1, 2. Ne a vaegā logo‵maega e oko sāle atu ki tino i aso nei, kae ne a fesili e fai sāle i ei ne tino e tokouke?

MAI tua ifo o se taua fakamataku telā ne tupu i se fenua e tasi, ne tanu i ei te fia afe o fāfine mo tama‵liki kolā e se ne sotia i se matugā lua lasi kae ne faka‵tu mai i ei a tamā koluse. E tusi i luga i koluse takitasi konā a te pati tenei: “Kaia?” I nisi taimi, tenā eiloa te ‵toe fesili faigata ki tino katoa. E ‵sili sāle atu mo te fanoa‵noa ne tino te fesili tenā māfai e ‵mate olotou tino pele kolā e seai ne olotou mea ma‵sei ne fai, e fakama‵sei olotou fale, io me e oko atu a logo‵maega ki a latou ona ko taua, fakalavelave ‵tupu fakafuasei, masaki ‵pisi, amioga solitulafono io me ko nisi mea aka foki penā. E fia iloa ne latou te pogai e oko atu ei a vaegā mala penā ki a latou.

² Kaia e talia ei ne te Atua a logo‵maega? Kafai e malosi katoatoa te Atua, e alofa, e poto, kae fakamaoni foki, kaia la ko ‵fonu ei te lalolagi i takalia‵liaga mo faifaiga sē fakamaoni? Kai mafaufau aka eiloa koe ki mea konei?

3, 4. (a) Se a te mea e fakaasi mai i ei me e se se mea masei ke fesili atu e uiga ki te pogai e talia ei ne te Atua a logo‵maega? (e) Ne a lagonaga o Ieova e uiga ki amioga ma‵sei mo logo‵maega?

³ E mata, e masei ke fesili atu me kaia e talia ei ne te Atua a logo‵maega? E manava‵se a nisi tino me e fakauiga te ‵sili atu o vaegā fesili penā me e se lava te lotou fakatuanaki io me e fakaasi atu i ei te lotou sē āva ki te Atua. Kae kafai e faitau koe ki te  Tusi Tapu, ka lavea atu ei ne koe me ne fai atu foki ne tino fakamaoni kae ma‵taku ki te Atua a vaegā fesili penā. E pelā mo te pelofeta ko Sapakuka, ne fesili atu ki a Ieova, penei: “Ai a e fai ei ne koe ke lavea ne au a puapuagā konā? E mafai pefea ne koe o kufaki tou kilokilo atu ki faiga sē ‵tonu konā?”—Sapakuka 1:3.

⁴ E mata, ne ‵liko ne Ieova a te pelofeta fakamaoni ko Sapakuka me ne fai atu ne ia a vaegā fesili penā? Ikai. Ne fai eiloa ne te Atua ke tusi a pati ‵tonu kae fakamaoni konā a Sapakuka i te Tusi Tapu. Ne fesoasoani atu foki te Atua ki tou tagata ke momea aka tena malamalama kae ke gasolo aka foki o lasi tena fakatuanaki. Tenā foki loa te mea e manako Ieova o fai ki a koe. Masaua la, e akoako mai te Tusi Tapu “me e atafai atu eiloa [a Ia] ki a koutou.” (1 Petelu 5:7) E sili atu te takalialia o te Atua ki amioga ma‵sei mo logo‵maega kolā e iku mai i ei i lō te takalia‵lia o tino ki ei. (Isaia 55:8, 9) Kaia la e uke katoa ei penei a logo‵maega i te lalolagi?

5. Ne a fakamatalaga e fai sāle atu e uiga ki logo‵maega o tino, kae se a te mea e akoako mai i te Tusi Tapu e uiga ki ei?

⁵ Ko oti ne fesili atu a tino o lotu kese‵kese ki olotou faifeau mo faiakoga e uiga ki te pogai ko uke katoa ei penei a logo‵maega. E masani sāle o tali atu latou me i logo‵maega ko te loto eiloa o te Atua kae ko oti ne fakaiku aka ne ia i te kamataga eiloa  a mea katoa kolā ka ‵tupu, e aofia i ei a fakalavelave ‵lasi. E fai atu ki tino e tokouke me e se mafai o fakamatalagina a auala o te Atua io me e fai mai foki latou me e talia ne ia ke ‵mate a tino—ke oko foki loa ki tama‵liki—ko te mea ke mafai o olo atu a tino konā o ‵nofo fakatasi mo ia i te lagi. E pelā mo te mea ko oti ne iloa ne koe, e se māfua mai i a Ieova te Atua a mea ma‵sei. E fai mai te Tusi Tapu, penei: “E se tāitāi o amio masei te Atua, kae e se mafai foki o sē amiotonu te Atua telā e malosi katoatoa.”—Iopu 34:10, Tusi Paia, Samoa.

