VAEGA I TE 4
Ma‵sei a Lagonaga—“Faka‵ma Mai Au i Aku Agasala”
“Ne momea aka te ‵lei o te olaga o te motou kāiga i taku galuega fou, kae ne takitaki atu foki i ei ki vaegā faifaiga kolā e sē ‵lei. Ne kamata o fakamanatu ne au aso malō‵lo, aofia i mea fakapolitiki, kae ke oko foki eiloa ki te kau atu ki nisi lotu. Ne mate au i te feitu faka-te-agaga e pelā me se Molimau a Ieova mō tausaga e 40. Ko te leva o te taimi ko te momea aka o toku mafaufau me ko se mafai o toe fakamagalo au ne Ieova. Ne maua foki ne au te lagonaga me ko se mafai o fakamagalo ne au a au eiloa. Ona ko te mea ne iloa ne au te munatonu kae koi tuai o fanatu au i te auala ‵se.”—Martha.
E MAFAI o fai a lagonaga ma‵sei mo fai se amoga ‵mafa. Ne tusi mai a te Tupu ko Tavita: “Au ko malemu i te lofiaga o aku agasala; se amoga ‵mafa, ko se mafai ne au o amo.” (Salamo 38:4) Ne vai‵vai eiloa a nisi Kelisiano ona ko te fanoanoa lasi, kae tali‵tonu me ko se toe mafai o fakamagalo ne Ieova a latou. (2 Kolinito 2:7) E mata, se mea tonu eiloa a te fakaikuga tenā? Kafai foki ne fai ne koe a agasala matagā, e mata, ka fai ei ke to ‵mao koe mai i a Ieova telā ka se mafai o fakamagalo ne ia a koe? Ikai, e se penā loa!
“Ka Taumafai Nei Tatou o Fakatoka te Mataupu Tenei e Feagai mo Tatou”
E se tiakina ne Ieova a tino agasala kolā ko sala‵mo. A te ‵tonuga loa, e taumafai a ia ke oko atu ki a latou! I te tala fakatusa e uiga ki te tama fakamāumāu mea, ne fakatusa ne Iesu a Ieova ki se tamana alofa telā ne tiakina ne tena tama tena kāiga kae ola i se olaga fakatakalialia. E seki leva, ne fakaiku aka ne te tama ke toe foki atu a ia ki te fale. “A koi ‵mao ‵ki a ia [te tama tagata] kae lavea a ia ne tena tamana, kae ne ‵fonu te loto o tena tamana i te alofa, tele atu ei, ‵sai ki a ia kae sogi atu ki ei.” (Luka 15:11-20) E a, e fia fakapilipili atu koe ki a Ieova kae mafaufau koe me i a koe “koi ‵mao ‵ki” mai i a ia? E pelā mo te tamana i te tala fakatusa a Iesu, ka gasue eiloa a Ieova ona ko tena loto alofa mō koe. E loto fiafia a ia ke toe foki mai koe.
Kae e a māfai e talitonu koe me ko tō matagā au agasala io me ko tō uke ke fakamagalo ne Ieova? Fakamolemole, mafaufau ki te ‵kamiga a Ieova telā ne fakamau i te Isaia 1:18: “Ka taumafai nei tatou o fakatoka te mataupu tenei e feagai mo tatou. A koutou ko ‵fonu i te agasala, kae nei ka faka‵ma ne au koutou ke ‵ma pelā me se kiona.” E penā foki loa ki agasala kolā e foliga mai e pelā me se lailaiga tumau i luga i se laugatu ‵kena, e mafai eiloa o fakamagalo ne Ieova.
