1. Eaha te opuaraa a te Atua no te fenua?

E OPUARAA faahiahia mau â ta te Atua no te fenua. E hinaaro Iehova ia î te fenua i te mau taata oraora maitai e te oaoa. Te parau ra te Bibilia e “ua ǒ . . . te Atua ra o Iehova i te ô i . . . Edene ra” e “ua faatupu” oia “i te mau raau maitatai atoa ia hi‘o e tei au ei maa.” I muri a‘e i to te Atua poieteraa i te tane e te vahine matamua ra o Adamu raua o Eva, ua tuu Oia ia raua i roto i taua nohoraa nehenehe ra e ua na ô atu e: “Ia fanau orua, e ia rahi roa, e faaî i te fenua nei, e e haavi iho.” (Genese 1:28; 2:8, 9, 15) No reira, i opua na te Atua ia fanau te taata i te tamarii, ia faaaano atu â i te otia o taua ô ra e ati a‘e te fenua, e ia aupuru i te mau animara.

2. (a) Mea nafea to tatou iteraa e e tupu te opuaraa a te Atua no te fenua? (b) Eaha ta te Bibilia e parau ra no nia i te oraraa te taata e a muri noa ’tu?

² I to oe mana‘o, e tupu anei te opuaraa a te Atua ra o Iehova ia ora te taata i roto i te hoê paradaiso i te fenua nei? “O ta ’u i parau ra,” ta te Atua ïa e faahiti ra, “e na ’u ïa e rave.” (Isaia 46:9-11; 55:11) Oia, e rave iho â te Atua mai ta ’na i opua! Te parau ra oia e “ait[a] . . . oia i hamani” i te fenua “ia vaiiho-taata-ore-noa-hia, ua hamani râ oia ia taatahia.” (Isaia 45:18) Teihea huru taata ta te Atua i hinaaro ia  ora i te fenua nei? E mai te aha te maoro i hinaaro ai oia ia ora ratou i reira? Te pahono ra te Bibilia e: “E parahi te feia parau-tia i nia i te fenua, e parahi tamau â ratou i reira.”—Salamo 37:29; Apokalupo 21:3, 4.

3. Eaha te mau huru tupuraa peapea e itehia ra i te fenua nei, e eaha te mau uiraa e hiti maira?

³ Parau mau, aitâ te reira i tupu atura. Te ma‘ihia ra e te pohe ra te taata; te aro atoa ra ratou e te taparahi pohe ra te tahi i te tahi. E fifi tei tupu. E mea papu râ e aita te Atua i opua ia riro te fenua mai ta tatou e ite ra i teie mahana! Eaha tei tupu? No te aha te opuaraa a te Atua i ore ai i tupu? Aita e buka tuatapaparaa papaihia e te taata e nehenehe e pahono mai no te mea ua haamata te fifi i nia i te ra‘i.

4, 5. (a) O vai mau â tei paraparau ia Eva na roto i te hoê ophi? (b) E nafea te hoê taata tura e te haerea tia na mua ’‘e e nehenehe ai e riro ei eiâ?

⁴ Te faahiti ra te buka matamua o te Bibilia i te hoê patoi o te Atua tei fa ’tu i roto i te ô i Edene. Te faataahia ra oia mai “te ophi,” e ere râ oia i te hoê noa animara. Te faataa ra te buka hopea o te Bibilia ia ’na mai “tei parauhia . . . te diabolo . . . e o Satan[i] . . . , o tei haavare i to te ao atoa nei.” Te parau-atoa-hia ra oia te “ophi tahito.” (Genese 3:1; Apokalupo 12:9) Ua faaohipa tera melahi, aore ra varua itea ore, puai i te hoê ophi no te paraparau ia Eva, mai te hoê taata ite o te nehenehe e haaparaparau ma to ’na reo i te hoê pêpe haavare aore ra te hoê hauti haavare. E mea papu e to reira atoa taua varua ra a faaineine ai te Atua i te fenua no te taata.—Ioba 38:4, 7.