6. Kaia e ‵se ei a tino e tokouke i te ‵losi atu ki te Atua e uiga mō logo‵maega i te lalolagi?

⁶ E iloa ne koe te pogai e ‵se ei a tino i te ‵losi atu ki te Atua e uiga mō logo‵maega katoa i te lalolagi? I te ukega o taimi, e ‵losi atu latou ki te Atua Malosi Katoatoa ona ko te mea e mafau‵fau latou me i a Ia ko te pule tonu o te lalolagi tenei. E se iloa ne latou a te munatonu faigofie kae tāua telā e akoako mai i te Tusi Tapu. Ne iloa ne koe te mea tenā i te Mataupu e 3 o te tusi tenei. A te pule tonu o te lalolagi tenei ko Satani te Tiapolo.

7, 8. (a) E fakaasi atu pefea ne te lalolagi a uiga o te tino telā e pule ki ei? (e) Ne māfua mai pefea a nisi logo‵maega ona ko vāivāiga o tino mo mea ‵tupu fakafuasei?

⁷ E fakaasi manino mai te Tusi Tapu, penei: “Te lalolagi kātoa ko i lalo i te pule a te Tino Masei.” (1 Ioane 5:19) Kafai e mafaufau faka‵lei koe ki ei, e ‵tagi tonu mai eiloa te manatu tenā, i ne? E fakaasi ‵tonu mai i te lalolagi tenei a uiga o te agaga sē matea “telā ne fakaloiloi ne ia te lalolagi kātoa.” (Fakaasiga 12:9) E matagā, e faitogafiti kae amio fakasauā a Satani. Tela la, ko ‵fonu eiloa te lalolagi, mai lalo i tena pulega, i takalia‵liaga, amioga faitogafiti, mo amioga fakasauā. Tenā eiloa te pogai e tasi ko uke katoa ei penei a logo‵maega.

⁸ A te lua o pogai ko uke katoa ei penei a logo‵maega, ko te tulaga sē ‵lei katoatoa io me ko te tulaga agasala o tino talu mai te ‵tekeatuga i te fatoaga o Etena, e pelā mo te mea ne sau‵tala tatou ki ei i te Mataupu e 3. E fakatau‵fai a tino agasala me ko oi e sili, kae e iku atu te mea tenā ki te faiga o taua, fakasauāga, mo logo‵maega. (Failauga 4:1; 8:9) A te tolu o pogai mō logo‵maega ko te “malaia e maua ne tino katoa.” (Faitau te Failauga 9:11) Me ko se  maua ne tino i te lalolagi nei a te puipuiga mai te pulega a Ieova, e logo‵mae eiloa a tino ona ko mea ‵tupu fakafuasei.

9. Kaia e mafai ei o mautinoa i a tatou me e isi eiloa se pogai ‵lei ne talia ei ne Ieova ke tumau a logo‵maega mō se vaitaimi tai mata leva?

⁹ Se mea fakamafanafana loto ke iloa atu me e se māfua mai i te Atua a logo‵maega. E se ‵tau foki o ‵losi atu me e māfua mai i a ia a taua, amioga solitulafono, fakasauāga, io me ko fakalavelave pelā mo matagi ‵lasi mo mafuie kolā e fai ei a tino ke logo‵mae. Kae e ‵tau eiloa o maua ne tatou te tali ki te fesili tenei, Kaia e talia ei ne Ieova a logo‵maega katoa konei ke ‵tupu? Kafai e Malosi Katoatoa a ia, e lava eiloa tena malosi ke fakagata ne ia a logo‵maega konā. Kaia e se na fakagata ei ne ia a mea konā? E ‵tau o isi se pogai ‵lei e fai ei penā me e iloa tonu ne tatou i te Atua se Atua alofa.—1 Ioane 4:8.

