Aita. Te parau ra te Bibilia, o te Atua anaˈe ta tatou e pure, na roto i te iˈoa o Iesu: “E naô râ outou ia pure: E to matou Metua i te rai ra, ia raa to oe ioa.” (Mataio 6:9, Te Bibilia Moˈa, V.C.J.S., 1976) Aita roa oia i haapii i ta ˈna mau pǐpǐ ia pure i te peata, te melahi aore ra te tahi atu taata taa ê atu i te Atua.

Ua parau atoa Iesu i ta ˈna mau pǐpǐ: “O vau te èâ, te parau mau, e te ora. Aore roa e taata e tae i te Metua ra, maori ra na roto iaˈu nei.” (Ioane 14:6, V.C.J.S.) O Iesu anaˈe ta te Atua i faatia ia riro ei arai i rotopu ia tatou e o ˈna.—Hebera 7:25.

Eaha ïa ia pure au i te Atua e i te mau peata atoa?

I te patoiraa Iesu ia Satani, ua na ô oia: “O te Fatu ra to Atua ta oe e haamori, e o oia anae ra ta oe e tavini.” (Mataio 4:10, V.C.J.S.) Te titau nei te Atua ia haamorihia o ˈna anaˈe e ia faataehia te pure ia ˈna anaˈe.—Isaia 48:11.

E faainoino tatou i te Atua ia pure tatou i te tahi atu taata, noa ˈtu e peata aore ra e melahi moˈa. I te tamataraa te aposetolo Ioane i te haamori i te hoê melahi, ua tapea te melahi ia ˈna ma te parau: “Eiaha roa oe e na reira: e taetaeae tavini hoi au no oe, e no te mau taeae te ia ratou te faaiteraa a Iesu ra. A haamori i te Atua.”—Apokalupo 19:10, V.C.J.S.