E se manako a Ieova ke logo‵mae faeloa koe ona ko te loto lagona masei. E mafai la pefea o maua ne koe a te fakatapūga telā e maua mai i te fakamagaloga a te Atua mo te loto lagona ‵ma? Mafaufau ki mea e lua kolā ne fai ne te Tupu ko Tavita. Muamua la, ne fai atu a ia: “Tela ne fakaasi atu ei ne au ki a koe aku agasala.” (Salamo 32:5) Masaua, ko oti koe ne ‵kami ne Ieova ke fakapilipili atu ki a ia i ‵talo kae “fakatoka te mataupu tenei” fakatasi mo ia. Ke talia te ‵kamiga tenā. Taku ‵tonu atu au agasala kae fakaasi atu foki ou lagonaga ki a ia. Mai i mea ne ‵tupu ki a ia, ne mafai ei ne Tavita o ‵talo atu mo te loto talitonu: “Faka‵ma mai au i aku agasala . . . e se ‵teke eiloa ne koe te tino loto maulalo kae loto salamō.”—Salamo 51:2, 17.
A te lua o mea, ne maua ne Tavita a te fesoasoani mai te sui tōfia o te Atua, te pelofeta ko Natano. (2 Samuelu 12:13) I aso nei, ne tuku mai ne Ieova a toeaina i te fakapotopotoga kolā ne akoako faka‵lei ke fesoasoani atu ki tino agasala sala‵mo tonu ke toe faka‵lei te lotou va fakataugasoa mo Ieova. Kafai e olo atu tatou ki toeaina, ka fakaaoga ne latou a te Tusi Tapu kae fai atu a ‵talo mo te loto kātoa ke fesoasoani atu ki te faka‵leiga o tou masaki i te feitu faka-te-agaga.—Iakopo 5:14-16.
E manako a Ieova ke maua ne koe a te fiafia mai i se loto lagona ‵ma
“Amutia a Tino Kolā ko Fakamagalogina Olotou Agasala”
E mafai o mafaufau koe me i te ‵taku atu o au agasala ki a Ieova te Atua kae fanatu ki toeaina e aofia eiloa i toe mea faigata ne mafai o fai ne koe. Ne penā foki a lagonaga o Tavita. “Ne seki fakaasi” atu ana agasala mō se vaitaimi tai leva. (Salamo 32:3) Kae mai tua ifo, ne fakatāua malosi ne ia a te aoga o te ‵taku tonu atu o ana agasala kae fakatonutonu tena auala.
A te ‵toe mea aoga me ne toe maua ne Tavita a tena fiafia. Ne tusi mai a ia: “Amutia a tino kolā ko fakamagalogina olotou agasala, kolā ko faka‵magina foki olotou amioga ma‵sei.” (Salamo 32:1) Ne ‵talo atu foki a ia: “Te Aliki, fesoasoani mai ke mafai ne au o faipati, ko tavae atu ei ne au a koe.” (Salamo 51:15) Ona ko te mea ne mafai o saoloto a ia mai i te ma‵sei o ana lagonaga mo te fiafia ki te loto fakamagalo o te Atua, ne fakamalosi aka ei a Tavita ke faipati atu ki nisi tino e uiga ki a Ieova.
E manako a Ieova ke maua ne koe a te fiafia mai i se loto lagona ‵ma. Kae e manako a ia ke faipati atu koe ki nisi tino e uiga ki a ia mo ana fuafuaga, e aunoa mo lagonaga ma‵sei, kae mo te loto fakamaoni mo te fiafia lasi. (Salamo 65:1-4) Masaua tena ‵kamiga, “‵solo keatea otou agasala, kae ka oko mai foki te taimi ka maua ei te malosi fou mai i a Ieova eiloa.”—Galuega 3:19.
Tenā eiloa te mea ne tupu ki a Martha. Ne fai mai tou fafine: “Ne lafo mai faeloa ne taku tama tagata a mekesini ko te Faleleoleo Maluga mo Ala Mai! Ne kamata malielie o toe fakamasani au ki a Ieova. A te ‵toe mea faigata ko te akai atu ki tena fakamagaloga mō agasala katoa ne fai ne au. Kae fakamuli loa, ne ‵talo atu au ki te Atua kae akai atu ke fakamagalo mai au. Ko oko eiloa i te faigata ke talitonu me ne ‵teka atu a te 40 tausaga kae fatoa foki atu au ki a Ieova. E fai eiloa au mo fai se fakamaoniga me mai tua o tausaga e uke, e mafai eiloa o toe maua ne se tino a te suā avanoaga ke tavini atu ki te Atua kae toe foki mai ki tena alofa.”