10. Se a te mea ne fakafesili ne Satani, kae e pefea la?

¹⁰ Ke iloa aka te pogai ne talia ei ne te Atua a logo‵maega, e ‵tau o mafau‵fau tatou ki te taimi ne kamata mai i ei a logo‵maega. I te taimi ne fai ei ne Satani a Atamu mo Eva ke se faka‵logo ki a Ieova, ne sae aka i ei se kinauga tāua. Ne seki fakafesili ne Satani a te lasi o te malosi o Ieova. E iloa foki eiloa ne Satani me e seai se tapulā o te malosi o Ieova. Kae ne fakafesili ne Satani a te aiā io me ko te saolotoga o Ieova ke pule mai. Ne ‵losi atu Satani me i a Ieova se pule masei. Ana muna me i te Atua e pati loi kae e kaiū foki ma tuku mai a mea ‵lei ki tino kolā e pule a ia ki ei. (Faitau te Kenese 3:2-5) Ne fakauiga eiloa ne Satani ana pati me ka sili atu te manuia o tino māfai e se pule atu te Atua ki a latou. Ne ‵teke atu i ei ki te pulega sili a Ieova, ko tena aiā ke pule mai.

11. Kaia ne seki fakaseai atu fua ei ne Ieova a tino ‵teke i Etena?

¹¹ Ne ‵teke atu a Atamu mo Eva ki a Ieova. E pelā me ne fai atu laua, penei: ‘E se ‵tau o fai a Ieova mo fai te mā Pule. E mafai eiloa o fai ne maua mā fakaikuga e uiga ki te mea ‵lei mo te mea masei.’ E mafai pefea o faka‵lei aka ne Ieova te kinauga tenei? E mafai pefea o fakamaoni atu ne ia ki tino ata‵mai katoa me e ‵se fua a tino ‵teke konei kae ko tena pulega ko te ‵toe auala ‵lei? Kāti  ka fai mai se tino me ne ‵tau fua o fakaseai atu ne te Atua a tino ‵teke konei kae toe faite a tino ‵fou. Kae ko oti ne fai atu ne Ieova tena fuafuaga ke faka‵fonu te lalolagi ki tama‵liki a Atamu mo Eva, kae ne manako foki a ia ke ola latou i se lalolagi palataiso. (Kenese 1:28) E fakataunu faeloa ne Ieova ana fuafuaga. (Isaia 55:10, 11) E se gata i ei, a te fakaseaiga o tino ‵teke i Etena, ka se tali faka‵lei aka ei te fesili telā ne sae aka e uiga ki te aiā o Ieova ke pule mai.

12, 13. Fai se tala fakatusa me kaia ne talia ei ne Ieova ke fai Satani mo fai te pule o te lalolagi tenei, mo te pogai ne talia ei ne ia a tino ke pule atu ki a latou eiloa.

¹² Ke mafau‵fau tatou ki se tala fakatusa. Mafaufau la ki se faiakoga telā e fakaasi atu ne ia ki ana tamaliki a‵koga a te auala ke faka‵lei aka ei se fakalavelave faigata. E kinau atu se tamaliki poto kae uiga ‵teke me e ‵se te auala telā e fakaaogā ne te faiakoga. E kinau atu te tamaliki me e sili atu tena fakamatalaga ki te faka‵leiga o te fakalavelave kae e fakauiga foki i ei me e valea fua te faiakoga. E mafau‵fau a nisi tama‵liki me e tonu te tamaliki tenā kae ko kamata foki o ‵teke atu latou. Ne a mea e ‵tau o fai ne te faiakoga? Kafai e ‵tuli keatea ne ia te tamaliki ‵teke tenā, ne a mea kāti ka mafau‵fau ki ei a nisi tama‵liki? E mata, ka tali‵tonu eiloa latou ki te tamaliki tenā, penā foki loa  mo nisi tama‵liki kolā ko ‵kau atu ki a ia? Kāti ka se toe āva a nisi tama‵liki i te vasega ki te lotou faiakoga, mai te mafau‵fau me ko mataku te faiakoga i a ia ma ‵se. Kae mafaufau la māfai ko talia ne te faiakoga ke fakaasi atu ne te tamaliki ‵teke tenā ki te vasega te auala e faka‵lei aka ei ne ia te fakalavelave.

¹³ E tai ‵pau a mea kolā ko oti ne fai ne Ieova mo te mea telā ne fai ne te faiakoga tenā. Masaua la, me e se ko tino ‵teke fua i Etena ne aofia i ei. E lau i miliona a agelu kolā ne kilo‵kilo atu ki ei. (Iopu 38:7; Tanielu 7:10) Ne tāua eiloa ki agelu katoa konā, penā foki loa mo tino katoa, a mea kolā ne fai ne Ieova ki te ‵tekeatuga tenā. Ia, ne a mea ne fai ne Ieova? Ne talia ne ia Satani ke fakaasi mai ne ia te auala ka pule atu ei a ia ki tino. Ko oti foki ne talia ne te Atua ke pule atu a tino ki a latou eiloa mai lalo i te takitakiga a Satani.

