I te tahi mahana, te faatere ra Elisa a te hoê Ite no Iehova, i te hoê haapiiraa Bibilia i te fare o te tahi vahine. Ua maere roa teie vahine a ite ai e piti taata te tia ra i mua i to ˈna fare. I mua i te uputa, te vai ra te tahi tia haapaoraa e ta ˈna vahine. Ua faaroo Elisa no pohe noa ˈtu ra te tamaiti a teie na hoa faaipoipo, hoê anaˈe hoi tamarii ta raua!

 I to Elisa faataeraa ˈtu i te tapao aroha, taˈi ihora te tia haapaoraa e ta ˈna vahine ma te mauiui mau. I muri iho râ, ma te riri, na ô mai nei te tia haapaoraa: “Aita vau e taa ra no te aha te Atua e vaiiho ai ia tupu teie ati! No te aha o ˈna i rave ai i ta ˈu tamaiti? Ua tavini au i te Atua 28 matahiti, mea rahi te ohipa maitai ta ˈu i rave, e tera ïa ta ˈna e rave i nia ia ˈu! No te aha te Atua i haapohe ai i ta ˈu tamaiti?”

 Ua faataa Elisa i na hoa faaipoipo e ere na te Atua i rave i ta raua tamaiti. Ua tauaparau atoa ratou i nia i te tusia taraehara o Iesu, te tia-faahou-raa e te tumu te Atua e vaiiho ai ia tupu te ati. Ua parau raua ia Elisa ua pahono oia i te mau uiraa ta raua i faahiti i roto i te pure.

 I te hebedoma i muri iho, hoˈi faahou atura te tia haapaoraa e ta ˈna vahine i te fare o te vahine e haapiihia ra e Elisa. Te hiˈopoa ra raua i te pene “E tiaturiraa mau to to outou feia here i pohe” i roto i te buka Eaha ta te Bibilia e haapii mau ra? Ua oaoa roa na hoa faaipoipo i te apitiraa i te aparauraa.

 I muri aˈe, ua apiti raua i te hoê tairururaa taa ê a te mau Ite no Iehova i Tbilisi i Géorgie. Ua putapû roa raua i te here e te autahoê ta raua i ite! E mau huru maitatai tera ta raua i tamata na i te haapii i te mau mero o ta raua haapaoraa, aita râ i manuïa!