⁵ I te mea râ e e mea tia roa te mau mea atoa ta Iehova i poiete, na vai ïa i hamani i tera “diabolo,” tera “Satani”? E parau noa ïa tatou e na te hoê o te mau tamaiti varua puai a te Atua i faariro ia ’na iho ei Diabolo. Eaha ïa? I  teie mahana, e nehenehe te hoê taata tura e te haerea tia na mua ’‘e e riro ei eiâ. E nafea ïa? E vaiiho noa paha taua taata ra i te hoê hinaaro ino ia rahi mai i roto i to ’na aau. Mai te peu e e mana‘ona‘o noa oia i te reira, e nehenehe tera hinaaro ino e puai roa mai. E ia tae i te hoê taime tano, e nehenehe oia e haa ia au i te hinaaro ino ta ’na i mana‘ona‘o noa na.—A taio i te Iakobo 1:13-15.

6. Mea nafea to te hoê tamaiti varua puai a te Atua riroraa ei Diabolo ra o Satani?

⁶ Tera tei tupu i nia i te Diabolo ra o Satani. E au ra e ua faaroo oia i to te Atua parauraa ia Adamu e ia Eva ia fanau i te tamarii e ia faaî i te fenua i to raua huaai. (Genese 1:27, 28) ‘E nehenehe hoi tera mau taata atoa e haamori ia ’u eiaha i te Atua!’ Eita e ore e o ta Satani ïa i mana‘o. Ua tupu maira te hinaaro ino i roto i to ’na aau. Ua haavare atura oia ia Eva ma te parau atu i te mau mea hape no nia i te Atua. (A taio i te Genese 3:1-5.) Ua riro maira oia ei “diabolo,” e “Pari haavare” te auraa. I te hoê â taime, ua riro mai oia ei “Satani,” e “Patoi” te auraa.

7. (a) No te aha Adamu raua Eva i pohe ai? (b) No te aha te huaai atoa o Adamu e ruau ai e e pohe ai?

⁷ Ma te faaohipa i te parau haavare e te râmâ, ua turai te Diabolo ra o Satani ia Adamu e ia Eva ia faaroo ore i te Atua. (Genese 2:17; 3:6) I te pae hopea, ua pohe raua, mai ta te Atua i parau e e pohe raua ia faaroo ore raua. (Genese 3:17-19) I te mea e ua riro o Adamu ei taata tia ore i to ’na hararaa, ua tutuu oia i te hara na to ’na huaai atoa. (A taio i te Roma 5:12.) No te faataa i te tupuraa, e nehenehe e rave i te hi‘oraa o te hoê farii eu faraoa. Mai te peu e ua popo‘a rii te farii, mai te aha ïa te huru o te faraoa atoa e euhia i roto? E popo‘a atoa ïa. Hoê â huru no te taata atoa, ua raeahia ratou i te “popo‘a” o te huru tia ore no ǒ mai ia Adamu ra. No reira te taata atoa e ruau ai e e pohe ai.—Roma 3:23.

8, 9. (a) Eaha ta Satani i aa ’tu? (b) No te aha te Atua i ore ai i haamou i na orure hau i reira iho?

 ⁸ I to Satani turairaa ia Adamu e ia Eva ia hara i te Atua, te orure mau ra ïa oia i te hau. Te aa ra oia i ta Iehova huru faatereraa. Inaha, te na ô ra Satani e: ‘E arii ino te Atua. E  parau haavare ta ’na e te faaere ra oia i to ’na mau taata i te mau mea maitatai. Eita te taata e hinaaro ia faatere te Atua ia ratou. E nehenehe ta ratou e faaoti no ratou iho eaha te mea maitai e eaha te mea ino. E e maitai a‘e ratou i raro a‘e i ta ’u faatereraa.’ E nafea te Atua i mua i tera aaraa faaino? E mana‘o vetahi e ahiri te Atua i haapohe noa ’tu i na orure hau. E pahono anei râ te reira i ta Satani aaraa? E haapapu anei te reira e e mea tia te huru faatereraa a te Atua?

