UA RAVEHIA E RAVE RAU MAIMIRAA NO NIA I TE MAUIUI TA TE POHE O TEI HEREHIA E FAATUPU. Mai tei hiˈopoahia i roto i teie tumu parau, no roto mai te mau aˈoraa maitai roa ˈˈe i te Bibilia. Te faataa maitai mai ra te reira e mea tano te aratairaa a te Bibilia no te mau tau atoa. Hau atu â, e hopoi mai te Bibilia i te tamahanahanaraa i te feia e oto ra.

• Aita te feia pohe ta tatou e here ra e mauiui ra

  Te parau ra te Bibilia i roto i te Koheleta 9:5: “Aita . . . te feia pohe i ite i te tahi mea.” E ia au i te Salamo 146:4, ua moˈe to ratou mau manaˈo. Te faaau ra te Bibilia te pohe i te taoto.—Ioane 11:11.

• E hopoi mai te Atua î i te here i te tamahanahanaraa

  Te na ô ra te Bibilia i roto i te Salamo 34:15: “Tei nia iho te mata o Iehova a i te feia parau-tia, e te faaroo ra to ˈna tariˈa i ta ratou taparuraa i te tauturu.” E ere noa te pure i te paraparau-noa-raa i te Atua poiete, e ravea atoa râ no te faatupu i te hoê auhoaraa piri e o ˈna. E nehenehe o ˈna e tamahanahana ia tatou maoti to ˈna puai.

• Te hoê a muri aˈe maitai aˈe e tiai-ru-hia ra

  A feruri na i te taime e faatiahia mai ai te feia pohe i te ora i nia i te fenua nei. Mea pinepine te Bibilia i te faahiti i te reira a faataa ˈi eaha te huru oraraa i nia i te fenua a muri aˈe. Te na ô ra te Bibilia no nia i te Atua: “E tamǎrô oia i te mau roimata atoa o to ratou mata. E ore roa te pohe, e ore atoa te oto e te auê e te mauiui.”—Apokalupo 21:3, 4.

No to ratou tiaturi ia Iehova, te Atua o te Bibilia, e rave rahi tei itoitohia i to ratou iteraa e farerei faahou ratou i te feia herehia tei pohe. Ua pohe te tane a Ann i muri aˈe e 65 matahiti faaipoiporaa. Te na ô ra Ann: “Ua tamahanahana te Bibilia ia ˈu, aita te feia herehia tei pohe e mauiui ra e e faatia mai te Atua i te feia atoa ta ˈna e haamanaˈo. E hoˈi noa mai tera mau manaˈo a manaˈonaˈo ai au i ta ˈu tane. Ua nehenehe ïa vau e faaruru i tera tupuraa fifi mau.”

Te na ô ra Tiina tei faahitihia i roto i te tahi atu mau tuhaa o teie tumu parau: “Ua turu noa mai te Atua ia ˈu mai te mahana i pohe ai Timo, i te mau taime atoa i ahoaho ai au. Ua riro te parau fafau Bibilia no nia i te tia-faahou-raa ei mea mau no ˈu. E faaitoito te reira ia ˈu e tae roa i te mahana e farerei faahou ai mâua Timo.”

Tera atoa te huru aau o te taata e rave rahi e tiaturi ra e mea mau te Bibilia. Mai te peu te manaˈo ra oe e moemoeâ noa aore ra e ere te mau faahitiraa a te Bibilia i te mea mau, a imi i te haapapuraa e tupu iho â te mau parau fafau Bibilia. E taa ia oe e o te Bibilia te tauturu maitai roa ˈˈe no te feia e oto ra.

A mataitai i te video i nia i ta matou reni natirara jw.org

 EAHA TE TUPU IA POHE TE TAATA?

HINAARO ANEI OE I TE PARAU APÎ OAOA?