ kae ko Apelaamo ne sa‵sale fakatasi mo latou.
17 Muna a Ieova: “Ka se ‵funa eiloa ne au mai i a Apelaamo a mea kolā ka fai ne au.+
18 E mautinoa eiloa me ka fai a Apelaamo mo fai se fenua lasi kae malosi, kae ko atufenua katoa o te lalolagi ka fakamanuiagina* e auala i a ia.+
19 Ko oti ne iloa ‵lei ne au a ia ko te mea ke fakatonu ne ia ana tama tāgata mo tena kaukāiga mai ana tua ke tau‵tali i auala o Ieova mai te faiga o te mea tonu mo te fakamasinoga tonu,+ ko te mea ke mafai ne Ieova o fakataunu a te mea telā ne folafola ne ia ki a Apelaamo.”
20 Tenā ne fai atu ei a Ieova: “Ko oko eiloa i te lasi o te ‵tagi mai o tino e uiga ki Sotoma mo Komolo,+ kae ko oko eiloa i te ‵mafa o te lotou agasala.+
21 Ka fanaifo au ki lalo o onoono me e mata, e fai ne latou a amioga e ‵tusa mo te ‵tagi telā ko oko mai ki a au. Kafai e se fai penā, ko iloa ei ne au.”+
22 Tenā ne tiaki ei ne tāgata a te koga tenā kae olo ki Sotoma, kae ko Ieova+ ne ‵nofo mo Apelaamo.
23 Tenā ne fanatu ei Apelaamo kae fai atu: “E mata, ka fakaseai eiloa ne koe a tino amio‵tonu fakatasi mo tino amio ma‵sei?+
24 Kafai e toko 50 a tāgata amio‵tonu i loto i te fakai. E mata, ka fakaseai eiloa ne koe latou kae e se fakamagalo ne koe a te fakai tenā ona ko te toko 50 tāgata amio‵tonu kolā e ‵nofo i ei?
25 E se taitai eiloa o fai ne koe se vaegā mea penei, ke tamate ne koe te tino amiotonu fakatasi mo te tino amio masei, ko ‵pau ei a te ikuga o te tino amiotonu mo te tino amio masei!+ E se taitai eiloa o fai ne koe a te mea tenei.+ E mata, ka se fai ne te Famasino o te lalolagi kātoa a te mea tonu?”+
26 Muna a Ieova: “Kafai e maua ne au i Sotoma a tāgata amio‵tonu e toko 50, ka fakamagalo eiloa ne au te fakai kātoa ona ko latou.”
27 Kae ne toe fai atu a Apelaamo: “Fakamolemole, ko taumafai malosi eiloa au o faipati atu ki a Ieova, kae ko au nei ne faite fua ki ‵pefu mo lefu.
28 Kafai e toe tokolima fua a tāgata kae kātoa a tāgata amio‵tonu e toko 50, e mata, ka fakaseai eiloa ne koe a te fakai kātoa ona fua ko te tokolima konā?” Ne tali atu a ia: “Ka se fakaseai ne au a te fakai tenā māfai e maua atu ne au a tāgata e toko 45 i konā.”+
29 Kae ne toe fai atu a Apelaamo ki a ia: “Kae pefea la māfai e toko 40 fua a tāgata i ei?” Ne tali atu a ia: “Ka se fai eiloa ne au a te mea tenā ona ko tāgata e toko 40 konā.”
30 Kae ne toe fai atu a Apelaamo: “Ieova, fakamolemole, sa kaitaua+ kae talia mai au ke faipati atu: Kae pefea la māfai e toko 30 fua a tāgata i ei?” Ne tali atu a ia: “Ka se fai eiloa ne au a te mea tenā māfai e maua atu ne au a tāgata e toko 30 i konā.”
31 Kae ne toe fai atu a Apelaamo: “Fakamolemole, ko taumafai eiloa au o faipati atu ki a Ieova: Kae pefea la māfai e toko 20 fua a tāgata i ei?” Ne tali atu a ia: “Ka se fakaseai ne au a te fakai tenā ona ko tāgata e toko 20 konā.”
32 I te fakaotiga ne fai atu a Apelaamo: “Ieova, fakamolemole, sa kaitaua kae talia mai au ke faipati atu i te ‵toe taimi eiloa tenei: Kae pefea la māfai e tokosefulu fua a tāgata i ei?” Ne tali atu a ia: “Ka se fakaseai eiloa ne au a te fakai ona ko tāgata e tokosefulu konā.”
33 I te otiga a Ieova ne faipati ki a Apelaamo, ne fano a ia i tena auala+ kae toe foki atu a Apelaamo ki tena faleie.