⁹ Eita to Iehova mana‘o tia roa no nia i te parau-tia e faatia ia ’na ia haapohe i na orure hau i reira iho. Ua faaoti oia e e hinaarohia te tau no te pahono i ta Satani aaraa ma te au e no te haapapu e e haavare te Diabolo. No reira, ua faaoti te Atua e e faatia oia i te taata ia faatere ia ratou iho no te hoê tau i raro a‘e i te mana o Satani. I roto i te pene 11 o teie buka e tatarahia ’i no te aha Iehova i na reira ’i e no te aha oia i vaiiho ai i te hoê tau maoro hou a faaafaro ai i tera na tumu parau. E mea maitai râ ia feruri tatou i teie nau uiraa: Ua tano anei Adamu raua Eva i te tiaturiraa ia Satani, o tei ore hoi i rave a‘enei i te tahi mea maitai no raua? Ua tano anei raua i te tiaturiraa e e haavare ino mau o Iehova, o tei horoa hoi i te mau mea atoa na raua? Eaha ta outou e rave?

10. E nafea outou e nehenehe ai e turu ia Iehova ei pahonoraa i ta Satani aaraa?

¹⁰ E mea maitai ia feruri i teie nau uiraa no te mea ua taaihia tatou taitahi i tera atoa na tumu parau i teie mahana. Oia, e nehenehe outou e turu ia Iehova ei pahonoraa i ta Satani aaraa. E nehenehe outou e farii ia Iehova ei Arii no outou e e tauturu atu i te faaite e e haavare o Satani. (Salamo 73:28; a taio i te Maseli 27:11.) Tera noa râ, mea iti o na miria taata i roto i teie nei ao o te rave ra i tera maitiraa. Te hiti maira te hoê uiraa faufaa, Te haapii mau ra anei te Bibilia e na Satani e faatere ra i teie nei ao?

11, 12. (a) E nafea te faahemaraahia Iesu e faaite ai e o Satani te arii o teie nei ao? (b) Eaha ’tu â te haapapu ra e o Satani te arii o teie nei ao?

¹¹ Aita roa ’tu Iesu i feaa e na Satani e faatere ra i teie nei ao. Ma te hoê ravea semeio, ua faaite Satani i te hoê taime ia Iesu i “te mau basileia atoa i te ao nei e to ratou hinuhinu.” Ua fafau atura Satani ia Iesu e: “E horoa ’tu vau i teie nei mau mea atoa ia oe na ia tipapa mai oe i raro e haamori mai ia ’u.” (Mataio 4:8, 9; Luka 4:5, 6) A feruri na. E riro anei teie pûpûraa ei faahemaraa ia Iesu ahiri e ere o Satani te arii o tera mau basileia? Aita Iesu i patoi e na Satani tera mau faatereraa atoa a teie nei ao. Ahiri e ere na Satani, ua patoi iho â ïa Iesu.

¹² Parau mau, o Iehova te Atua mana hope, Tei poiete i te ao faahiahia taatoa. (Apokalupo 4:11) Aita roa râ te Bibilia e parau ra e o te Atua ra o Iehova aore ra o Iesu Mesia te arii o teie nei ao. Inaha, ua faahiti maitai Iesu ia Satani mai “te arii o teie nei ao.” (Ioane 12:31; 14:30; 16:11) Te faahiti atoa ra te Bibilia i te Diabolo ra o Satani mai “te atua o teie nei ao.” (Korinetia 2, 4:3, 4) Teie ta te aposetolo Ioane i papai no nia i teie patoi, aore ra Satani: “Te vai noa nei to te ao atoa i raro a‘e i taua varua ino ra.”—Ioane 1, 5:19.