14. Ne a mea aogā e maua mai i te fakaikuga a Ieova ke talia a tino ke pule atu ki a latou eiloa?

¹⁴ A te faiakoga i te ‵tou tala fakatusa, e iloa ne ia me e ‵se a te tamaliki ‵teke tenā mo tama‵liki kolā ne ‵kau atu ki a ia. Kae e iloa foki ne ia me i te tukuatuga o se avanoaga ke taumafai latou o fakamaoni aka te lotou manatu, ka aogā eiloa ki te vasega kātoa. Kafai ko se iku manuia te taumafaiga a tama‵liki ‵teke konā, ka lavea atu i ei ne tama‵liki fakamaoni katoa me i te faiakoga ko te tino fua e tokotasi telā e ‵tau o akoako ne ia te vasega. Ka malama‵lama ei latou i te pogai ka ‵tuli fakamuli ei ne te faiakoga so se tamaliki ‵teke mai te vasega. E penā foki loa a Ieova, e iloa ne ia me i tino fakamaoni mo agelu katoa ka maua ne latou a mea aogā māfai ko lavea atu ne latou me ko se iku manuia a taumafaiga a Satani mo tena kau ‵teke, kae e se mafai foki ne tino o pule atu ki a latou eiloa. E pelā mo Ielemia i aso mua, ka iloa ne latou te munatonu tāua tenei: “Ieova, e iloa ne au me e se i ā te tagata tena auala, e se mafai ne te tino telā e sasale o faka‵tonu tena auala.”—Ielemia 10:23, Tusi Paia, Samoa.

15, 16. (a) Kaia ne leva katoa ei penei te taliaga ne Ieova o logo‵maega? (e) Kaia ne seki taofi aka ei ne Ieova a amioga matagā?

¹⁵ Kaia ko leva katoa ei penei te taliaga ne Ieova o logo‵maega?  Kae kaia e se taofi aka ei ne ia a mea ma‵sei? Ia, mafaufau la ki mea e lua kolā e seki fai ne te faiakoga i te ‵tou tala fakatusa. Muamua la, ne seki taofi aka ne ia te tamaliki ‵teke tenā mai te fakaasiatuga o tena manatu. A te lua o mea, ne seki fesoasoani atu te faiakoga ki te tamaliki ‵teke tenā. E penā foki loa a mea e lua kolā ne fakaiku aka ne Ieova ke se fai ne ia. Muamua la, ne seki taofi aka ne ia a taumafaiga a Satani mo tino kolā ne ‵kau atu ki a ia ke fakamaoni aka me e ‵tonu latou. Tela la, ne ‵tau o faka‵tali mō se taimi tai mata leva. I te fia afe tausaga ko ‵teka, ko oti ne tofotofo aka a tino ki vaegā pulega kese‵kese katoa io me ko malo ‵tu tokotasi. Ne gasolo atu ki mua a tino i mea fakasaienitisi mo nisi vaegā poto aka foki, kae ko gasolo aka foki eiloa o ma‵sei atu a faifaiga sē fakamaoni, te mativa, amioga solitulafono mo taua. Ko fakamaoni mai i ei me ko ‵se ‵ki eiloa a pulega a tino.

¹⁶ A te lua o mea, ne seki fesoasoani atu a Ieova ki a Satani i te pule mai ki te lalolagi tenei. Moi ne taofi aka ne te Atua a amioga matagā ke se ‵tupu, penei ko fesoasoani atu eiloa a ia ki te fakamaoniga o te kinauga a tino ‵teke konei, i ne? Moi ne fai penā ko fai ei ne te Atua ke mafau‵fau a tino me kāti e mafai eiloa o pule atu a tino ki a latou eiloa e aunoa mo ne fakalavelave fakama‵taku, i ne? Moi ne fai penā a Ieova, ko tena uiga, ko ‵lago atu foki a ia ki te faiga o pati ‵loi. Kae e ‘se mafai o loi te Atua.’—Epelu 6:18.

17, 18. Ne a mea ka fai ne Ieova e uiga ki logo‵maega katoa kolā ne iku mai i te pulega a tino mo Satani?

