UA FANAUHIA vau i 1965 i roto i te hoê utuafare veve i Irelane Apatoerau. Ua paari au i te mataeinaa Derry a tupu ai te aroraa i rotopu i te mau Katolika e Porotetani e 30 tiahapa matahiti. No te pǔpǔ iti taata Katolika, e haafaufaa-aˈe-hia na te mau Porotetani, tei rahi aˈe hoi. Ua parihia e e ohipa tia ore ta te mau Porotetani e te mau mutoi e tia poritita. I manaˈo-atoa-hia na e na ratou atoa e maiti i tei fanaˈo i te ohipa e te nohoraa.

Ua ite au i te ohipa tia ore i te mau vahi atoa. Ua hamani-ino-hia vau e rave rahi taime. Ua tupaihia, faahepohia ia haere mai i rapae i te pereoo ma te hoê pupuhi. Ua uiui-atoa-hia e maimihia e te mau mutoi aore ra faehau. Ua inoino roa vau a manaˈo ai, ‘e farii noa anei i te reira aore ra e patoi atu!’

I 1972, ua apiti au i te taahiraa parauhia Bloody Sunday, te hoê ïa haamanaˈoraa i na taata 14 tei pupuhihia e te mau faehau Beretane. Ua amui atoa vau i te mau haapaeraa maa tei faahanahana i te mau taata mau auri i turu na i te tahi faatereraa tei pohe i te poia i 1981. I huti na vau i te reva o Irelane Apatoerau tei opanihia  na e e peni i te mau vahi atoa i te mau parau patoi i te faatereraa Beretane. Ua rahi roa ˈtu â râ te mau ohipa iino aore ra taparahiraa i te mau taata Katolika e patoi atu. E pinepine te mau taahiraa i te riro ei patoiraa uˈana.

I te haapiiraa tuatoru, ua amui au i te hoê patoiraa a te mau piahi no te paruru i te heipuni. I muri aˈe, ua reva vau i Lonedona. I reira, ua turu vau i te taahiraa a te tahi pǔpǔ patoi i te faatereraa tei haafaufaa aˈe hoi i te feia moni i te taata veve. Ua apiti atoa i te patoiraa no te faaiti i te moni avaˈe e i 1990, no te taahiraa patoi ïa i te tahi tute taa ê ta te taata taitahi e tia e aufau. I tera mahana, ua tuino-roa-hia te vahi parauhia Trafalgar.

Aita roa vau i ite i te mauruuru. Aita ta matou mau patoiraa i taui aˈe i te mau mea, ua faarahi roa ˈtu râ i te ino.

Ma te tauturu a te hoê hoa, ua farerei au i te mau Ite no Iehova. Maoti te Bibilia, ua haapii mai ratou e te tâuˈa maira te Atua i to tatou fifi e e fatata oia i te faaore i te mau mauiui atoa. (Isaia 65:17; Apokalupo 21:3, 4) Noa ˈtu e e manaˈo maitai to te taata, eita ta ˈna e nehenehe e faatupu i te parau-tia. E titauhia ta te Atua aratairaa e to ˈNa puai no te patoi i te mau demoni ite-ore-hia e faatupu ra i te mau fifi na te ao nei.—Ieremia 10:23; Ephesia 6:12.

I teie nei, ua taa ia ˈu e a faatupu ai i te mau patoiraa, e au ra e ua tamata vau i te faaafaro i te tahi parahiraa i roto i te hoê pahi e tomo ra. Mea tamǎrû mau ia ite e fatata roa te mahana e ore ai te mau ohipa tia ore i te fenua nei a tahoê roa ˈtu ai te taata atoa.