13. No te aha e hinaarohia ’i te hoê ao apî?

¹³ A mairi ai te matahiti, ua riro noa te ao ei mea atâta ’tu â. Ua î roa te ao i te mau nuu tama‘i, te feia poritita haerea tia ore, te mau aratai haapaoraa haavarevare, e te feia ohipa ino etaeta. Eita e tia ia taui i te ao taatoa. Te faaite ra te Bibilia e ua fatata te taime e faaore ai te Atua i te ao ino i roto i ta ’na tama‘i ra o Aramagedo. Na te hoê ao apî parau-tia e mono atu.—Apokalupo 16:14-16.

14. O vai ta te Atua i maiti ei Arii no to ’Na Basileia, e mea nafea te reira i te tohuraahia?

 ¹⁴ Ua maiti te Atua ra o Iehova ia Iesu Mesia ei Arii no to ’Na Basileia, aore ra faatereraa, i te ra‘i. E mea maoro a‘enei to te Bibilia tohuraa e: “Ua fanau mai . . . te hoê tǎmǎ na tatou, ua horoahia mai te hoê tamaiti na tatou; ei nia i to ’na ra tapono te hau vai ai: e mairihia to ’na i‘oa . . . te Arii no te hau. E te tupuraa o to ’na mana i te rahi e to ’na hau, aore ïa e hopea.” (Isaia 9:6, 7) No nia i teie hau, aore ra faatereraa, ua haapii Iesu i ta ’na mau pǐpǐ ia pure: “Ia tae to oe ra hau. Ia haapaohia to oe hinaaro i te fenua nei, mai tei te ao atoa na.” (Mataio 6:10) Mai ta tatou e ite i muri a‘e i roto i teie buka, ua fatata te Basileia o te Atua i te haamou i te mau faatereraa atoa a teie nei ao, e na ’na e mono atu. (A taio i te Daniela 2:44.) I reira ïa te Basileia o te Atua e avari ai i te hoê paradaiso i te fenua nei.

15. Eaha “te fenua apî”?

¹⁵ Te haapapu maira te Bibilia e: “Te tatari nei . . . tatou i te ra‘i apî e te fenua apî ta [te Atua] i parau maira, i te vai-mau-raa o te parau-tia ra.” (Petero 2, 3:13; Isaia 65:17) I te tahi taime, ia faahiti te Bibilia i “te fenua,” o te taata ïa e ora ra i nia i te fenua tera e parauhia ra. (Genese 11:1) O te hoê ïa totaiete taata farii-maitai-hia e te Atua “te fenua apî” parau-tia.

16. Eaha te ô faito ore ta te Atua e horoa na te feia ta ’na e farii, e eaha te titauhia ia rave tatou no te fana‘o i te reira?

¹⁶ Ua fafau Iesu e i roto i te ao apî i mua nei, e fana‘o te feia i fariihia e te Atua i te ô o “te ora mure ore.” (Mareko 10:30) A iriti na i ta outou Bibilia i te Ioane 3:16 e te 17:3, e a taio na i ta Iesu i parau e mea tia ia rave tatou no te fana‘o i te ora mure ore. A hi‘o na i teie nei i roto i te Bibilia i te mau haamaitairaa e fana‘ohia e te feia e au ia ratou te ô faahiahia no ǒ mai i te Atua ra i roto i te paradaiso i te fenua nei i mua nei.

17, 18. E nafea tatou e nehenehe ai e papu e e tupu te hau e te panoonoo ore e ati a‘e te fenua nei?

 ¹⁷ E mou te ino, te tama‘i, te ohipa ino e te haavîraa u‘ana. “Te paieti ore, e aita ra . . . Area te feia mǎrû ra, e parahi ïa i te fenua.” (Salamo 37:10, 11) E tupu te hau no te mea e “faaore” te Atua “i te tama‘i e tae roa a‘enei i te hopea fenua.” (Salamo 46:9; Isaia 2:4) E “e tupu roa . . . te parau-tia; e rahi roa hoi te hau, oi vai a‘e te marama”—oia hoi e a muri noa ’tu!—Salamo 72:7.