¹⁷ E a te fia o mea ma‵sei kolā ko oti ne fai talu mai te ‵tekeatuga ki te Atua? Ke na masaua ne tatou me e malosi katoatoa a Ieova. Tela la, e mafai eiloa o toe faka‵lei aka ne ia a mea kolā e māfua mai i ei a logo‵maega o tino, kae ka fai eiloa ne ia penā. E pelā mo te mea ko oti ne sau‵tala tatou ki ei, ka faka‵lei aka te fakamaseiga o te ‵tou lalolagi me ka ‵fuli mo fai se Palataiso. Ka ave keatea a ikuga o te agasala e auala i te fakatuanaki ki te taulaga togiola a Iesu, kae ka sui a ikuga o te mate i te ‵toetuga. Ka fakaaogā ne te Atua a Iesu ke ‘lepe ne ia a galuega a te Tiapolo.’ (1 Ioane 3:8) Ka fai eiloa ne Ieova a mea katoa konei i te taimi  tonu. E ‵tau o fia‵fia tatou me ne seki sōna gasuesue fakavave a ia, me ko maua ei ne tatou se avanoaga ke iloa te munatonu kae ke tavini atu foki ki a ia ona ko tena loto kufaki. (Faitau te 2 Petelu 3:9, 10) Koi salasala malosi nei te Atua ki tino tapuaki fakamaoni kae e fesoasoani atu foki ki a latou ke kufaki i so se logo‵maega telā e oko atu ki a latou i te lalolagi tenei e ‵fonu i fakalavelave.—Ioane 4:23; 1 Kolinito 10:13.

¹⁸ Kāti ko mafau‵fau a nisi tino, penei, E mata, ne mafai o taofi aka a logo‵maega konei moi fai ne faite ne te Atua a Atamu mo Eva i se auala telā e se mafai eiloa ne laua o ‵teke atu? Ke maua te tali ki te fesili tenā, e ‵tau o masaua ne koe a te meaalofa gali telā ne tuku atu ne Ieova ki a koe.

19. Se a te meaalofa tāua ko oti ne tuku mai ne Ieova, kae kaia e ‵tau ei o fakatāua ne tatou te meaalofa tenā?

¹⁹ E pelā mo te mea ne lavea atu i te Mataupu e 5, ne faite a tino mo te saolotoga ke fai olotou filifiliga. E mata, e iloa ne koe te tāua o te meaalofa tenā? Ne faite ne te Atua a manu e uke kae e seai se lotou saolotoga penā. (Faataoto 30:24) Ko oti ne faite ne tino a masini ke foliga mai pelā me ne tino kae e mafai o fakapolokalame a masini konā ke tau‵tali ki so se fakatonuga. E mata, ka fia‵fia eiloa tatou moi fai ne faite ne te Atua tatou penā? Ikai, e fia‵fia tatou me e maua ne tatou te saolotoga ke fai ‵tou filifiliga e uiga ki mea e ma‵nako tatou o fai, te vaegā olaga ke kausaki ki ei, vaegā taugasoa e ma‵nako tatou ki ei, mo nisi mea aka foki penā. E fia‵fia tatou ke maua se vaegā saolotoga penā, kae e manako foki te Atua ke maua ne tatou te mea tenā.

20, 21. E mafai pefea o fakaaogā ne tatou te meaalofa, ko te saolotoga, i te ‵toe auala ‵lei, kae kaia e ‵tau ei o ma‵nako tatou ke fai penā?

 ²⁰ E se manako Ieova ke fai fitoi fua te taviniga ki a ia. (2 Kolinito 9:7) Ke fai se fakatusaga: Se a te mea ka fiafia malosi atu ki ei te mātua—ko te tamaliki telā e fai atu “Au e alofa ki a koe” ona ko te mea ne fakatonu atu se tino ki a ia ke fai penā io me ko te tamaliki telā e fai atu penā mai tena loto eiloa? Tela la, tenei loa te fesili tāua ke mafaufau ki ei, Ka fakaaogā pefea ne koe te saolotoga telā ne tuku atu ne Ieova ki a koe? Ne ‵se pala‵ki eiloa te auala ne fakaaogā ei ne Satani, Atamu, mo Eva te lotou saolotoga. Ne ‵teke atu latou ki a Ieova te Atua. Ne a au mea ka fai?

²¹ Ko maua nei ne koe se avanoaga ke fakaaogā te meaalofa gali tenei, ko tou saolotoga, i te ‵toe auala ‵lei. E mafai o kau atu koe ki te fia miliona o tino kolā ko ‵kau atu nei ki a Ieova. E fai ne latou te loto o te Atua ke fiafia ona ko te mea e aofia malosi latou i te fakamaoni atu me i a Satani se tino loi kae ko māvale foki a ia i ana taumafaiga ke fai mo fai se pule. (Faataoto 27:11) E mafai foki o fai ne koe te loto o te Atua mai te filifili aka ki te vaegā olaga tonu. Ka fakamatala mai te mea tenei i te suā mataupu.