Fatata anei te hopea o teie nei ao?
I to oe manaˈo, e haamouhia anei te fenua i roto i te hoê ati o te haapohe i te huitaata? Te manaˈo râ vetahi e fatata roa tatou i te faaruru i te reira, a taio ai i te mau parau apî mai teie:
“E nehenehe te hoê tamaˈi atomi e tupu taue. Peneiaˈe mea opuahia, mea hape noa aore ra no te taa ore o te tahi e te tahi fenua.”—Bulletin of the Atomic Scientists.
“Te mau matahiti i mairi, mea rahi roa te ati i tupu mai te vero, te mau uru raau tei ura, te paˈurâ, te mau toˈa tei pohepohe, te veavea rahi e te pape pue.”—National Geographic.
“Mea rahi aˈe e mea ino aˈe te mau aere vivi i Afirika i te mau matahiti i mairi aˈenei ia faaauhia i na mua aˈe.”—The Associated Press.
Na tera huru ati anei e haamou i teie nei ao? Eaha ta te Bibilia e parau ra?
E haamouhia anei to tatou paraneta?
Eita. Te haapapu mai ra te Parau a te Atua te Bibilia e e vai noa te fenua e a muri noa ˈtu. (Koheleta 1:4) Eita te Atua e haamou i te fenua ta ˈna i poiete, e haamou râ o ˈna i te feia e tuino ra i te fenua.—Apokalupo 11:18.
Fatata anei te hopea o teie nei ao?
Te “ao” ta te Bibilia e faahiti ra, o te huitaata ïa o te tâuˈa ore nei i te aratairaa a te Atua e o te pee nei i to ratou iho hinaaro. Mai i te tau o Noa, e haamou te Atua i “te hoê ao taata faatura ore i te Atua.”—Petero 2, 2:5; 3:7.
Te na ô nei te Ioane 1, 2:17: “Fatata atoa teie nei ao i te mou e to ta te ao atoa e hinaaro ra.” Te faaite nei teie irava e e haamou te Atua, eiaha i to tatou paraneta i te taata atoa râ o te tamau i te rave i te mau mea ino.
Afea ïa te hopea e tae mai ai?
Aita te Bibilia e faaite mau ra afea te hopea e tae mai ai. (Mataio 24:36) Te faaite nei râ e ua fatata roa te hopea. Teie ta te Bibilia e tohu ra:
E tupu te tamaˈi, te oˈe, te maˈi pee e te aueueraa fenua puai mau i “tera e tera vahi.”—Mataio 24:3, 7, 14; Luka 21:10, 11; Apokalupo 6:1-8.
Mea miimii mau te rahiraa o te taata. Ei hiˈoraa, e riro ratou ei taata “nounou moni,” “mauruuru ore,” e “haavî ore ia ratou iho.”—Timoteo 2, 3:1-5.
Te taa ra i te rahiraa o te taata e mai te matahiti 1914, te tuati ra te mau tupuraa na te ao i ta te Bibilia i tohu e ua fatata te hopea. No te ite atu â, a hiˈo i te mau tumu parau “Eaha ta te Bibilia e faaite ra no nia i te matahiti 1914?” e “Eaha te tapao o ‘te mau mahana hopea’ aore ra o ‘te taime faataahia o te hopea’?”
Te tohu ra anei te buka hopea o te Bibilia i te haamouraa o te fenua?
Te faahiti ra te buka hopea o te Bibilia i te taime e faaitehia ˈi te Fatu ra o Iesu. Te taime ïa e fanaˈo ai Iesu i te mana no te faaore i te mau ino atoa i nia i te fenua e no te haamaitai i te feia o te haamori i te Atua.—Tesalonia 2, 1:6, 7; Petero 1, 1:7, 13.
Te faaite ra te buka Apokalupo i te mau tupuraa e tupu i mua nei. (Apokalupo 1:1) E parau apî oaoa e e tiaturiraa au mau to roto i tera buka. (Apokalupo 1:3) Te faaite ra te reira e e faaore roa te Atua i te mau ohipa tia ore atoa e e faariro i te fenua ei paradaiso. I taua taime ra eita te taata e mauiui faahou e e pohe faahou.—Apokalupo 21:3, 4.
Te hinaaro ra anei oe e ite atu â no nia i teie mau parau fafau Bibilia faahiahia mau? Te pûpû nei te mau Ite no Iehova i te hoê haapiiraa Bibilia tamoni ore no te tauturu ia oe. A tamata!