¹⁸ E parahi te feia haamori o Iehova ma te panoonoo ore. A auraro noa ’i te mau Iseraela i te tau Bibilia ra i te Atua, ua parahi noa ratou ma te hau, aore ra ma te panoonoo ore. (Levitiko 25:18, 19) E mea faahiahia mau â ia fana‘o i tera atoa panoonoo ore i roto i te paradaiso!—A taio i te Isaia 32:18; Mika 4:4.

19. No te aha tatou i ite ai e e pue te maa i roto i te ao apî a te Atua?

¹⁹ E ore te o‘e. “E riro hoi e maa sitona tei te fenua i nia i te tupuai o te mau mou‘a ra, e tei tupu ra,” ta te papai salamo ïa i himene. (Salamo 72:16) E haamaitai te Atua ra o Iehova i to ’na mau taata parau-tia, e “ei reira e hotu rahi mai ai te fenua.”—Salamo 67:6.

20. No te aha tatou e nehenehe ai e tiaturi e e riro te fenua taatoa ei paradaiso?

²⁰ E riro te fenua taatoa ei paradaiso. E fare apî e e aua nehenehe te itehia i nia i te fenua ta te taata hara i faaino na mua ’‘e. (A taio i te Isaia 65:21-24; Apokalupo 11:18) A mairi ai te tau, e aano mai te mau vahi o te fenua tei vî ê na, a riro atu ai te fenua taatoa ei mea nehenehe e te hotu maitai mai te ô i Edene. E eita roa ’tu te Atua e haamoe i “te heheu . . . i to [’na] rima, e te haamâha . . . i te hiaai o te mau mea ora atoa nei.”—Salamo 145:16.

21. Eaha te faaite ra e e vai te hau i rotopu i te taata e te animara?

²¹ E vai te hau i rotopu i te taata e te animara. Hoê â tamaaraa ta te animara oviri e te animara rata. Eita atoa te  hoê tamaiti iti e riaria i te mau animara e mea atâta hoi i teie mahana.—A taio i te Isaia 11:6-9; 65:25.

22. Eaha te tupu i nia i te ma‘i?

²² E ore te ma‘i. Ei Arii o te Basileia i te ra‘i o te Atua, e faaora Iesu i te ma‘i i nia i te hoê faito rahi a‘e i ta ’na i rave a vai ai oia i te fenua nei. (Mataio 9:35; Mareko 1:40-42; Ioane 5:5-9) I reira, “e ore . . . to reira e parau e, Ua paruparu vau i te ma‘i.”—Isaia 33:24; 35:5, 6.

23. No te aha te tia-faahou-raa e faaoaoa ’i i to tatou aau?

²³ E faaho‘ihia mai te feia here i pohe i te ora ma te tiaturiraa e ore roa e pohe faahou. E faatiahia mai te feia atoa e taoto ra i roto i te pohe e o ta te Atua e haamana‘o ra. Inaha, “e tia-faahou-raa to tei pohe, te feia parau-tia e te feia parau-tia ore.”—Ohipa 24:15; a taio i te Ioane 5:28, 29.

24. Eaha to outou mana‘o i te oraraa i roto i te paradaiso i te fenua nei?

²⁴ Auê ïa tau faahiahia no a muri a‘e te tiai maira i te feia e maiti i te haapii no nia i to tatou Atua poiete rahi ra o Iehova, e i te tavini ia ’na! O te paradaiso i te fenua nei i mua nei ta Iesu i parau i to ’na fafauraa i te taata ohipa ino tei pohe i pihai iho ia ’na: “Ei paradaiso ïa oe e o vau atoa.” (Luka 23:43) E mea faufaa roa ia haapii atu â tatou no nia ia Iesu Mesia, na roto ia ’na hoi e tupu ai taua mau haamaitairaa atoa ra.